Kola Sa La Itre Hnyinge i Nyipunie
◼ Nemene la itre ethanyine la kuci ëternet me thele troa ithanata memine la ketre trehnyiwa?
Nyimutre la itre götran hnine la ëternet hna hnëkëne me eköthe hnene la itre atr matre troa iporotrikekeu. Nyimutre la itre götrane cili hnine ëternet ka aijijën la itre atr troa kuca me amamane la sipu pengö i angatr; kola hamëne fe la sipu foto i angatr me itre xaa ithuemacanyi ju kö göi angatr. Ame la kola öhnyi angatr jëne ëternet, kolo hi a sipo porotrike ju hnene la itre xan. Ka hlemu catre la itre götrane cili thene la itre thöth, nge ame hnine la ekalesia, tre, kola cili thenge hnene la itre xaa thöth matre troa ithanata memine la itre xaa atr ka uune ka hape Itretre Anyipici Iehova fe angatr.
Thaa jole kö kowe la ketre atr hne së hna iöhnyi memin hnine ëternet, troa sili trenga thoi ngöne la ëje i angeic, memine la itre pengö i angeic ngöne la götrane la ua, maine ngöne pena la itre hnei angeic hna ajan. (Sal. 26:4) Maine jë ame lai atr ka qaja ka hape ketre Atre Anyipici Iehova angeic, tre, ketre atr ka thaa ce hmi kö me easë, maine ketre hna upetrije pena, maine ka catre iamenumenu. (Gal. 2:4) Kola mama laka, nyimutre la itre atr ka angazone la itre nekönatr, angatr a thele tha jëne ëternet.
Nge maine xecie koi së laka, ame la itre hne së hna ithanata memin jëne ëternet, tre, itre ka loi hi angatr hnine la ekalesia, ngo ame pe, tro pala hi a thupën, pine laka, canga tro hi a fezi jea la itre porotrike së ngöne la jëne cili. Hnene hi laka, thaa hna xomehnöthe kö hnene la itre atr la itre hnei angatr hna qaja, ke ithatre kö nyidro, lue ka ithanatakeu. Angatre mina fe a xome la ëternet ceitune me ketre jëne troa iqajakeune la itre ewekë ngöne la gaa sihngödr, nge angatr a mekune laka ame la itre hnei angatr hna qaja, ke, pëkö ka troa atre, maine itre keme me thine i angatr maine itre qatre thupe pena. Ngazo pe, hetrenyi la itre thöth thene la itre lapa Keresiano hna amenun me hane lö hnine la itre iporotrikekeu ka ngazo catr. (Efe. 5:3, 4; Kol. 3:8) Ame itre xan, tre, angatr a hane amamane la itre ifoto i angatr e cile xöe, me cinyihane la itre trenge ewekë ka sis, maine amamai angatre pena e kuci ngazo hnine video.
Celë hi matre, loi e troa thupëne hnyawa hnene la itre keme me thine la itre hna kuca hnene la itre nekö i angatr ngöne ordinatör. (Ite edomë 29:15) Drei la ka pi ajan troa alöne la ketre trehnyiwa hnine la uma së, maine nue angeice pena troa ce lapa caasi memine la itre nekö së? Pë jë kö ka ajane easë troa ujë tune lai! Ketre tune mina fe, ka ngazo catre koi së me kowe la itre nekö së, troa ce sinee memine la itre trehnyiwa jëne ëternet, ngacama uune ju hë angatr ka hape Itretre Anyipici Iehova angatr.—Ite edomë 22:3.