Ijije Kö Tro Asë Hi Së a Nyiqaan La Ketre Etid?
1 Hapeu, hetre atre kö hnei epuni hna ini tusi kow enehila? Maine pëkö, ajane kö nyipunie troa hane hetre etid? Hnei Iesu hna amamane hnyawa laka, nyipi ewekë tro sa xatuan la itre atr ka hni ne ajan thupen lo hne së hna xötrei cainöj koi angatr, matre tro angatr a hane kökötr ngöne la götran la ua. (Ioane 4:39-42) Nyimutre la itretre cainöj ka thaa hane pala kö etid memin la ketre atr. Ame itre xan, ka trene etid angatr ekö, ngo maine jë ame enehila, pëkö atr hnei angatr hna etidi kow.
2 Ame la Boroshür Thele, celë hi ketre ixatua ka lolo catr koi së, troa nyiqaan la itre etid. Loi e tro sa pane amë la ketre trepen ka lolo, jën la ini hna troa kapa qa hnin la boroshüre celë. Thupene lai, tune la hna amekötin, loi e tro së a akökötren la aja thene lai atr, jën la itre ini ka nyimutre hna troa kapa qa hnine la itus Atrehmekune.
3 Troa Nyiqaan Tune Kaa La Ketre Etid: Maine kola mama laka hetre hni ne ajan la atr troa drei së, thaa tro hmekuje kö së a tro triji angeic ju hi thupen la hna hamën la ketre itus. Atreine hi tro sa nyiqaane ju fe kö e cili la etid. Ijij tro sa iën la ketre mekene la boroshür ka ihmeku memine la aja i angeic. Thupene lai, loi e tro sa e la ketre hnying ngöne la qaan la götran, me hane e la itre paragaraf ka sa la hnyinge cili, me xom me ce ithanatan la itre xötre kii ne la Tusi Hmitrötr.
4 Maine hne së hna etid memine la itre atr hne së hna öhn ngöne la hne së hna cainöje trootro, ngo hapeu, hane fe kö së catre nyiqaane inin la Tusi Hmitrötr memine la itre atr ka lapa ezi së, memine la itre sinee së, maine itre atren la hnepe lapa së? Maine itre ewekë lai hne së hna kuca ekö, ngo tune kaa enehila? Maine jë hetrenyi la itre hnying me itre ewekë hna hnehengazon hnene la itre sine huliwa, me itre sine ini, me itre ka hamë ini, ka ijije tro së a qejepengöne trongën ngöne la kola porotrikë Tusi Hmitrötr, me ngöne la kola etid. Maine hne së hna xome la itre mekene tus me sa la hnyinge i angatr, nge thaa jole troa trotrohnin, nge ka ithuecatr, haawe tro lai a amaman la etrun la Tusi Hmitrötr. Atreine hi troa etid ngöne la kola xeni hnaipajö, maine thupene hna huliwa, maine thupene hna ini, maine ngöne la ketre traeme ka ijij, caasi hi, loi e thaa tro kö a sasaith la 15 koi 20 lao menetr ne iwai hmaca.
5 Nyipi ewekë troa hnëkë hnyawa. Ame ngöne la easë a iwai hmaca, loi e troa mama hnyawa la itre mekun nyine tro sa ithanatan. Ngöne la nöjei ijin easa porotrik memine la ketre atr, loi e tro sa atreine wenë hnyawa la itre mekune i angatr, matre atreine tro sa traqa kowe la aja ka eje the së, ene la troa nyiqaane etid memine la itre atr. Kola xatua së hnene la tusi Ite Huliwa 20:35 troa trotrohnin laka, hetrenyi the së la madrin atraqatr, memin la manathith, qa ngöne la hne së hna ce thawa la hne së hna hetreny, memine la itre xaa atr. Epi eje the së la aja celë, ene la troa hane inin la Tusi Hmitrötr, memine la itre xaa atr.