Troa Hnëkë Hnyawa—Jëne Troa Maca Ngöne La Kola Iwai Hmaca
1. Tune kaa la aqane haöthe la huliwa ne cainöje ngöne lo hneijine ne lo itre pane Keresiano?
1 Hnei Iesu hna hnëkëne hnyawa la itretre drei nyidrë matre tro angatr a maca ngöne la huliwa ne cainöjëne “la maca ka loi ne la baselaia.” (Mat. 4:23; 9:35) Hnei nyidrëti hna pane inine la itretre dreng ngöne la nyidrëti a cainöjëne la maca ka loi e Palestine. Ngo qëmekene troa elë hnengödrai eë, hnei nyidrëti hna ithuemacanyi angatr ka hape, troa haöthe la fene hnengödrai hnene la huliwa ne cainöj, uti hë la troa “inine la nöjei nöj’ asëjëihë.”—Mat. 28:19, 20.
2. Nemene la aliene la kola hape, troa drengethenge la hna ahnithe hnei Iesu, ene la troa ‘inine’ la itre atr?
2 Ame la aliene la huliwa celë, tre, ene la troa wange hmaca la itre atr ka hetre hni ne ajan kowe la maca ka loi ne la Baselaia i Akötresie me ini angatre troa trongëne la nöjei ewekë asë hnei Iesu hna ahnith. Ame la nyine tro sa kuca matre troa maca ngöne la troa iwai hmaca, tre, ene la troa hnëkë hnyawa.
3. Ame la kola xötrei iöhnyi memine la ketre atrene la hnalapa, nemene la aqane tro nyipunieti a kuca matre ijije troa iwai hmaca?
3 Hnëkë Jë: Ame la aja ne la itre xaa ka cainöj, tre, ene la troa amejëne la ketre hnying qëmekene troa nyipune la porotrike i angatr memine la ketre atr, matre isa pui me angeic troa bëeke hmaca matre troa ce ithanatane la itre mekune ka sa lo hnying. Hnei angatre hna öhne laka, ame la troa amexeje la itre mekune qa hnine la itus Ini Tusi Hmitrötr, tre, celë hi ka xatua angatr troa nyiqaane la ketre ini tus ngöne la angatr a iwai hmaca.
4. Pine nemene matre thaa ka loi kö e troa treqene troa kapa la itre zonal ka hnyipixe matre troa iwai hmaca?
4 Thaa hnene kö laka, caasi hi la pengöne ne la Tour de Garde me Réveillez-vous ! ngöne la treu matre tro hë sa treqene troa kapa la lue xaa zonal ne la treu ka troa xulu matre troa iwai hmaca. Ijiji së troa ahlëne la aja ne la itre atr troa drenge la maca ka loi jëne la hna ce ithanatane la ketre ithuemacanyi hnine la zonal hnei angatr hna kapa ha.
5. Nemene la eloine la troa hetre aja nyine troa eatrën?
5 Loi e Troa Hetre Aja Nyine Troa Eatrën: Qëmekene troa iwai hmaca, loi e troa xomi traeme matre troa wange la itre mekune hne së hna fejan göne lo itre mekune hna ithanatan memine lo itre atr, matre tro sa ahnithe amë la hne së hna ajane troa eatrën. Drei la ketre ceitun, ithanatane jë la ketre mekune qa hnine la itusi hnei nyipunieti hë hna traqa fë. Maine pena tro fë jë la ketre zonal maine itus ka ihmeku memine lo hnei nyipunieti hna ce ithanatane memine lai atr. Maine hnei nyipunieti hna amejëne la ketre hnying lo traqa hnapane nyipunie, eje hi laka ame la ewekë hnei nyipunieti hna ajan troa eatrën, tre, ene la troa sa lai hnyinge cili. Ketre, ame ngöne la easa qaja atrune la ketre xötr ka sa hnyawa lai mekune hna ce ithanatan, tre, loi e tro sa catre troa e mekötine lai hnine la Tusi Hmitrötre së.
6. Nemene la aja së ngöne la easa iwai hmaca?
6 Aja Së: Nyipici laka, ame la aja së, tre, ene la troa nyiqaane ini Tusi Hmitrötr memine la ketre atr. Ngöne la kola iwaihmaca, hna hnyingëne kowe la ketre atr hnene la ketre trejine trahmanyi maine aja i nyidrë troa ini Tusi Hmitrötr, ngo xele kö nyidrë. Hna bëeke hmaca lai trejine koi nyidrë memine la itre zonal hna nyipi kapa, me qaja ka hape, “Ame la aliene la tronge i eahuni enehila, tre, eahuni a troa sa la ketre hnyinge ne la itre atr jëne la Tusi Hmitrötr.” Thupene la hna drenge la mekuna ne la trahmany, kola e hnene lai trejin la ketre xötr qa hnine la Tusi Hmitrötr memine la paragaraf ne la ketre itus ka qaja la aliene lai xötr; ketre itusi hi hna hnëkëne thatraqane la itre ka ini Tusi Hmitrötr. Nge celë hi aqane nyiqaane angeice la ketre ini Tusi Hmitrötr.
7. Hna xatua nyipunie tune kaa troa nyiqaane la ketre ini Tusi Hmitrötr jëne la hnei nyipunieti hna hnëkë hnyawa?
7 Thaa tro pi kö a gufa la itre trenge catre me itre traeme hne së hna xome troa hnëkë hnyawa göi troa iwai hmaca. Tro ha kökötre la madrine së, nge tro fe hë sa melëne la ketre manathithi ka tru, ene la troa xatuane la “itre hni ka ajan” troa xötrëne la gojenyi kowe la mele ka thaa ase palua kö.—Ite Huliwa 13:48.