Loi e Troa Nyimutre Pala Hi La Itre Etid

¹ Kolo pala hi a kökötre la organizasio i Iehova Akötresie e celë fen, hatrene hi laka, Nyidrëti pala hi a amanathithine ej. Ame ngöne lo macatre ne huliwa hnapan, hna e la 375 923 lao atr hna bapataisone e cailo fen​—matre kösë lo 1 000 la itretre drenge ka lö e caa drai, kösë 43 e nöjei hawa! Kolo fe a hane thithë me kökötre lolo la huliwa ne Baselaia ngöne la itre götrane ka nyimutre ne la fen. Drei la madrine së ngöne la easë a e me öhne la aqane kökötrene me jilapane la fene hnene la maca ka loi!

² Kola öhne fe ngöne lo macatre ne huliwa ka ase hë e Kaledonia, laka, kola hane kökötre fe la itretre cainöj, me itre pionie ka ixatua, ketre tune mina fe la etrune la itre itus, me itre boroshür, me itre zonale hna hamën. Ketre kola elë fe la etrune la itre atr ka xome la bapataiso, me itre ka sine la Drai ne Amekunën. Nge tuneka fe la itre iwai hmaca, me itre etid? Lue götrane lai ngöne la huliwa ne cainöj, ka sisitria catre ngöne la kola kuca matre tro fe la itre atr a hane itretre drei Iesu. Eje hi, kola öhne laka, kola nango co la etrune la itre iwai hmaca, nge nango ipië la etrune la itre etid, 11 koi 100 la etrune la ka ut. Ngo kola uti tune lai hnene laka, nyimutre la itre ka etid ngöne lo hnaaluene itus, ngo enehila fenesi hë angatr. Ngo kola wangatrehmekune pe ngöne la nyimu macatre, laka, kolo pala hi a kökötre la etrune la itre iwai hmaca, memine la itre etid, celë hi ketre ithuecatre kowe la itre drai ka calemi. Haawe, kola mama hnyawa laka, tru catre pala kö la itre atr ka ajane troa inine la Tusi Hmitrötre ngöne la nöje së. Nemene la nyine tro së a kuca isa ala caas, matre troa akökötrene la etrune la itre iwai hmaca memine la itre etid?

³ Epi Hetrenyi The Së La Ajane Troa Etid Memine La Itre Atr: Nyipi ewekë tro së isa ala caasi a hetrenyi la ajane troa acatrene la lapaune së, me catre huliwa ngöne la götrane la ua. Kola mama thene la itre ka xötrethenge Iesu hnyawa laka, angatre a “cate kowe la nöjei huliwa ka loi.” (Tito 2:​14) Ame ngöne la easë a goeëne la hne së hna huliwa ngöne la hna cainöj, hapeu, atreine kö tro së a qaja ka hape, hetre ajane së troa canga wange hmaca la nöjei atr hne së hna hamë itusi kow? Hapeu, hetre madrine së kö troa inine la Tusi Hmitrötre memine la itre atr ka hetre hni ka ajan? (Rom. 12:11) Maine easë fe kö a thele troa akökötrene la ajane troa iwai hmaca me troa nyiqaane etidi memine la itre atr?

⁴ Maine tro së a isa e o drai la Tusi Hmitrötr, me sine pala hi la itre icasikeu, me e la itre itusi sasaiatri, haawe, tro ha nyine loi lai kowe la mele së ngöne la ua, nge tro fe hë la uati hmitrötre i Akötresie a aijijë së troa xome la hnëqa së. (Efe. 3:​16-​19) Celë fe ka troa acatrene la lapaune së me mejiune së koi Iehova, me ihnimi së kowe la itre atr ka lapa easenyi së. Ketre tro fe hë së a hetrenyi la ajane troa inine la nyipici kowe la itre xaa atr, nge e cili tro ha piine hne së la huliwa ne cainöj, nge troa hetre thangane eje ka lolo, nge jëne ixatua koi së. Nyipici, easë a ajane troa nyimutre la itre etid!

⁵ Loi e Troa Pane Etid Memine La Itre Atrene La Fami: Loi e tro la itre keme me thine keresiano a sikusikune troa kuca pala hi la etidi ne la itre nekö i angatr. (Deut. 31:12; Sal. 148:12, 13; Ite edomë 22:6) Lolo catre e tro la itre keme me thine a etid memine la itre nekö i angatr, ngöne la boroshüre Thele, nge thupene lai, ngöne la itusi Atrehmekune. Aqane tro hi angatre lai a hnëkë nyudrene troa hane nyiqaane cainöj ngacama thaa ka bapataiso petre kö, me amamane la ajane troa nyihluei Akötresie, me xome e thupene la bapataiso. Eje hi laka, ijije fe troa xome la itre xaa mekune ngöne la itre xaa itusi sasaiatri, ngo thenge la macatre memine fe la hna ajane hnene la nekönatr. Ijije hi tro la keme me thine ka etid memine la nekö i nyidro ka thaa xome pala kö la bapataiso, a e la etrune la etidi hna kuca memine la hawa, memine fe la itre iwai hmaca; celë hi hna qaja lai ngöne la hna cinyihan, hna hape, Kola Sa La Itre Hnyinge i Nyipunie, ngöne la Huliwa ne Baselaia ne eiperem 1987.

⁶ Loi e Troa Isa Hnëkë Hnyawa: Ame la easë a goeëne la etrune la itre zonal, me itre boroshür, me itre itusi hna hamën, kola mama hnyawa e cili laka, tru catre hnei itine hna jume trongën. Celë hi itre itine ne la nyipici la hna traan, nge hnene la eloine itre ej, atreine catre tro la itre atr ka kapa itre eje a hane itretre drei Iesu. Ngo hapeu, tro kö a hetre madrinene la ka eëny, maine angeice pala hi a traane la itre feja, me catre tro helep, nge thaa hane pë hë menuëne la hlapa? Ohe. Ketre ceitune hi lai memine la troa sisedrëne la hna nyiqaane hë, ene la troa iwai hmaca.

⁷ Hapeu, hetre ijine kö hnei epuni hna amë pala hi, matre troa iwai hmaca? Canga bëeke hmaca jë troa wange asë la itre atr ka drei epun. Loi e tro pala hi a mekune ka hape, ame la kola iwai hmaca ke, göi troa nyiqaane inine la Tusi Hmitrötre memine la itre atr. Hnei epuni kö hna xome hnyawa la itre not ne hna iwai hmaca, maine troa cinyihane hnyawa, me ahnyipixene itre ej, me hnëkëne hnyawa itre ej? Thaa tro pi kö së a thëthëhmine troa xome la ëje me hnalapa ne lai atr, ketre tune mina fe la ijine kola xötrei iöhny, me itre itusi hna amë pe; sija ju pe la itre xaa hnepe mekune hna ce ithahnatan, memine la topike hna troa ce wange ngöne la kola troa iwai hmaca. Ami göhnene ju fe la itre xaa ithuemacanyi hna troa cinyihane thupene la kola ase iwai hmaca.

⁸ Thele Jë La Aqane Troa Iwai Hmaca: Nemene la itre xaa nyine troa mekune hnyawa ngöne la epuni a troa wange hmaca la ketre atr ka drei epun? (1) Loi e troa keukawa la aqane ithahnata, me hetrenyi la hni ka madrin, nge thaa tro kö a hajihaji la itre mekune hna troa qaja. (2) Ithahnatane jë la itre topik, maine itre hnyinge hnei angeice hna ajan. (3) Loi e troa thaa jole troa trotrohnine la hne së hna qaja, nge hetre ajane troa dreng, nge hna hneatrepene ngöne la Tusi Hmitrötr. (4) Ngöne la nöjei kola iwai hmaca, thele jë troa qeje pengöne la ketre ewekë hna troa wangatrehmekune hnene la atr, ka nyipi lolo thatraqane la mele i angeic. (5) Nyiqaane eköthe jë la ketre mekune hna troa ithahnatane ngöne la iwai hmaca thupen. (6) The ithahnata aqeanyi kö. (7) The hnyinge menu kö, wanga troa hmahma lai atr, ene pe jole pi troa ithahnata. (8) Loi e troa hetrenyi la atrehmekun, matre thaa tro kö a canga lepe trije ju hi la itre aqane waiewekë, maine itre hna majemine ka ngazo hna kuca hnene lai atr, nge paatre petre kö e kuhu hni angeice la ajane kowe la itre mekune ngöne la götrane la ua.​—Wange ju la sinecetrone la Huliwa ne Baselaia ne Maac 1997, nge xome jë la ixatua ngöne la aqane troa kuca matre troa hetre thangane ka loi la hna iwai hmaca, nge matre nyiqaane etid.

⁹ Thele Jë La Nöjei Jën: Hnene la ketre ekalesia hna xome asë la itre ëjene me hnalapa ne la itre atr hna thatreine troa iöhnyi memin, pine laka, hna wathebone troa lö hnine la itre uma cili. Hna isa cinyanyi kowe la itre atrekë hnalapane lai, me iupi fë fe hnine lai itre tus, la isa lue tarak. Ngöne la pune la tus, kola qeje etid, nge kola hamëne fe la numero ne telefon, matre hetre hna troa sa kow hnene la atr ka troa kapa lai tus. Thupene la itre hnepe drai, kola sa hnene la ketre thöthi trahmany, me sipone troa etid. Ame ju fe kö lai drai thupen, hna canga tro troa wange lai thöth, ene pe nyiqaane etidi jë hi me angeice ngöne la itus Atrehmekune. Ame ju fe kö lai jidr, angeice a tro jë troa hane sine la Ini Tusi ne la ekalesia, me sine pala hi la itre icasikeu asë. Angeice a canga nyiqaane jë fe troa e la Tusi Hmitrötre ngöne la nöjei drai. Nge angeice a kökötre trootro ngöne la nyipici, uti hë la xome la bapataiso.

¹⁰ Hnene la itre xaa ka cainöje hna mekune troa ce tro troa iwai hmaca, matre angatre a ce tithe jë la caa loto. Haawe, kola tro pi hnene la ketre sör, troa wange la vizite i nyidro, paatre ju kö, ngo hna fe pe la qëhnelö pe hnene la ketre föe hmae, me qaja ka hape: “Eni la a treqe nyipo.” Ame hna xome hnei eahlo la itus Atrehmekune, hna hamëne hnene la ketre sine ce elo i eahlo. Ngöne lai ijine kola iwai hmaca hnene la itre sör, angatre a öhne la föe ase hë nyidroti e asë la itus, hna alua e, nge ketre, eahlo a haine la ithuemacanyi e hnine la itus. Öni eahlo ka hape, thaa sesëkötre kö eahlo la kola iwai hmaca hnene la itre temoë ngöne la drai celë, pine laka, hnei eahlo hna sipone ngöne la thith, matre tro angatre a traqa troa etid me eahlo. Ame hna nyiqaane la etid, nge nyidroti fe hë a hane nyiqaane jë troa sine la itre icasikeu, me kökötre nyimenyime ngöne la nyipici.

¹¹ Hna hamëne hnene la ketre trejine föe ka 25 hë lao macatre thupene la hna bapataiso, la ketre itus Atrehmekune, kowe la thine i nyidro. Ketre föe ka hmi catre la thine i nyidro, eahlo a nyiqaane e jë la itus. Thupene hë la lue mekene la itus, eahlo a hëne la nekö i eahlo. Thaa pane ithahnata kö la jajiny, kola sesëkötre la eahlo a qaja ka hape: “Eni a pi ajane troa hane Temoë i Iehova!” Ene pe etidi jë hi la thin, nge enehila ase hë eahlo hane xomi la bapataiso.

¹² Tupathe Jë La Itre Mekune Celë: Hane kö epuni sipone mekötine kowe la itre atr troa nyiqaane etid? Qaja jë ka hape: “Maine epuni a ajane troa etid, atreine hi tro ni a pane xome la itre hnepe menetr, matre troa amamai epuni la aqane troa kuca. Maine ajane epun, haawe, ijije hi troa sisedrëne ej.” Maine tro së a kuca tune lai, haawe, troa nyimutre la itre atr ka thaa troa luelue troa ini tus, nge troa hetre hni ne ajane i angatre tro së a amamane koi angatre la aqane trongene la etid.

¹³ Loi e troa pane amamane kowe la hnainine ngöne kola xötrei etid, la aqane troa canga hnëkë; ene la troa e la itre xötre ne la Tusi Hmitrötre hna hamën, me siji hatrene la itre hnaewekë ka tru ka sa la itre hnyinge hna cinyihan. Loi e tro hmekuje hi a hmitre ngöne la itre mekune ka tru. Maine nyipici laka, ame ngöne la xötrei, easë a thele troa trotrohnine la hnainin, ngo nyipi ewekë pala hi troa kuca lai etid. Mekune jë la aqane tro epuni a nyiqaane la etid hnene la thith, ketre götrane lai ka sisitria ngöne la huliwa cili, ketre tune mina fe la aqane tro epuni a hnëkëne la hnainine jëne la Tusi Hmitrötr, e hetre ka icilekeu jë me angeic. Ngo e hune asë la nöjei ewekë cili, loi e tro së a hamë ajane kowe la hnainine troa etid!

¹⁴ Eje hi laka, thaa ceitune kö la aqane kökötrene la nöjei hnainine asë ngöne la atrehmekun. Hetrenyi la itre atr, thaa canga hmala kö la itre hni angatre kowe la xeni ne la ua, matre hmitre catre angatre xome la itre ini hna hamëne koi angatr. Ame itre xan, tru catre hnei jole i angatr nge thatreine kö angatre troa nue la ketre hnepe hawa, matre troa ce wange la nyimu paragarafe ngöne la nöjei wiik. Qa ngöne lai, thatreine kö troa afenesine la itusi ngöne hi la caa macatre, ma loi e troa nyimu etid hna kuca ngöne la caa mekene la itus. Ngo eje hi laka, loi e troa kuca matre tro la hnainine a kökötre hnyawa pala hi ngöne la aqane trotrohnine angeice la nyipici, me thele troa trongëne la hnei angeice hna inin. Celë hi matre loi e troa pane etid ngöne la boroshüre Thele, nge thupene lai, troa sisedrëne hnene la itus Atrehmekun; maine hne së hë hna nyiqaane la etid ngöne la itus Atrehmekun, nge easë a öhne laka, nyipi jole kowe la hnainine troa trotrohnine la ini hna hamën, haawe, ma loi e tro kö a pane nyiqaane hmaca troa etid ngöne la boroshüre Thele, ngacama nyimutre la itre ini hne së hna ce wange hë me angeice ngöne la itus Atrehmekun. Maine ase hë së afenesine la boroshür, easë a sisedrëne jë la etid ngöne la itus Atrehmekun, me nyiqaane hmaca ngöne la pane mekene la itus. Ketre troa nyixane lai, hnene laka, angatre a hane sine la itre icasikeu, haawe, tro ha ketre ixatua ka tru koi angatre isa ala acas, itre hnainine troa cile huti ngöne la nyipici.

¹⁵ Nyipi ewekë catre fe troa sipone ngöne la thith, troa hetre etid! (1 Ioane 3:​22) Ame la ketre manathithi hna öhne hnene la keresiano, ke, ene la troa ië angeice hnei Iehova troa xatuane la ketre atr matre troa hane drei Iesu Keriso. (Ite Huliwa 20:35; 1 Kor. 3:​6-9; 1 Thes. 2:8) Ijine tro hi së la a amamane la etrune la ajane së troa thele la itre atr matre tro angatre a hane inine la Tusi Hmitrötr; nge hetrenyi the së la mejiune atraqatre laka, tro Iehova a amanathithine la trenge catre hne së hna kuca matre tro pala hi a nyiqaane la nyimu etid ngöne la götrane së!

[Hna eköhagen götran 3]

Hane kö epuni thithi matre troa nyiqaane etid memine la itre atr?