Catre Jë Së Cainöj Tui Iesu

1. Nemene la ewekë ka aisapengönëne la itre hlue i Iehova me itre xaa hmi?

HNA atre la itre hlue i Iehova, ke itre ka catrea cainöj. (Tito 2:14) Celë hi ka aisapengönë angatr me itre xaa hmi. Hapeu, jole kö koi eö tro pala hi a madrin ngöne la huliwa cili? Önine la ketre qatre thup ka catre huliwa i Iehova ka hape, “Ame itre xaa ijin, tha pi cainöje kö ni.” Hapeu, hna hane fe traqa koi eö la mekune cili?

2. Pine nemene matre jole koi së troa catre cainöj?

² Maine jë, pi tro kö sa kuca la itre xaa huliwa i Iehova hune la troa cainöj. Pine nemen? Pine laka, ame la easa xup me nyihnyawan la itre uma thatraqane la hmi së, maine xatuane la itre trejin hna lep hnei hulö, maine ithuecatre pena kowe la itre trejin, ke canga mama hi la itre thangane la itre trengecatre së. Nge ka thue madrine koi së. Ketre, easa ce huliwa memine la itre trejin ngöne la tingeting me ihnim, nge angatr a wangatrune la hne së hna kuca koi angatr. Ngo tha ka ceitu kö memine la huliwa ne cainöj. Maine jë, itre macatre hne së hna cainöj ngöne la ca teritoar, nge co hi la itre ka pi drei së. Maine pena, tha kapa kö itre xan la maca hne së hna tro fë. Nge pine laka, easenyi catre hë la pun, alanyim la itre atr ka methinëne la maca së. (Mat. 10:22) Nemene la ka troa xatua së troa acatrene la aja së troa cainöj?

3. Nemene la hna ini së göi Iesu hnene la ceitune ka ej ngöne Luka 13:6-9?

³ Loi e tro sa xomi ini qa ngöne la aqane catre huliwa i Iesu. Ame lo nyidrëti e celë fen, hnei nyidrëti pala hi hna catre cainöj. Kola tro la itre drai, nge kolo jë pe ka hape, catrecatre jë nyidrë cainöj. (E jë la Luka 13:6-9.) Ame ngöne la ceitune i Iesu, nyidrëti a qaja la ketre atre eënyi vin laka, köni macatre ne nyihnyawane angeic la ketre wacua, ngo goi tha wawene fe. Ketre tune mina fe, köni macatre ne cainöje Iesu kowe la angetre Iudra, ngo ala xalaithe hi la ka kapa la maca i nyidrë. Tha hnene kö lo atre eënyi vin hna satrije la wacua, ketre tun, tha hnei Iesu kö hna cile troa cainöj kowe la angetre Iudra. Ngo hnei nyidrëti pe hna nue trengecatr, matre ketr la hni angatr.

4. Nemene la foa lao ewekë qa ngöne la tulu i Iesu hne së hna troa ce wang?

⁴ Ame ngöne la tane mekune celë, tro sa ce wange la aqane catre cainöje i Iesu ngöne la sikis lao treu tixenuë i nyidrë e celë fen. (Wange ju la note d’étude Qene Wiwi hna hape, “après cela” ne Luka 10:1.) Tro sa ce wange la foa lao kepin ka uku nyidrë troa catre cainöj: (1) Hnei nyidrëti pala hi hna mekune la aja i Iehova, (2) hnei nyidrëti hna wangatrune la itre hna perofetan, (3) hnei nyidrë hna mejiun koi Iehova, nge (4) nyidrë a mejiune laka, tro kö a hetre ka drei nyidrë. Maine tro sa wangatrune la itre ini qaathei Iesu me nyitipu nyidrë, ke tro hë së lai a hetre aja troa catre cainöj.

HNEI NYIDRËTI PALA HI HNA MEKUN LA AJA I IEHOVA

5. Tune kaa la aqane amamane Iesu laka, ka tru koi nyidrë la aja i Iehova?

⁵ Hnei Iesu hna catre ‘cainöjëne la maca ka lolo ne la Baselaia,’ ke atre hi nyidrë laka, celë hi kepin matre upi nyidrëti jë hnei Iehova kowe la fen. (Luka 4:43) Hnei nyidrëti pala hi hna amë panëne la huliwa ne cainöj ngöne la mele i nyidrë. Ame ngöne la pun la mele i nyidrë, hnei nyidrë hna catre “xötrëne la itre hunahmi me itre traon matre troa inine la itre atren.” (Luka 13:22) Hnei nyidrëti fe hna inine la itretre drei nyidrë troa catre cainöj tui nyidrë.—Luka 10:1.

6. Tune kaa la aqane tro sa goeëne la huliwa ne cainöj, ngacama hetre xaa huliwa i Iehova? (Wange ju fe la foto.)

⁶ Ame enehila mina fe, aja i Iehova me Iesu tro la itre keresiano a amë panëne la huliwa ne cainöj ngöne la mele i angatr. (Mat. 24:14; 28:19, 20) Ame asë hi la itre huliwa hne së hna kuca koi Iehova, ke ka ce tro hi memine la huliwa ne cainöj. Ame la huliwa ne xupi Uma Ne Baselaia, me itre huliwa hna kuca ngöne la Bethela, ke göne troa xatuane la huliwa ne cainöj me xatuane la itre atr hne së hna cainöj kow. Ame la easa tro kowe la itre götran hna lep hnei hulö, ke tha göne hmekuje kö troa xatuane la itre trejin e cili, ngo göne fe troa aijijë angatr troa xejë hmaca la itre huliwa i Iehova, tune la huliwa ne cainöj. Maine tro sa lapa mekun la enyipiewekëne la huliwa ne cainöj memine la aja i Iehova tro sa amë panëne ej ngöne la mele së, ke tro lai a uku së troa catre cainöj. Öni János ketre qatre thup qa Hongrie ka hape, “Eni a thupëne matre tha tro kö ni a thëthëhmine laka, pane hnëqa së la troa cainöj. Pëkö ketre huliwa i Iehova ka sisitria hune lai.”

7. Pine nemene matre aja i Iehova tro pala hi sa catre cainöj? (1 Timoteo 2:3, 4)

⁷ Tro sa acatrene la aja së troa catre cainöj, e tro sa goeëne la itre atr tui Iehova. Aja i Nyidrë tro la nöjei pengöne atr a dreng me kapa la maca ka loi. (E jë la 1 Timoteo 2:3, 4.) Celë hi matre Nyidrëti a ini së troa atreine tro fë hnyawane la maca cili ne iamele. Hna amë e hnine la boroshür hna hape, Hnime Jë La Itre Atr Hnei Epun Hna Inin, la itre eamo ka troa xatua së troa nyiqane ithanata me itre atr, me nyiqane ini Tus. Ngacama tha kapa kö itre xan la maca enehila, ngo thatre kö së, maine jë tro angatr a saze elany qëmeken troa traqa la akötr atraqatr. Tro la itre hne së hna qaja enehila a uku angatr elany troa kapa la nyipici. Celë hi matre, enehila hi la ijine troa catre cainöj.

HNEI NYIDRËTI HNA WANGATRUNE LA ITRE HNA PEROFETAN

8. Nemene la itre hna perofetan ka xatua Iesu troa huliwane hnyawane la traeme i nyidrë?

⁸ Atre hi Iesu la aqane troa eatre la itre hna perofetan. Atre hi nyidrë laka, tro nyidrëti a cainöj koi köni macatre nge sin, memine la ijin me aqane tro nyidrëti a mec. (Dan. 9:26, 27; Luka 18:31-34) Pine laka, atre hnyawa hi nyidrë la itre ewekë ka troa traqa, matre hnei nyidrëti hna huliwane hnyawane la traeme i nyidrë. Celë hi ka uku nyidrë troa catre cainöj me eatrëne la hnëqa hna ahnithe koi nyidrë.

9. Hnauëne laka, itre hna perofetan a uku së troa catre cainöj?

⁹ Ame la easa trotrohnine la itre hna perofetan e hnine la Tusi Hmitrötr, ke kola uku së troa catre cainöj. Atre hi së laka, easenyi hë troa apatrene la fene celë. Easa öhne laka, ame la itre ewekë ka traqa e cailo fen me aqane ujë ne la itre atr, ke kolo hnyawa hi lo hna qaja hnei Tusi Hmitrötr göne la itre drai ne la pun. Nge easë fe a öhne laka, kola imethinë hnene la musi Agele me Amerika memine la musi Russie me itre sine xöle i angeic. Celë hi hna perofetan göne la joxu ne kolopi me kolojë “ngöne la ijine la pun.” (Dan. 11:40) Ketre, easa trotrohnine laka, ame la lue ca ne la hnasaatr ngöne Daniela 2:43-45, ke kola nyihatrene la musi Agele me Amerika. Matre, xecie koi së laka, tune la hna qaja hnene la itre hna perofetane celë, easenyi catre hë tro la Baselaia i Akötresie a apatrene la itre musi atr. Itre ej a qajaqaja la hneijine enehila me uku së troa catre cainöj e ijine petre kö.

10. Nemene la itre xaa kepin matre itre hna perofetan a uku së troa catre cainöj?

¹⁰ Ketre, hetre maca e hnine la itre hna perofetan hne së hna pi ce thawa me itre xan. Öni Carrie ketre trejin ka cainöj e République dominicaine ka hape, “Ame la ka uku ni troa ce thawa me itre xan la nyipici, ke ene la mel ka lolo hna thingehnaeane hnei Iehova. Nge ame la eni a öhne la itre jol hna melën hnene la itre atr enehila, thatreine kö ni lapa fë la itre hna thingehnaean cili, ngo loi e tro ni a ce thawa me angatr.” Itre hna perofetan a amaman ka hape, ce Iehova me easë ngöne la hna cainöj, nge celë hi ka ithuecatre koi së troa nue trengecatr. Öni Leila ka mel e Hongrie: “Isaia 11:6-9 a amamane ka hape, jëne la ixatua Iehova, ijiji nöjei atre hi troa saze. Kola uku ni troa cainöjëne la maca ka loi koi nöjei atr, uti fe hë la itre atr hnenge hna mekune ka hape, itre ka xel.” Ame pena Christopher, ketre trejin qaa Zambie, öni angeic: “Kola haöthe la fen hnene la maca ka loi, tune la hna perofetan ngöne Mareko 13:10. Nge ketre manathith koi ni la troa hane eatrëne la hna perofetane cili.” Ame eö ke, nemene fe la itre hna perofetan ka uku eö troa catre cainöj?

HNEI NYIDRËTI HNA MEJIUN KOI IEHOVA

11. Pine nemene matre hnei Iesu hna mejiune koi Iehova matre tro pala hi a catre cainöj? (Luka 12:49, 53)

¹¹ Hnei Iesu hna mejiune koi Iehova matre tro pala hi a catre cainöj. Ngacama atre hi nyidrë laka, tro la maca ka loi a amejëne la iwesitrë me icilekeu, ngo hnei nyidrëti pala hi hna thupëne la aqane ithanata i nyidrë. (E jë la Luka 12:49, 53.) Hnene la itre he ne hmi hna anyimua thel troa humuthi nyidrë. (Ioa. 8:59; 10:31, 39) Ngo hnei Iesu pala hi hna catre cainöj, ke atre hi nyidrë laka, ce Iehova me nyidrë. Öni nyidrë: “Tha eni casi kö, ce eni memine la Kem, Atre upi ni. . . . Tha hnei nyidrëti kö hna nuaxöji ni, ke eni pala hi a kuca la itre ewekë ka amadrinë nyidrë.”—Ioa. 8:16, 29.

12. Nemene la hnei Iesu hna qaja kowe la itretre dreng matre tro pala hi angatr a catre cainöj, ngacama kola icilekeu?

¹² Hnei Iesu hna amexej kowe la itretre dreng ka hape, troa mejiun koi Iehova. Anyimua qaja nyidrë koi angatr ka hape, tro kö la Akötresi angatr a xatua angatr la kola traqa la icilekeu. (Mat. 10:18-20; Luka 12:11, 12) Ketre, hnei nyidrëti hna upi angatr troa hmek. (Mat. 10:16; Luka 10:3) Hnei nyidrëti hna qaja koi angatr ka hape, tha tro kö a musinëne la itre atr ka xele ma drei angatr, troa kapa la maca. (Luka 10:10, 11) Nge öni nyidrëti fe, e traqa ju akötrë angatr, loi e tro angatr a kötr. (Mat. 10:23) Ngacama tru la aja i nyidrë troa cainöj, nge ka mejiune nyidrë koi Iehova, ngo tha hnei nyidrëti kö hna tro kowe la itre götrane gaa ngazo.—Ioa. 11:53, 54.

13. Pine nemene matre loi e xecie koi eö ka hape, tro kö Iehova a xatua eö?

¹³ Ketre tun, ka nyipiewekë koi së enehila la ixatua Iehova matre tro pala hi sa catre cainöj ngacama kola icilekeu. (Hna Am. 12:17) Hnauëne laka, xecie koi së laka, tro kö Iehova a xatua së? Mekune jë lo thithi Iesu ngöne Ioane mekene 17. Hnei Iesu hna sipone koi Iehova troa thupëne la itre aposetolo, nge hnei Iehova hna kapa la sipo i Iesu. Kola qejepengöne ngöne la tusi Itre Huliwa la aqane xatuane Iehova la itre aposetolo troa catre cainöj ngacama kola iaxösisi. Ame ngöne la thithi Iesu, hnei nyidrëti hna sipo Iehova troa thupëne la itre atr ka troa lapaune kowe la maca hna cainöjëne hnene la itre aposetolo, ka tui eö fe. Ame enehila, Iehova pala hi a sa la thithi Iesu. Haawe, tro kö Iehova lai a xatua eö, tune la aqane xatuane Nyidrë la itre aposetolo.—Ioa. 17:11, 15, 20.

14. Pine nemene matre xecie koi së laka, tro pala hi së a catre cainöj ngöne la itre ijine jol? (Wange ju fe la foto.)

¹⁴ Pine laka easenyi hë la pun, tro ha jole trootro koi së troa catre cainöjëne la maca ka loi. Ngo xecie koi së laka, tro kö sa kapa la ixatua ka ijij. (Luka 21:12-15) Tui Iesu me itretre dreng, tha easë kö a musinëne la itre atr troa drei së, nge tha easë kö a thele iwesitrë me angatr. Nge ame ngöne la itre nöj laka, hna wathebone la hmi së, itre trejin pala hi a catre cainöj, ke ka mejiun angatr koi Iehova, ngo tha kowe kö la sipu trengecatre i angatr. Iehova a hamë trengecatr kowe la itre hlue i Nyidrëti enehila, matre “eatrëne hnyawa la huliwa ne cainöj” thenge la aja i Nyidrë, tune la aqane xatuane Nyidrë la itre pane keresiano. (2 Tim. 4:17) Haawe, e tro eö a mejiune koi Iehova, tro pala hi eö lai a catre cainöj.

HNEI NYIDRËTI HNA MEJIUNE LAKA, HETRE ATRE PALA KÖ KA TROA DREI SË

15. Nemene la ka amamane ka hape, ame koi Iesu, hetre atr pala kö ka troa kapa la maca ka loi?

¹⁵ Ka xecie koi Iesu laka, tro kö a hetre atr ka troa drenge la maca ka loi. Celë hi lai ka xatua nyidrë tro pala hi a madrin me catre cainöj. Ame ngöne lo macatre Iesu a nyiqane cainöj, hnei nyidrë hna öhne laka, alanyimu catre la itre atr ka troa kapa la maca. Nge hnei nyidrëti hna aceitunë angatr memine la ketre hlapa laka, ijine hë troa menuën. (Ioa. 4:35) Ca macatre thupen, öni nyidrë kowe la itretre dreng: “Tru catre la nyine menuën.” (Mat. 9:37, 38) Nge e thupene hmaca, öni nyidrë: “Tru catre la nyine menuën . . . Matre, sipone jë kowe la Maseta troa pane upe la itre xa atr kowe la huliwa cili.” (Luka 10:2) Atre hnyawa hi Iesu laka, hetre atr pala kö ka troa kapa la maca ka loi, nge madrine catre nyidrë la ketre atr a kapa.—Luka 10:21.

16. Nemene la lue ceitun hnei Iesu hna xom matre troa amamane la thangan ne la maca ka loi? (Luka 13:18-21) (Wange ju fe la foto.)

¹⁶ Hnei Iesu hna ithuecatre kowe la itretre dreng troa mekun la itre thangane ka lolo ne la maca ka loi, matre tro angatr a catre cainöj. Hnei nyidrëti hna tune kaa? Jëne la lue ceitun. (E jë la Luka 13:18-21.) Kola amamane hnene la ceitun ne la itine sinapi laka, tro la maca ne la Baselaia a haöthe la fen, nge pëkö ka atreine acilën. Nge kola amamane hnene la ceitun ne la leven laka, tro la maca ne la Baselaia a kökötr, nge tro ej a saze la mel ne la itre atr ka kapa, ngacama tha ka canga mama kö. Haawe, jëne la lue ceitune celë, Iesu a xatuane la itretre dreng troa trotrohnine laka, ka hetre thangane la huliwa ne cainöj.

17. Pine nemene matre xecie koi së laka, hetre atre pala kö ka troa drei së?

¹⁷ Tro pala hi sa catre cainöj, e tro sa mekune la itre thangan ne la huliwa ne cainöj enehila ngöne la fen asë. E nöjei macatre, traqa koi itre milio lao atr ka dreng la maca ka sine la Drai Ne Amekunën me ini Tusi Hmitrötr me easë. Alanyim thei angatr ka hane xom la huliwa ne cainöj me xomi bapataiso. Thatre kö së la etrune la itre atr ka troa kapa la maca ka loi elany. Ngo atre hi së laka, Iehova a acasine la ka alanyim atraqatr ka troa mel ngöne la akötr atraqatr. (Hna Am. 7:9, 14) Maine önine la Maseta ka hape, hetre atre pala kö ka troa kapa la maca, haawe, catre jë së cainöj.

18. Nemene la hne së hna ajane tro la itre atr a öhne me trotrohnin?

¹⁸ Kola wangatrehmekune la itretre drei Iesu ke, itre ka catre cainöj angatr. Ame la itre atr ekö a drenge la aqane ithanata ne la itre aposetolo, atre ju hi angatr e cili laka, ‘itre drei Iesu angatr.’ (It. Hu. 4:13) Ame enehila, easë fe a ajan tro la itre atr a öhne la aqane catre cainöje së me trotrohnine laka, easë fe a xötrethenge la tulu i Iesu.