Itre He Ne Fami, The Nuetrije Kö La Itre Hna Majemin Ngöne La Götrane La Ua
1 Ngacama nyimutre la itre macatre ne mele Daniela e nyipin la kuci idrola, me kuci huliwa ka sis hnei Babulona, ngo hna hlemu loi pala hi hnei angeic, pine laka, ketre atr ka nyihlue i Iehova “o drai.” (Dan. 6:16, 20) Tune kaa la aqane catre angeic ngöne la götrane la ua? Kola amaman hnei Tusi Hmitrötr laka, hnei angeic pala hi hna eatrëne hnyawa la itre huliwa ne la nyipi hmi. Hanawang la ketre ceitun, hnei angeic hna majemin troa akönia thith ngöne la drai, e hun la hnahag ka draië ne la uma i angeic. (Dan. 6:10) Kola mama hnyawa fe laka, hnei angeic hna ami trepene hnyawa fe la itre xaa huliwa ngöne la götrane la ua, tune la troa e la Trenge Wathebo. Qa ngöne lai, ame la kola traqa lo itre itupath ka ajolën la mele i angeic, hnei Daniela pala hi hna fedre catr koi Iehova, nge hna amele angeic jën la ketre iamamanyikeu.—Dan. 6:4-22.
2 Tune mina fe enehila, loi e tro së a isa thel troa “hmekën kowe lai hnene la ielen’ asë.” (Efe. 6:18) Ame la fen hne së hna mele ngön, tre ej a “meköle thene la atre ka ngazo.” (1 Ioane 5:19) Atreine hi asesëkötrë së hnene la ketre icilekeu, maine itre itupathi pena, ene pe troa tupath la lapaune së. Ngöne la akötr atraqatr, troa ujë hnei Gog ne Magog kowe la itre hlue i Akötresie, nge kösë ame ngöne la ijine cili, maine jë troa mama, ka hape, pëkö jëne troa kötr hnei angatr. Qa ngöne lai, nyipi ewekë catr troa pexej la lapaune së koi Iehova.—Eze. 38:14-16.
3 “Ame la ketre mekune kii, tre, ene la troa e pala hi la Tusi Hmitrötr hnene la fami, me ini, me ithanatan la itre aqane troa mel.” Celë hi hnëewekë ka nyiqaan la daram ne la kovasio ne distrik 1998, hna hape, “Itre Hnepe Lapa—Loi e Mele i Nyipunie La Troa e Ngöne La Nöjei Drai La Tusi Hmitrötr!” Kola sisedrën ka hape: “Ame ngöne la kola xötrethenge pala hi hnene la itre fami la porogarame cili, nge angatr a kuca matre troa madrin troa inin la Tusi Hmitrötr, haawe, kolo mina fe a atraqatr la thangane lai ewekë hna kuca lapaan kowe la hnepe lapa. Eje a akökötren la atrehmekune së. Ej a acatren la lapaune së. Nge eje fe a hamën koi së la itre tulu ne atr ka xome hnyawa la itre hnëqa i angatr, ene lo itre trahmanyi me föe ekö ka catre lapaun koi Iehova; hetre thangan la mele i angatr koi së, nge kolo fe a upi së troa cilëgölin la nyipici.” Pine laka easë a troa ce wang la itre götran ka nyimu pengön hna majemin kuca ngöne la götrane la ua, haawe, loi e troa thel hnene la itre hene fami, la caas maine lue aqane troa kuca matre troa hetre eloin la porogaram ne la hnepe lapa ngöne la götrane la ua.
4 Wangatrune Jë La Wesi Ula i Akötresie o Drai: “Ame ngöne la kola troa musi la Baselaia i Akötresie, nge pëhë ka icilekeu, nge kolo fe hë a troa eatr la aja i Akötresie e celë fen tun e koho hnengödrai, pëkö atr ka ngazo, nge ketre pëkö öni ka troa ‘kuca la ngazo, maine troa iakötrë.’ (Is. 11:9; Mat. 6:9, 10)” Itre hnëewekë la ka mama hnine la trekes, Examinons les Écritures chaque jour—2001 ngöne la itre mekun hna hamën hmekune la drai 11 Semitrepa. Drei la ekeukawan la itre mekune cili! Maine epuni la hene la fami, hapeu, hnei epuni kö hna majemin hane ce wange memine la hnepe lapa i epun, ngöne la nöjei drai, la topik ne la drai? Hetre thangane catr la aqane huliwa cili. Maine thaa ijije kö troa ce kuca la topik e hmakany, maine jë tro pena a kuca ngöne la ketre hawa ne la drai. Hna qaja hnene la ketre kem, ka hape: “Ka lolo catr la ijine xeni hej koi hun, troa ce ithanatan la topik ne la drai.”
5 Maine hetre hnei epuni hë hna majemine kuca memine la fami göi topik ne la drai, haawe, ka lolo catre lai. Maine jë ijije fe tro nyipunie a hane e la ketre hnepe götrane la Tusi Hmitrötr ngöne la ijine cili. Ame itre xan, hnei angatr hna majemin troa e asë la meken, hna xome qa ngöne lai xötr me topik ne la drai. Ame itre xan, angatr a e wengën la itre itus ne la Tusi Hmitrötr hnei angatr hna iën troa e. Maine tro epuni a e pala hi ngöne la nöjei drai la Tusi Hmitrötr, eje hi lai, laka, tro ha xatuan la hnepe lapa i epun troa akökötren thei angatr la xoue troa akötrën la hni Iehova, nge ketre, troa acatrene hnyawa la aja i angatr troa kuca la aja i Nyidrë.—Deu. 17:18-20.
6 Ketre troa hetre thangane catr la epuni a ce e la Tusi Hmitrötr memine la fami, me ce wang la topik ne la drai, e hnei epuni hna xom la itre hnepe menetr matre troa ithanatan la itre ithuemacany hna hamën, nyine loi kowe la mele së. Kola hamën mina fe hnene la itus École du minisère, götrane 60, la mekune celë, hna hape: “Atreine hi tro nyipunie a . . . iën la itre xaa xötr qa ngöne la itre meken ne la Tusi Hmitrötr hnei epuni hna e ngöne la wiik, me ce ithanatan la aliene itre ej, nge thupene lai, epuni a hnying, ka hape: ‘Nemen la eamo hna hamëne koi së? Nemen la aqane troa xom la itre xötre celë kowe la hna cainöje trootro? Nemen la aqane amamane itre ej la pengö i Iehova memine la aqane huliwa i Nyidrë, nge tune kaa la aqane tro lai a akökötrene la madrine së koi Nyidrë?’ ” Tro la itre ewekë celë hne së hna ce ithanatan, a xatua së asë hnine la itre hnalapa së, troa “trotrohnine la aja i Iehova.”—Efe. 5:17.
7 Ini e Hnine La Fami: Maine hna kuca pala hi la etid ne la hnepe lapa ngöne la nöjei wiik, celë hi ketre ewekë lai ka lolo catr kowe la itre hene fami troa amamane hnyawa kowe la itre nekönatr, ka hape, kola amë panën pala hi hnei angatr la itre ewekë ngöne la götrane la ua. Kola qaja hnene la ketre nekö trahmany, ka hape: “Ame ngöne la itre xaa ijin, tre, kucakuca catre kaka qa hna huliwa, matre pi meköle catre nyidrë, ngo thaa hnei nyidrëti kö hna nuetrije la ini tus, haawe, celë hi ka xatua huni lai troa trotrohnine hnyawa la ehmitrötren la huliwa cili.” Ijije mina fe tro la itre nekönatr a hane ixatua ngöne la götrane cili, matre troa hetre thangane ka loi la hna amekötine cili. Hna hlë pala hi hnene la ketre fami ka naene lao nekönatr, e 5 ör troa etid ne la hnepe lapa, pine laka, thaa ijije kö ngöne la itre xaa hawa ne la drai.
8 Maine kola ajan hnene la hene fami troa tro loi la etid ne la hnepe lapa i angeic, loi e tro angeic a ‘wai angeic memine la aqane ini.’ (1 Tim. 4:16) Kola qaja hnene la itus, École du ministère, götrane 32, ka hape: “Maine jë tro qaja hnyawa ka hape, troa hetre eloin la etid ne la ketre fami, e hna nyiqaan troa pane wangatrun la itre hna ajan hnene la sipu hnepe lapa së. Hapeu kökötre kö la itre atrene la fami, ngöne la götrane la ua? . . . Ame ngöne la epuni a ce cainöj memine la itre nekö i epun, hapeu thaa cile hnö kö angatr troa qaja mekötin kowe la itre sine ce elo i angatr, ka hape, Temoë i Iehova angatr? Madrine kö angatr la porogaram ne e Tusi Hmitröt, me etid ne la fami i epun? Hane kö angatr amaman hnyawa ngöne la mele i angatr, laka, angatr a trongën la itre jë i Iehova? Maine tro la hene fami a goeëne hnyawa la itre aqane ujë cili, atreine hi tro angeic a eköth me akökötrene hnyawa thene la itre atren la hnepe lapa i angeic, la itre thiina ka lolo ngöne la götrane la ua.”
9 Itre Icasikeu Ne La Ekalesia: Loi e troa ketre götrane ka sisitria ne la porogaram ne la wiike së, la tro sa hnëkën la itre icasikeu ne la ekalesia me hane sin itre ej. (Heb. 10:24, 25) Ame ngöne la itre xaa ijin, maine jë itre xa icasikeu hi hna atreine troa ce hnëkën hnene la fami. Thaa tro kö a treqen la ijine kola icasikeu, ngo tune kaa matre canga hnëkë pe? Maine aqane huliwa së hi lai, tro ha lolo la aqane tro sa hnëkë, nge nyimutre la itre thangan ka lolo hne së hna troa kapa qa ngöne la itre icasikeu.—Ite edomë 21:5.
10 Troa mama la eloin la ketre porogaram ngöne la götran la ua, qa ngöne laka hetre thangan ka lolo, nge hna catr kuca lapaan. Nemen la nyine kuca e ajolë së jë troa hnëkën asë la itre icasikeu? Hanawang la ketre mekun hna hamën hnene la itus École du ministère, götrane 31, kola hape: “The tro kö a mekun ka hape, e ase hë e asë, ke eje hë lai, maine pena, thaa tro kö a hane hnëkë, pine laka pëkö ijin. Ohea, tupathe jë pe troa wangatrehmekune la itre götrane mekun ka ijije troa wang, nge thele mekune jë ngön. Kuca jë tune lai ngöne la nöjei wiik. Thupene lai, epuni a thele troa hane hnëkëne fe la itre xaa icasikeu.”
11 Ketre ixatua ka tru la kola canga traqa hnene la itre fami ngöne la hna icasikeu, ngöne laka, kola aijijë angatr troa hnëkën la itre mekun matre troa atrunyi Iehova, me hane kepe thangane la ini hna troa hamën. Hapeu, hna majemine tune lai hnene la fami i epun? Troa traqa kowe lai, e hna ami trepene hnyawa la itre nyine troa kuca, me ce thele asë hnene la itre atren la hnepe lapa, troa eatrëne lai. Maine epuni a öhne laka, kola nyinyape la fami epun, nge nango jole la itre mekune ngöne la kola icasikeu e hejihej, tune kaa matre saze la itre xaa aqane troa trongën la porogarame i epun? Hapeu, hetrenyi jë kö la itre xaa ewekë nyine troa canga kuca? Maine tru catr la itre jol hna troa kuca hnene la ketre atren la hnepe lapa, hapeu, ijije kö troa ixatua hnene la itre xan? Hapeu, tro kö lai a hane nango acon la jol, e ka hnëkë asë hi la itre atren la fami troa tro me traqa itre hnepe menetr qëmeken troa icasikeu? Maine troa hnëkë hnyawa, eje hi lai laka, tro hetre hni ne tingeting e hnine la hnepe lapa, me hnine fe la ekalesia.—1 Kor. 14:33, 40.
12 Cainöje Trootro: Ame la ketre porogaram nyine troa eköthe hnyawa, matre troa lolo la mel ngöne la götrane la ua, tre ene la troa hane cainöj. Hna qaja hnei Jazon, ketre nekö trahmanyi ka hape: “Ame kowe la fami hun, ame la hmakanyi ne mecixen, drai ne tro huni lai a cainöje trootro. Ka lolo catr koi ni, pine laka, eni a catre troa cainöje trootro, nge eni fe a öhne la eloin la huliwa cili kowe la meleng, nge ketre atraqatre mina fe la madrineng.” Nyimutre la itre xaa atr hna hian ngöne la nyipici, ka hane anyipicin la mekune cili, ene laka, qa ngöne la hnei angatr hna amë me eköth la ketre ijin troa cainöj ngöne la nöjei wiik, haawe, kola xatua angatr troa itre hlue Keresiano ka kökötr ngöne la huliwa cili.
13 Ketre ixatua ka tru mina fe kowe la fami troa eköthe hnyawa la ketre porogaram, matre ame la ijin hna xom hnene la fami i epun troa hane cainöje trootro, ke troa ketre ijin ka hamë madrin nge ka troa hetre thangane ka loi kowe la itre atren. Troa eatrëne tune kaa lai? Hna qaja hnene la zonal, La Tour de Garde ne 1 Julai 1999, götrane 21 ka hape: “Hapeu, hnei epuni kö hna hane ami ijin ngöne la epuni a ini tusi ne la fami, matre xatuan la itre atren la hnepe lapa troa hnëkë troa cainöj ngöne la wiik? Ka hetre thangan ka loi la aqane huliwa cili. (2 Timoteo 2:15) Ej a xatua angatr troa hane catre cainöj, me thel troa hetre thangan la huliwa cili. Ijije hi troa pane xome la ketre ijine etid, matre troa ce hnëkëne lai. Ame itre xaa ijin, loi e troa hane ithanatan la itre xaa götran ne la huliwa ne cainöj, ngöne la kola nyipun la etid ne la fami, thaa tro pe a aqean, maine ngöne pena la ketre ijin ne la wiik.” Hane kö thel troa kuca tune lai hnene la fami i epun?
14 Loi e Troa Kökötr Ngöne La Götrane La Ua: Haawe, hane kö epuni öhne la itre götrane huliwa, hna kuca hnyawa hnene la hnepe lapa i epun? Qaja aloine jë la itre atrene fami i epun, me ithuecatr koi angatr troa catr huliwa tune pala hi lai. Maine epuni a öhne laka, nyimutre la itre götran ka nyipiewekë troa huliwan hnyawa, iëne jë la caas maine luetre, matre troa pane nyiqaan ce wang. Ame hë la kola mama laka, itre eje hë a hna eköthe hnyawa ngöne la porogarame i epun, haawe, wange jë fe la caas maine lue xan matre troa nyixan trongën. Loi e troa wanga aloin la itre ewekë, nge troa atreine tulu ewekë. (Fil. 4:4, 5) Eje hi laka thaa ewekë ka hmaloi kö la troa eköth la ketre porogaram ka lolo thatraqane la fami i epun, ngo ame pe hetre manathith hna troa kapa qa ngön, ke kola qaja xeciën koi së hnei Iehova ka hape: “Tro ni a amamane la iamele i Akötesie kowe la ate hnëkëne la jë i angeic.”—Sal. 50:23.