Drei Atr La Ka Troa Pi Etid?
1 Hna qaja hnei perofeta Amosa ka hape, tro ha hetre jiine e Isaraela, “tha jinë pë xeni me tim, ngo jinë wesi ula i Iehova.” (Amosa 8:11) Haawe, kola thawa hnene la organizasio i Iehova kowe la itre atr ka mecijiin, me ka pi iji ngöne la götrane la ua, la itre itusi ka qeje pengöne la Tusi Hmitrötr; nyimutre catre hna tro fë e cailo fen.
2 Haawe, hne së hna fejane la 70 milio lao itus, Atrehmekune, nge 91 milio lao boroshür, Thele. Easë a madrine ngöne la easë a inine la nyipici jëne lue ej, ke, hmaloi troa trotrohnine nge hetre thangane ka lolo. Ngo nyimutre la itre atr ka kapa hë la itre itusi së, ngo thaa hna etidine pala kö me easë. Nemene la nyine troa kuca?
3 Loi e Caa Itus Ke Caa Etid! Hanawange la hna kuca hnene la ketre trejin, kola xötrei cainöje kowe la ketre föe, me sipo nyidro troa etid. Hna canga kapa hnene la föe, me qaja kowe la trejine ka hape, “Eö hmekuje hi la pane atr ka sipone troa etid me eni.” Tune kaa ngöne la götrane së, ala ije la itre atr ka qaja tune la? Loi e xecie koi së laka, e caa itusi hna amë, ke troa iwai hmaca, nge ketre etid fe hë.
4 Pine laka, hetrenyi hë thene la itre atr hne së hna iöhnyi memin, lo itre itusi së, haawe, nemene la aqane tro së a ahlëne la ajane thei angatr, troa atrepengöne la aliene itre ej? Hnene la ketre trejine hna hnyingëne mekötine kowe la ketre atr, maine jë hetre hnyinge i angeice ngöne la Tusi Hmitrötr, ene pe kola sa hnene la atr ka hape, “Pëkö.” Öni nyidroti ka hape, “Nyipici, maine jë hetreny.” Nyidroti a amexeje jë la ketre, me nyiqaane etid. Tune kaa matre sipone kowe lai atr, maine hetre ajane thei angeice troa atrepengöne la aqane mekune i Tusi Hmitrötr, ngöne la ketre hnyinge maine ketre jole ka eje thei angeic? Loi mina fe tro së a hnëkëne hnyawa la ketre hnyinge ka ijije troa ahlëne la aja thei angeic, e pë ju mekune thei angeic. Eje hi laka, itre ijine porotrike lai, ka troa fe gojenyi kowe la etid, ene la troa eköthe pala hi la nyipici ne la Tusi Hmitrötr.
5 Ame la nyipi ewekë ngöne la kola cainöj, ke ene la troa etid memine la itre atr. Pine laka, thatre kö së la mekune i angatr, haawe, loi e thaa tro pi kö së a luelue troa qeje etid kowe la itre ka drei së. Sipone jë la ixatua i Iehova jëne la thith, nge loi e troa huliwa thenge la itre hne së hna sipon. Haawe, thaa hmitre kö tro sa öhne la kola troa pi etid la itre atr, ngöne la easë a qeje etid koi angatr!—1 Ioane 5:14, 15.