Xatuane Jë Lo Itre Ka Hetre Hni Ne Ajan Ka Loi
1. Drei la hnei Iehova hna ea koi Nyidrëti ngöne la hnedrai së?
1 Kola mama la aliene hni thene la ketre atr, thenge la ewekë ka eje e kuhu hni angeic. (Mat. 12:35) Kola qaja hnei Tusi Hmitrötr la itre xan ka “ishi e kuhu hni [angatr].” (Sal. 55:21) Ame itre xan tre ka “hmenigöje” angatr. (Ite edomë 29:22) Ngo hetrenyi kö la ite xan “hna hnëkëne kowe la mele ka tha ase palua kö.” (Ite hu. 13:48) Ame ngöne la hneijine së, Iehova a ea koi Nyidrë la itre atr ka hetre hni ne ajan ka loi. (Hag. 2:7) Tune kaa la aqane tro sa xatua angatr troa itretre hlue Iehova?
2. Nemene la nyine troa kuca matre troa eatrëne hnyawa lo hnëqa së ene la troa inine la itre atr?
2 Nyipi Ewekë Troa Iwai Hmaca: Ka nyipi ewekë catr tro sa hetrenyi la aqane waiewekë ka loi göne la troa kuca la itre vizit matre tro sa eatrëne hnyawa la hnëqa së, ene la troa inine la itre atr. (Mat. 28:19, 20) Hapeu, easë kö a canga thele troa akökötren la aja ne la itre atr hne së hna öhne ngöne la hna cainöj? Easë kö a wange hmaca lo itre atr asë ka kapa la itre itusi së, maine ka ajane pena troa atre la maca ka loi? Easë kö a catre thele troa xatua angatr troa kökötr ngöne la götrane la ua? Pine laka hetre jëne melene hi la itre atr lai maca cili, haawe, loi e tro sa catre thele troa akökötrene la aja ne la nöjei atr asë hne së hna ithanata memin.
3. Nemene la nyine tro sa kuca thupene la hne së hna ce ithanata memine la ketre atr ngöne la hna cainöje trootro?
3 Loi e troa canga thele ijine troa cinyihan la ëje memine la hnalapa ne lai atr, wanga tro sa thëthëhmin. Cinyihane jë fe la topike hna ithanatan, memine la itre xötre hna e, memine la itus hna hamën. Thupene lai, thaa tro pi kö a thëthëhmine troa canga bëeke troa iwai hmaca.
4. Tune kaa la aqane troa kuca la itre vizit matre hetre thangane ka loi qa ngön?
4 Tune Kaa La Aqane Troa Iwai Hmaca: Ame ngöne la easë a iwai hmaca, troa hetre thangane ej e keukawahnin me madrin ngöne la aqane ithanata së memine lai atr matre troa amamane laka easë a nyipi ewekëne lai atr. Loi e tro hi a ithanatane la caa topik ne la Tusi Hmitrötr, nge troa thupën matre thaa tro kö a jole troa trotrohnin. Hnëkëne jë la ketre mekune ka lolo nyine troa ithanatan qa hnine la Tusi Hmitrötr, nge ame hë ngöne la kola nyipun la porotrik, loi e troa amejën la ketre hnying hna troa sa ngöne la kola troa iwai hmaca. Ka loi e troa neën troa lö hnine menune la itre mekun hna hamën hnene la ketre atr, ka thaa ihmeku kö memine la Tusi Hmitrötr. Thele jë troa eköthe hune la itre mekune hna ce thawa memine la itre ka drei së.—Kol. 4:6.
5. Nemene la hna catre kuca hnene la pionie, nge tune kaa la itre thangane lai?
5 Nyipici laka thaa ka hmaloi kö la troa iwai hmaca, ngo ame pe la itre thangane ka loi hna troa kapa qa ngön tre nyimutre itre ej. Hnene la ketre pionie ne Zapo hna thele troa kuca la itre iwai hmaca ka nyimutre ngöne la nöjei treu. Hnei angeic hna nyiqaan troa xome la ëje ne la itre atr hnei angeic hna ithanata memine ngöne la hna cainöj ngöne itre hnalapa trootro, nge thupene la sevene lao drai, angeice hmaca hi a wai angatre hmaca ju. Hnei angeic hna hnëkëne hnyawa la hna troa qaja, me xome la huliwa ne cainöj cememine la lapaune atraqatr kowe la maca hnei angeic hna tro fë. Hnei angeic hna nyiqaane inine la Tusi Hmitrötr memine la ketre atr ka qaja ka hape: “Hnenge pala hi hna thipetrije la kola traqa troa iwai hmaca la itre sine hmi epun. Eni petre hi la a hane drei epun.” Hetre thangane ka loi la hna catre huliwa cememine la ihnim hnene la pionie. Ame hë ngöne la pune la treu, kola e la treen lao etid i angeic.
6. Pine nemen matre nyipi ewekë tro sa catre anyimua wange hmaca la itre atr?
6 Kolo pala hi a saze la aqane mele ne la itre atr. (1 Kor. 7:31) Jole catr troa öhne la itre atr ngöne la itre hnalapa i angatr, tro pala hi a anyimua iwai hmaca. Maine tro sa catre thele hnyawa troa iwai hmaca, tro hë së a xatuan la itre atr ka hetre hni ne ajan ka loi troa trongën la gojenyi ne tro kowe la mele ka thaa ase palua kö.—Mat. 7:13, 14.