Paatr 1: Aqane Troa Eatrongëne La Itre Etid Ka Kökötr
Nemene La Aliene La Hna Hape Etid Ne La Tusi Hmitrötr?
1 Ame e cailo fen, tre, kola e la sikisi lao milio la itre ka inine la Tusi Hmitrötr memine la itre hlue i Akötresie e nöjei treu. Maine tro sa xome la aqane hamë ini ka loi, haawe, ijije hi tro sa xatuane lai itre hnainine cili troa kökötre ngöne la götrane la ua, uti hë la troa sa xepu me bapataiso, me troa hane “atreine troa ini ite xane fe.” (2 Tim. 2:2) Ajane kö epuni troa xatuane la itre ka etid me epun, troa hane kökötre ngöne la götrane la ua? Loi e troa nyiqaane memine la Huliwa Ne Baselaia celë ka amamane la itre hna cinyihan ka nyimutre, nge ka troa qejepengöne la itre götrane nyine trepene la aqane troa eatrongëne la itre etid ka kökötr.
2 Ngöne La Kola e La Ketre Etid Hnine La Rapor: Maine epuni a traqa lapaa kowe la ketre atr me ithanatane pala hi la Tusi Hmitrötr me angeic, jëne la ketre itus, ngacama xoxopatre hi, ngo epuni hi lai a etid me angeic. Ketre, maine epuni a ithanata tune lai ngöne la qene qënehlö maine ngöne telefone pena, ngo kolo hi lai a etid. Loi e troa e la ketre etid ngöne la rapor e maine hna alua kuca ha la etid thupene la hna xötrei amamane la aqane kuca kowe lai atr, nge ketre kola mama koi së laka thaa tro kö a hmaca e cili la etid.
3 Kola xome la boroshüre Thele me itus Atrehmekune matre troa inine la Tusi Hmitrötr kowe la itre atr ka nyimutre. E fenesi hë lue ej, nge kola mama laka kola kökötre trootro ngöne la ua hnene lai hnainin, memine fe la madrine kowe la hna inine hnei angeic, haawe, loi e troa sisedrëne memine la itus Adorez Dieu. Loi e troa xome la boroshüre Ijije Fe Tro Nyipunie a Ce Sinee Me Akötresie! matre troa inine la Tusi Hmitrötr memine la itre ka thaa qea ju kö hna hane ini, maine ka thatreine hnyawa kö e tus.
4 Hetre thangane ka lolo la hna inine la Tusi Hmitrötr hnene la itre atr, pine laka, hna xatua angatr itre milio, ene pe angatre hë enehila a hane itretre drei Iesu Keriso. (Mat. 28:19, 20) Maine tro nyipunie a trongëne la itre mekune nyine ixatua hna hamëne ngöne la itre hna cinyihane ka troa xulu ngöne la itre xaa Huliwa Ne Baselaia, ijije fe tro nyipunie a hane xomiujine la ketre etid ka kökötr.