Itre Etid Ka Kökötre Ngöne La Qene Qëhnelö Me Jëne Telefon
1. Nemene la aja së ngöne la easa inine la Tusi Hmitrötr me itre atr?
1 Drei la ketre madrine troa nyiqaane inine la Tusi Hmitrötre me ketre atr! Ngo, eje hi laka thaa eje hmekuje kö la troa nyiqaane la etid. Ame la aliene la etid, tre, ene la troa xatuane la atr troa ketre atre drei Keriso ka nyipici. (Mat. 28:19, 20) Nemene la ka troa xatua së troa eatrëne la mekune cili?
2. Nemene la etid ngöne la qene qënehlö, nge pine nemene matre ka hetre thangane catr?
2 Itre Atr Ka Tru Jolen: Tru catre la jolene la itre atr enehila. Ame ngöne itre xaa götran, maine jë hetre ajane la itre atr ka ala xalaithe hi troa ami ijine matre troa caa hawa ne etid. Haawe, e hetre aja së troa xatuane la itre atr cili, loi e tro sa catr nyiqaane etid me angatr me sisedrën itre ej ngöne la qene qënehlö maine jëne telefone pena. Ma thaa tro kö a qea menu pala ha la itre etid ngöne la xötrei, nge troa xome la itre xötre ka ala xalaithe hi thenge la caas maine lue paragarafe ne la itus Ini Tusi Hmitrötr hna ce wange. Drei la ketre ewekë ka lolo catr tro la itre trejin ka nyimutre a xomiujine la itre etid ka tune lai enehila ngöne la qene qënehlö, maine jëne telefone pena!
3. Pine nemene matre thaa loi kö troa xomiujine la ketre etid ngöne qene qënehlö uti hë epin?
3 Hapeu, madrine kö së e troa xomiujine pala hi la ketre etid ngöne la qene qënehlö uti hë epin? Ohea. Nyipici laka, tro sa inamacan ngöne la xötrei etid ngöne laka, thaa tro kö a xome menune pala ha la traeme ne lai atr, ngo hanawange la hna qaja hnene la Huliwa Ne Baselaia ne Mei 1990: “E cile huti hë la etid ne la ketre atr, nge kolo ha kökötre trootro la aja thei angeic, haawe, ijije hi troa nango aqeane la etid.” Ka nyipi ewekë catre lai. Hna aceitunëne lai memine la ketre nekönatr ka wezipo hnei thë xen, laka ame ngöne la xötrei kola anyimua thua nyën hnei itre hnepe göxen ka co uti hë traqa ha la hnyapa hnëxeni nyën, ngo e ajane së tro hmaca egöcatre me kökötre hnyawa hnei nyën, thaa tro jë kö nyën a xeni tune pala pë hë uti hë epin. Ketre tune mina fe, nyipi ewekë kowe la hnainin troa etid lapaa ngöne la ijine hna sa, matre tro fe angeic a ketre hlue i Akötresie ka macaj ngöne la ua.—Heb. 5:13, 14.
4. Nemene la itre manathith hna kapa qa ngöne la hna xomiujine la etid hnine la uma?
4 Itre Etid Ngöne La Itre Hnalapa: Loi e troa xomiujine la etid ngöne la ketre göhnë—ngöne la ketre hnalapa, maine ngöne la ketre hnë ka ijij. Ketre götrane lai ka troa xatuane la ka etid troa hneheen la itre hnei angeic hna inin, me trotrohnine la Wesi Ula i Akötresie. (Mat. 13:23) Loi e tro mina fe la atre ini a wange la topik nyine inin matre ihmeku memine la itre aja ne la hnainin. Ketre, maine troa nango aqean la ijin etid, tre, troa aijijëne la ka etid troa nyipiine la Wesi Ula i Akötresie me acatrene la lapaune i angeic.—Rom. 10:17.
5. Tro sa sisedrëne tune kaa la etid ngöne qene qënehlö kowe la hnuma?
5 Tune kaa la aqane tro sa kuca matre sisedrëne la etid ngöne qene qënehlö kowe la hnuma? Thupene la itre etid ka nyimutre ka thaa qea kö, hapeu matre hnyingën kowe la hnainin maine troa nango aqeane lai ijine etid? Maine pena tupathe jë troa hnyingëne lai atr ka hape, “Hapeu hetre hnepe ijine i epun troa pane lapa me ce ithanatane la mekune celë enehila?” maine pena “Aja i epuni kö troa pane nue la ketre hnepe hawa enehila troa ce ithanatane la topike celë?” Maine thaa ie kö la itre hnei epuni hna kuca, sisedrëne jë kö la itre etid ka thaa qea kö, ngöne la qene qënehlö. Ame ngöne ketre ijine ka ijij, tupathe hmaca jë matre troa sisedrëne la etid hnine la hnalapa.
6. Nemene la aliene la huliwa ne cainöje së, nge troa xatua së tune kaa hnene la hna cinyihane celë matre troa eatrëne la aja cili?
6 Ame la easa thele la itre atr ka hetre hni ne ajan, tro sa lapa mekune laka ame la aja së, tre, ene la troa nyiqaane inine la Tusi Hmitrötr me itre atr me xomiujine itre ej. Pane ewekë hne së hna thel, ene la troa xatuan la itre atr ka hetre hni ka meköt matre tro angatr a nue la mele i angatr koi Iehova me troa itre hlue i Nyidrë hna bapataison. Epi tro Nyidrëti a amanathithine la itre aqane catre thele së troa eatrëne la aja së celë ngöne la easa cainöj.—2 Tim. 4:5.