Ketre Jëne Troa Xatuane La Itre Atr

Hnene la itre Nyipi Keresiano hna thawa trongën la maca ka loi kowe la itre atr ka ala nyim. (Fil. 2:17) Hna aijijë angatr troa eatrën la huliwa cili jëne itre boroshür, me itre tarak, itre hna cinyihane lai ngöne la 20 lao qene hlapa; hna amë itre eje hnine ëternet. Ame laka hnëkëne jë la itre ewekë cili hnine ëternet, tre thaa nyine tro kö a thawa la itre itusi hna xötrei kapa kowe la Itretre Anyipici Iehova. Ame la kepin matre kuca jë la pengöne cili, tre, kolo hi matre nyi xaa jëne ithuemacanyi kowe la itre atr ka ala nyim la itre ini hna hamën hnene la Itretre Anyipici Iehova qa hnine la Tusi Hmitrötr.

Ame e cili lo, hna nyixane hmaca la itre itus ka eje hë e hnine ëternet. Ene lo boroshür hna hape Nemene La Hnei Akötresieti Hna Thele The Së? ngöne la 220 lao qene hlapa. Ame lai aderes ne ëternet nyine troa wange lai, tre ej a meköl ngöne la götrane pun ne lo lue zonal La Tour de Garde ne 1 Januare me Réveillez-vous ! ne 8 Januare 2004.

Tune kaa la aqane tro nyipunieti a nyipiewekën la jiane huliwa cili? Ketre ka lolo catr kowe la ketre atr ka hetre hni ne ajane kowe la nyipici, ngo ka thaa trotrohnine kö la qene hlapa i epun. Maine eje fe hnine la ëternet la itre hna cinyihan ngöne la qene hlapa i angeic, haawe amamane ju koi angeic la aderesi ngöne lo lai götrane pun ne la lue zonal La Tour de Garde me Réveillez-vous ! Jëne ëternet, ijiji angeice hi troa hane waipengöne la boroshür ngöne la qene hlapa i angeic, uti hë la tro epuni elanyi a hane traqa fë koi angeic la caa itus ngöne la qene hlapa i angeic. Maine tro pena epuni a nue kowe la ketre ekalesia maine ketre gurup ka ithanatane lai qene hlapa ne lai atr troa iwai.