Kola Iwai Hmaca Göi Troa Inin La Tusi Hmitrötr
1. Pine nemen matre ka nyipiewekë catr la troa wange hmaca la itre atr?
1 Thaa hnei Iesu hmekuje kö hna upe la itretre drei nyidrë troa cainöj ngo tro mina fe a “inine . . . , [nge] ini angatr.” (Mat. 28:19, 20) Kola anyipicin hnene la atre cainöj, ngo tru catre kö la hna kuca hnene la atre ini. Angeic a inin, me qejepengön, me hamën la itre nyine anyipicin. Ame la ketre aqane troa inin la itre xaa atr, tre, ene la troa wange hmaca la itre atr ka hetre hni ne ajan matre troa nyiqaane etid me angatr.
2. Drei la hne së hna troa wange hmaca?
2 Drei la hne së hna troa wange hmaca? Loi e xecie hnyawa koi së troa wange hmaca la itre atr asë ka kapa la itre itusi së, maine ka amaman laka hetre hnepe ajan kowe la maca ka loi. Maine easë a cainöj ngöne la gaa tru atr, nge hetre atr ka drei së, tupathe jë troa xome la hnalapa ne lai atr maine numero ne telefone i angeic, matre troa wai angeice hmaca. Loi e troa cainöj cememin la mekun laka kola troa nyiqaane etid memine la itre atr. Catre pi së thele la itre atr ka troa ajan troa etid, nge eje hi lai laka tro hë së a öhnyi angatr.—Mat. 10:11.
3, 4. Nemen la nyine troa kuca ngöne la kola iwai hmaca?
3 Amamane Jë La Aja Së Troa Ixatua: Troa hetre thangane ka loi la easë a troa wange hmaca la itre atr, e hne së hna hnëkë hnyawa thupene lo hne së hna xötrei ithanata me angatr. Celë hi matre kola cinyihane hnyawa hnene la itretre cainöj ka kepe thangane la huliwa i angatr, la itre hna ajan hnene la itre atr, me nyitrepen hnene itre ej ngöne la kola ce ithanatan la itre xaa mekune ngöne la kola troa iwaihmaca. Itre xan a öhne la eloin la troa hnying qëmekene troa tro trije la ketre atr, matre troa ahlën la aja ne la atr ngöne la angatr a traqa troa iwai hmaca. Maine hetre hni ne ajane së troa xatuan la itre atr, eje hi lai laka tro pala pë hë së a meku angatr thupene la hne së hna tro triji angatr, nge easë mina fe a thele troa canga wai angatre hmaca. Maine ijij, thele jë troa canga bëek troa iwai hmaca e idreuthi petre kö troa sisedrën la porotrik—maine jë caas maine lue drai thupen.
4 Maine easë a iwai hmaca, thele jë troa eköth la porotrik hune lo itre mekun hne së hna ifekeun ngöne lo tro hnapan. Loi e tro sa thel troa eatrën la aja celë, ene la troa hamën la ketre mekune ka ithuecatr qa hnine la Tusi Hmitrötr e nöjei easë a iwaihmaca, nge loi e troa drei angatre hnyawa. Atre angatre hnyawa jë. Ame pala pë hë la kola wai angatr, ce thawa jë me angatr la itre trepene nyipici qa hnine la Wesi Ula i Akötresie ka ihmeku memine la itre hnei angatr hna ajan troa ithanatan.
5. Nemen la ketre aqane tro sa kuca matre hmaloi troa nyiqaane inine la Tusi Hmitrötr memine la itre atr?
5 Loi e Catre Thele Së Troa Etid Memine La Itre Atr: Loi e troa catre iwai hmaca göi troa nyiqaane etid memine la itre atr. Tune kaa la aqane troa eatrëne lai? Qaja ju ka hape easë a ajan troa ithanatan la ketre mekun ka lolo, nge fe jë la itus Atrehmekune maine thele ngöne la paragaraf hne së mekun ka troa ahlën la aja ne la atr. E jë la paragaraf, me xome la hnying, me ithanatan la caas maine lue xötr ne la Tusi Hmitrötr. Atreine hi troa kuca tune la ngöne la easë a cainöj ngöne itre hnalapa trootro, faifi koi treen lao menetr ne troa ithanata. Nyipune ju la porotrik hnene la ketre hnying thupen, nge tro pë hë a ce wange la ijine göi iwai hmaca.
6. Nemen la aqane tro sa amaman ka hape easë a trotrohnine la enyipiewekën la troa iwai hmaca?
6 Ame la troa wangatrun me thele troa xatuan la itre atr asë ka hetre hni ne ajan kowe la maca ka loi, tre, celë hi ketre götrane lai ka sisitria catr ngöne la huliwa ne cainöje së. Qa ngöne lai, loi e tro sa ami ijin ngöne la nöjei wiik troa wange hmaca la itre atr ka drei së. Maine tro sa kuca tune lai, tro ha hetre thangane ka lolo catr la huliwa së, nge troa hetre madrine së troa cainöjëne pala hi la maca ka loi.