Ixatua Thatraqane La Itre Hnepe Lapa
1. Troa kepe thangane tune kaa hnene la itre lapa ne Isaraela, qa ngöne la hna atrune la Sabath ngöne la nöjei wiik?
1 Hnei Iehova hna amekötine ekö kowe la itre hnepe lapa troa atrune la Sabath, ke, nyine loi koi angatr. Kola mano hnei angetre Isaraela qa ngöne la itre huliwa hnei angatre hna kuca o drai, me xomi ijine matre troa sine thele la thiina ka lolo i Iehova, me aqane imelekeu i angatr me Nyidrë. Ketre, itre keme me thin a xome la ijine cili, matre troa inine me amë e kuhu hni ne la itre nekö i angatr la Trenge Wathebo. (Deu. 6:6, 7) Ame la Sabath, tre, eje a hamë ijine kowe la nöje i Iehova troa acatrene hnyawa ngöne la nöjei wiik, la aqane imelekeu i angatr me Iehova.
2. Nemene la hna ini së göi Iehova hnene la Sabath?
2 Eje hi laka, thaa Iehova kö a upe la itre hnepe lapa enehila troa atrune la Sabath. Ngo kolo pe a ini së hnene la wathebo cili la ketre ewekë göne la Akötresie së. Hnei Nyidrëti pala hi hna hnehengazone la mele ne la nöje i Nyidrë ngöne la götrane la ua. (Is. 48:17, 18) Ame enehila, Iehova a amamane la ihnimi cili, jëne la heji ne Hmi ne la Hnepe Lapa.
3. Nemene la kepin matre kola eköthe la heji ne la Hmi Ne La Hnepe Lapa?
3 Nemene La Kepin Matre Kola Eköthe La Heji Ne La Hmi Ne La Hnepe Lapa? Ame lo Januare 2009, hna nyiqaane eköthe lo Ini Tusi Ne La Ekalesia ngöne lo heji ne kola kuca la Ini Ne Cainöj Qaathei Akötresie me Icasikeu Ne La Huliwa. Ame la ketre kepin matre kola saze la ewekë cili, tre, nyine troa aijijëne la itre hnepe lapa troa acatrene la aqane imelekeu i angatr me Iehova, hnene la hna sa la ketre drai thatraqane la hmi ne la hnepe lapa. Hna ithuecatre kowe la itre hnepe lapa troa xome la ini tusi angatr, me eköth ej ngöne lo lai drai hna sa ekö, thatraqane la ini tusi ne la ekalesia; celë hi lai ketre ijin ka sisitria matre troa ithanatane la itre mekun qa hnine la Tusi Hmitrötr, me inine la itre topik ka troa xatuane la hnepe lapa.
4. Hapeu, tro kö a eköthe la hmi ne la hnepe lapa ngöne la ca hawa hi? Qeje pengöne jë.
4 Nyipici laka ame la troa sine ekö lo Ini Tusi Ne La Ekalesia, tre, nyimutre la itre hawa hne së hna xom troa heetr, me xomi loto maine kar, me itre xaa ewekë ju kö. Ala nyimu the së la ka xome la itre hawa ka nyimutre, matre troa hnëkë troa sine la ca hawa hi ne icasikeu. Ngo pine laka saze hë la porogarame ne icasikeu së, haawe, easë hë enehila a xome la heji cili, matre troa hmi koi Iehova cememine la fami së. Ngo thaa tro pi kö sa eköthe la Hmi Ne La Hnepe Lapa së ngöne la ca hawa hi. Loi pe tro sa mekune hnyawa la itre aja, me itre ifego ka eje thene la hnepe lapa së, me ce axeciëne la etrune la traeme hna troa xome thatraqane la Hmi Ne La Hnepe Lapa së.
5. Hapeu, tro kö a xome la heji ka pexej matre troa ce ithanatane la itre mekun memine la hnepe lapa? Qeje pengöne jë.
5 Hapeu, Tro Kö a Xome La Heji Ka Pexej Matre Troa Ce Ithanatane La Itre Mekun Memine La Hnepe Lapa? Ame la kola ce ithanatane la itre mekun qa hnine la Tusi Hmitrötr hnene la itre trefën, me itre lapa ka ca hae, tre, angatre a thele troa ithuecatrekeu. (Rom. 1:12) Kola acatrene hnyawa la aqane imelekeu e hnine la fami. Haawe, loi e troa mama ngöne la heji ne Hmi Ne La Hnepe Lapa, laka sisitria catre kö la itre mekun hna ithawakeun qa hnine la Tusi Hmitrötr. Ngo loi e tro mina fe la itre atrene la hnepe lapa, angatr isa ala cas, a isa xomi ijine troa ketre sipu ini tus. Drei la ketre ceitun, thupene la hna ce ithanatane la itre mekun memine la hnepe lapa, maine jë tro la itre xan a nango lapa pe; itre xan a isa sipu ini tus, maine jë angatr a afenesine la itre hnei angatre hna hnëkën thatraqane la itre icasikeu, nge itre xan pena a e la itre zonal. Hetrenyi la itre xaa hnepe lapa ka axeciëne troa apine la televizio ngöne la heji ka pexej ne angatr a hmi.
6. Troa xomiujine tune kaa la porotrik?
6 Troa Xomiujine Tune Kaa La Porotrik? Thaa nyipi ewekë kö troa xomiujine la icasikeu cili ceitune me ketre taan hna ce ithahnatan, ene laka troa hnying me sa. Nyimutre la itre fami ka eköthe la ketre porogaram ka tune lo porogaram ne la icasikeu së, ene la Ini Ne Cainöj Qaathei Akötresie memine la Icasikeu Ne La Huliwa, matre troa lolo me hetre emelen la heji ne angatr a kuca la Hmi Ne La Hnepe Lapa. Angatr a thawa nyimutrene la itre taane porotrik, nge ketre, nyimu aqane xomiujine angatre la itre götrane cili. Drei la ketre ceitun, maine jë tro angatr a ce e la Tusi Hmitrötr, me ce hnëkëne la itre xaa hnepe götrane ne la itre icasikeu, me iamacanyine la itre xaa aqane troa cainöj. Kola hamëne la itre xaa mekune nyine ixatua ngöne la götrane 6.
7. Nemene la nyine troa kuca hnene la itre keme me thin matre troa hetre thangane ka lolo me keukawa la porotrike i angatr?
7 Nemene La Nyine Troa Kuca Hnene La Itre Keme Me Thin Matre Troa Hetre Thangane Ka Lolo Me Keukawa La Porotrike i Angatr? Tro ha xomi ini hnyawa hnene la fami nyipunie, e lolo me keukawa la aqane porotrike i nyipunie. Maine jë ame e itre xaa ijin, ijije hi tro epuni a ini tus e kuhu qëhnelö, e loi drai. Maine ijije hi, pane nango mano ju. The tro kö a hnö troa iji ka lepany ngöne la ijine cili. Thaa tro kö la itre keme me thin a eköthe la heji ne la Hmi Ne La Hnepe Lapa, matre troa wesitrën maine hajine la itre nekönatr; ngo loi pe, tro angatr a ce wange ngöne la ijine cili la itre xaa aqane ujë ka ngazo maine jole pena ka eje thei nyudren. Ngo eje hi laka, maine kola troa ithanatane la itre jole ka tru ka eje thene la ketre nekönatr, haawe, loi e troa ce ithanatane me nyën hmekuj, matre thaa tro kö a ahmahmanyi nyën qëmekene la itre xaa trejine me nyën. Loi e tro la heji ne la Hmi Ne La Hnepe Lapa së a ketre ijine madrin, me amamane laka, ame la Akötresie hne së hna thili kow, tre, ka madrine Nyidrë.—1 Tim. 1:11.
8, 9. Nemene la aqane troa hnëkë hnene la itre he ne fami?
8 Troa Hnëkë Tune Kaa Hnene La He ne La Fami? Tro ha kepe thangane ka loi hnene la fami, e hna canga hnëkëne hnyawa la Hmi Ne La Hnepe Lapa hnene la he ne la fami; ene la tro nyidrëti a canga axeciëne la mekune nyine troa ce ithanatan, memine la aqane troa ithanatane lai. (Ite edomë 21:5) Ame ngöne la götrane cili, loi e tro la trahmanyi a ce wange memine la föi angeic. (Ite edomë 15:22) Hapeue nyipunie itre he ne fami, tune kaa matre troa hnyingëne e itre xaa ijin la mekuna ne la itre nekö i nyipunie? Maine tro nyipunieti a ujë tune lai, tro hë nyipunie a wanga atrehmekune la itre aja memine la itre ewekë hnei nyudreni hna hnehengazon.
9 Thaa nyipi ewekë kö tro la he ne fami a xome la itre hawa ka nyimutre matre troa hnëkë. Eje hi laka, tro ha madrine la hnepe lapa troa kuca la ketre ewekë e nöjei wiik, tune la troa e la Tusi Hmitrötr; haawe, thaa nyipi ewekë kö troa eköthe hnene la he ne la fami, la ketre porogaram ka hnyipixe ngöne la nöjei wiik. Maine jë loi e tro angeic a hnëkë e thupene la hna kuca la hmi ne la hnepe lapa, ke, eje pala kö ngöne la mekuna i angeic la itre aja ka eje thene la hnepe lapa i angeic. Kola eköthe amë hnene la itre xaa he ne fami la itre mekun hna troa ce ithanatane ngöne la wiike ka troa xulu, me afedrene lai pepa ngöne la ketre götrane ka mama hnyawa kowe la nöjei atrene la fami. Kolo lai a akökötrene la aja thene la fami, me upi angatre troa canga hnëkë.
10. Tro la itre atr ka mele cas a eköthe tune kaa la heji ne la Hmi Ne La Hnepe Lapa i angatr?
10 Nemene La Nyine Tro Ni a Kuca, e Eni Casi Hi? Ame la itre trejine ka mele cas, tre, ijije hi tro angatr a eköthe la heji ne Hmi Ne La Hnepe Lapa, matre troa ketre sipu inine la Tusi Hmitrötr. Eje fe e hnine la porogarame ne sipu ini tus, la itre huliwa celë, ene la troa e la Tusi Hmitrötr me hnëkëne la itre icasikeu, me e la itre zonal La Tour de Garde me Réveillez-vous ! Hetrenyi la itre trejine ka eatrëne lai, ngo angatre fe a ami ijine troa sipu inine la Tusi Hmitrötr. Ame e itre xaa ijin, angatr a könën la ketre trejine maine ketre fami pena, matre troa hane ce ithanatane la itre mekune ka ixatua qa hnine la Tusi Hmitrötr.
11, 12. Nemene la itre xaa manathithi hna kapa qa ngöne la hna kuca lapaane la heji ne la Hmi Ne La Hnepe Lapa?
11 Nemene La Itre Manathithi Hna Kapa Qa Ngöne La Hna Kuca Lapane La Heji Ne La Hmi Ne La Hnepe Lapa? Kola easenyi catre koi Iehova hnene la itre atr ka hni ka pexej nge ka catre xome la nyipi hmi. Ketre, kola catre hnyawa la aqane imelekeu ne la itre hnepe lapa ka casi ngöne la hmi. Hanawange la hna cinyihane hnene la lue trefën göne la itre manathithi hnei nyidro hna kapa, kola hape: “Hnene laka lue pionie nyiho ka pëkö nekönatr, ene pe eje thei nyiho la aja atraqatr troa sine la heji ne Hmi Ne La Hnepe Lapa i nyiho. Drenge fe hi nyiho laka, catre hnyawa la aqane imelekeu i nyiho e hnine la faipoipo, nge ketre catre mina fe la aqane imelekeu i nyiho memine la Tretretro i nyiho e koho hnengödrai. Ame hë enehila, ame la nyiho a hlë e hmakanyi ngöne la drai ne troa ce inine la Tusi Hmitrötr, tre, nyiho a isa qajakeun, ka hape: ‘Nemene la hna troa kuca e drae hej? Kolo heji ne la Hmi Ne La Hnepe Lapa!’ ”
12 Ame la hna amekötine troa eköthe la ketre heji thatraqane la hmi ne la hnepe lapa, tre, celë mina fe la ketre ixatua kowe la itre hnepe lapa ka nyimu jolen. Hnene la ketre thine ka hiane casine la lue nekö i eahlo trahmany me ka pionie lapa, hna cinyihane ka hape: “Ame ekö, ka jole hnyawa la ini tusi hun e hnine la hnepe lapa. Thaa hna kuca lapaane kö la ini cili nge pëkö thangane ej, pine laka eni pala hi a kucakuca. Thatre hnyawa kö ni ekö la aqane troa kuca la nöjei ewekë asë. Celë hi kepin matre eni a olene atrune koi nyipunie göne la hna amekötine celë, ene la heji ne la Hmi Ne La Hnepe Lapa. Hna kuca lapaane hë enehila la hmi ne la hnepe lapa hun, nge nyimutre la itre manathithi hne huni hna kapa qa ngön.”
13. Nemene la hna troa kapa hnene la hnepe lapa së, e hne së hna trongëne hnyawa la hna amekötine cili?
13 Tune la Sabath, ame la heji ne la Hmi Ne La Hnepe Lapa, tre, celë hi ketre ahnahna qaathene la Tretretro së e koho hnengödrai ka troa xatuane la itre fami. (Iako. 1:17) Kola kapa hnene la itre fami ne Isaraela la itre manathith thenge la aqane xome angatr la Sabath. Ketre tune mina fe, tro la hnepe lapa së a kapa la itre manathithi ngöne la götrane la ua, e hne së hna xome hnyawa la heji hna amë thatraqane la hmi ne la hnepe lapa së. (2 Kor. 9:6; Gal. 6:7, 8; Kol. 3:23, 24) Maine tro sa trongëne hnyawa la hna amekötine celë, tro hë la itre atrene la hnepe lapa së a qaja tune la atre cinyihane la salamo, ka hape: “Ngo ame ni, loi koi ni troa eashenyi Akötesie; ase hë ni lapaune koi Joxu Iehova.”—Sal. 73:28.
[Hna cinyhan ne la götran 5]
Loi e tro la heji ne la Hmi Ne La Hnepe Lapa së a ketre ijine madrin, me amamane laka, ame la Akötresie hne së hna thili kow, tre, ka madrine Nyidrë
[Hna eköhagen götran 6]
TROA AMË HNYAWA
Itre Xaa Mekun Thatraqane La Heji Ne La Hmi Ne La Hnepe Lapa
Tusi Hmitrötr:
• Ce e jë nyipunie la itre xaa xötr ne la Tusi Hmitrötr hna troa e ngöne la wiik. Maine kolo itre edromë, haawe, ijije hi tro la ketre a e la itre mekun ka qeje pengöne la edromë, nge itre xane pë hë a e la trenge ewekë ne la itre atr ne la edromë cili.
• Elone jë la itre xaa xötr ne la Tusi Hmitrötr hna e.
• Isa thawa ju kowe la itre atrene la fami la itre mekene tusi nyine tro angatr a e, me cinyanyine la cas maine lue hnying ka ihmeku memine la itre mekune hnei angeice hna e. Thupene lai, ce thele jë nyipunieti asë troa sa la itre hnyinge cili.
• Ame ngöne la nöjei wiik, hnëkëne jë la ca pepa nge fejane jë la ca xötr, nge thele jë troa e gufan me qeje pengöne ej. Ce xawane jë la itre pepa cili, nge ame ngöne la nöjei wiik, wange ju ka hape, ijetre la itre xötr hnei nyipunieti hna atreine e gufan.
• Drenge ju ngöne ikaho la kola e la Tusi Hmitrötr, nge ketre sipu goeëne ju lai hnine la Tusi Hmitrötre i nyipunie.
Itre Icasikeu:
• Ce hnëkëne jë nyipunie la itre xaa igötranene la icasikeu.
• Ce nyimane jë lo itre nyima ne Baselaia hna iën thatraqane la wiike ka troa xulu.
• Maine kola troa cile fë la ketre cainöj ngöne lo Ini Ne Cainöj Qaathei Akötresie, maine ketre iamacany pena ngöne lo Icasikeu Ne La Huliwa, ce ithanatane jë nyipunie la itre mekun hna troa hamën, maine elone jë itre ej qëmekene la fami.
Itre Aja Ka Eje Thene La Fami:
• Ce ithanatane jë la itre mekun qa hnine la itre itus Les jeunes s’interrogent maine Écoute le grand Enseignant.
• Elone jë la ketre jol ka eje ngöne la hna ini.
• Saze jë la itre hnëqa. Tro pena la itre nekönatr a iëne la ketre topik, nge thupene lai angatr a ce ithanatan me thele la mekuna i keme me thin.
Huliwa Ne Cainöj:
• Iamacanyine jë la itre aqane nyiqaane ithanata thatraqane la mecixen me sabath.
• Ce ithanatane jë la itre aja nyine troa eatrëne hnene la fami göi troa akökötrene la huliwa ne cainöj ngöne la hneijine ne la Drai Ne Amekunën, maine itre ijine mano pena.
• Nue pi kowe la nöjei atrene la fami la itre hnepe menetr, matre troa thele la aqane troa sa kowe la itre hnying hna amejën ngöne la hna cainöj, nge thupene lai kuca jë la itre iamacany.
Itre Xaa Mekune Nyine Ixatua:
• Ce e jë la ketre hna cinyihan qa hnine la itre zonal ka xötrei traqa.
• Sipone jë kowe la ketre atrene la fami troa nyiqaane e la ketre hna cinyihan ka ketri angeic, me qeje pengöne ej.
• Ame e itre xaa ijin, hëne jë la ketre atre cainöj maine lue trefëne pena, matre troa hane sine la heji ne la Hmi Ne La Hnepe Lapa i nyipunie, nge sipo angatre jë troa qaja la itre xaa hna melën ngöne la huliwa ne cainöj, maine pena la aqane atre angatre la nyipici.
• Ce goeëne jë me ce ithanatane la ketre video së.
• Ce ithanatane jë la itre hna cinyihane celë qa hnine la Réveillez-vous !, hna hape, “Les jeunes s’interrogent” maine “Apprenons en famille.”
• Ce ithanatane jë la itre hna cinyihane celë qa hnine La Tour de Garde, hna hape, “Enseignez vos enfants” maine “Pour nos jeunes lecteurs.”
• Ce e jë me ithanatane la ketre hnepe götrane ne la Annuaire ka hnyipixe, maine pena la ketre itusi hna kapa ngöne lo asabele ne distrik ka ase hë.
• Ce wange jë la itre mekune ka tru, thupene la hna sine la ketre kovasio maine asabele.
• Pane goeëne ju la ketre ewekë hna xupe hnei Iehova, nge ce ithanatane jë la hnene ej hna ini së göi Iehova.
• Ce kuca jë la ketre huliwa nyine troa ce eatrën, tune la troa kuca la ketre tulu ne uma maine ketre ewekë pena, maine ketre map.