Isaisa La Qëhnelö Hna Thawa Troa Cainöj
1 Paulo la ketre atre catre cainöjëne la maca ka loi, matre hnei nyidrëti hna canga thele la itre götrane gaa aja ka cainöj, tune la traone e Efeso. Pine laka, hetre thangane ka lolo qa ngöne la hnei nyidrë hna cainöje e cili, haawe, hnei nyidrëti hna cinyihane kowe la itre keresiano, itretre ce huliwa me nyidrë ka hape: “Ase hë thawa koi ni la qëhnelö ka ishaisha, me hete huliwan.” (1 Kor. 16:9) Hnei Paulo hna huliwa huti ngöne la götrane cili, me xatuane la itretre efeso ka nyimutre troa hane lapaun.—Ite Huliwa 19:1-20, 26.
2 Ame enehila, hna hane thawa mina fe koi së la qëhnelö ka isaisa, troa cainöj. Hna sipo së troa xatuane la itre ekalesia ka thatreine kö troa huliwane asë la itre teritoare i angatr, ngöne la macatre. Qa ngöne lai, nyipi ewekë tro sa hane ixatua ngöne la itre xaa götrane gaa aja ka cainöj.—Wane ju la 2 Korinito 8:13-15.
3 Ijije Kö Tro Së a Hane Ixatua Ngöne La Ketre Götrane Gaa Aja Ka Cainöj? Hnei së kö hna hane sipone jëne la thith, maine ijije tro së a hane cainöje e cailo? Maine jë hetre ekalesia ngöne la traone së, ka aja ixatua. Ame ngöne la itre xaa ijin, kola aja qatre thup, me drikona ngöne la itre xaa ekalesia ezin. Tune kaa matre ce ithahnatane memine la atre thupëne la sirkoskripsio la ewekë cili, me wange la hnei angeice hna mekun? Ketre, maine jë hetrenyi jë pena ha la ketre ekalesia gaa easeny hna thuemacane hë, göi troa ‘sipo ka ixatua thatraqane la Baselaia.’ (Mat. 9:37, 38) Qa ngöne lai, ijiji së kö troa hane xemine lai?
4 Ngöne lo itre macatre ka ase hë, itre thauzane lao hnepe lapa keresiano ka tro troa hane menue ngöne la itre xaa nöj. Celë hi hna kuca hnene la lue trefën, öni nyidro: “Ajane huni troa nyihluei Iehova, ngöne la ketre götrane ka ijije tro huni a hane hamëne la ixatua hun.” Maine hetre ajane së, nge ijiji së fe troa hane tro kowe la ketre götrane ne la nöje së, maine atreine pena troa mejë kowe la ketre nöje ka tru, haawe, loi e tro së a pane ce ithahnatane la itre mekuna së memine la itre qatre thup ne la ekalesia së. Ame ngöne la itre xaa ijin, kola traqa la itre jole ngöne la götrane la ua, pine laka, hna tro hnene la itretre cainöje kowe la ketre götrane gaa aja ka cainöj, nge thaa pane ce ithahnatane kö memine la itre qatre thup. Qa ngöne lai, maine easë a mekune troa mano me ajane troa cainöje ngöne la ketre götran, maine e cahuë e mëëk, maine ngöne la itre hnapet, haawe, loi e tro së a thuemacane la ekalesia ne la götrane cili, qëmekene troa nyiqaane cainöj.
5 Maine easë a ajane troa sipone koi Sasaiatri troa cainöje ngöne la ketre götrane gaa aja ka cainöj, haawe, loi e troa cinyanyi tus, tro pe a jëne la Komite Ne Huliwa Ne Cainöje Ne La Ekalesia. Tro angatre a hane ce sedrëne la hnei angatre hna ce axeciën, me iupi fë koi Sasaiatri. Epi tro pala hi së asë a catre kuca la huliwa i Iehova, e kolo petre kö a fe la qëhnelö ka isaisa.—1 Kor. 15:58.