Jëne Mele La Troa Inine La Tusi Hmitrötr, Easë Isa Ala Caas, Me e Hnine Fe La Hnepe Lapa!
1. Nemene la aja ka sisitria ne la Lapa Ne Xomi Meköt koi së ngöne la ijine celë, nge pine nemene lai?
1 Tune ngöne lo hneijine i Iesu, atraqatre la aja ne la Lapa Ne Xomi Meköt troa thupëne hnyawa la mele ne la itre hlue i Iehova. (Ite Hu. 15:6, 28) Ngöne laka calemi catre hë la akötre atraqatr, haawe, nyipi ewekë catre kowe la itretre cainöjëne la Baselaia troa acatrene la imelekeu i angatre me Iehova. Tune kaa la aqane tro nyipunieti a huliwane lo hawa hna hnëkëne kowe ekö lo Ini Tusi Ne La Ekalesia? Kola ithuecatre koi së asë troa xome la hawa cili matre troa ce thili koi Akötresie hnene la hnepe lapa. Maine easa huliwane hnyawa la hawa cili cememine la inamacan, haawe, tro ha aijijë së troa sine thele pala hi la Wesi Ula i Akötresie, me kapa la itre manathithi qa ngöne la itre ini Nyidrë.—Sal. 1:1-3; Rom. 11:33, 34.
2. Tune kaa la aqane tro sa hnëkëne la aqane hmi së isa ala caas e hnine la hnepe lapa?
2 Heji Ne Ini Tusi Cememine La Hnepe Lapa: Ame la itre hene ne la hnepe lapa, tre, hetre hnëqa i angatre xajawa i Iehova, ene la troa thupëne hnyawa matre hna kuca pala hi la porogaram ne ini Tusi Hmitrötr e hnin la fami. (Deu. 6:6, 7) Ame la itre trejin, trahmanyi me fö, ka thaa faipoipo kö, nge ka pëkö hnëqa e hnine la fami, tre, ijije tro angatr a xome la hawa cili matre troa isa ini Tusi Hmitrötr, me isa thele ewekë. Nyipi ewekë catre koi së asë troa “anyipi ewekëne la nöjei ijin” troa ini Tusi me sine thel, matre acatrene la imelekeu së me Iehova, ngacama “ngazo la nöjei drai.”—Efe. 5:15, 16.
3, 4. Nemene la itre jia ne huliwa ka ijije tro sa xom, nge nemene la nyine tro sa lapa fë ngöne la mekuna së.
3 Nemene La Nyine Troa Ce Wang: Troa xatua nyipunie hnene la Publications Watch Tower Index maine Watchtower Library ngöne CD-ROM, matre troa xome la itre ithuemacanyi ka ijij me aijijëne la hnepe lapa i epun troa kepe thangane ka loi ngöne la itre ijine ini tusi angatr. Loi e tro mina fe la itre fami a ce wange la itre hna cinyihan ne La Tour de Garde, tune la hna hape, “Clés du bonheur familial,” “Enseignez vos enfants,” me “Pour nos jeunes lecteurs.” Ketre, hetrenyi fe ngöne la Réveillez-vous ! la itre hna cinyihan hna hape, “Les jeunes s’interrogent” memine la itre hna cinyihane ka lolo ka qeje pengöne la itre emingömingöne la itre ewekë hna xup.
4 Maine tro la fami a xomi ijine troa e la Tusi Hmitrötr, haawe, tro ha hnehene la itre trepene meköti Akötresie hnene la itre atrene la hnepe lapa së, me trongëne itre ej ngöne la mele i angatr. (Heb. 4:12) Ame ngöne la itre xaa ijin, maine jë tro nyipunieti a ce goeëne me ithanatane la ketre video hna kuca hnene la organizasio. Hetrenyi fe la itre xaa ijin troa isa mekun me thel, tune la troa iëne la nyine inin, memine la aqane troa inine lai. Tune kaa matre tro nyipunieti a pane hnyingëne lai kowe la itre atrene la hnepe lapa, ene la hnei angatre hna ajan?
5. Pine nemene matre ka nyipi ewekë catre koi së enehila troa isa inine la Tusi Hmitrötr, me e hnine fe la hnepe lapa?
5 Pine Nemene Matre Ka Nyipi Ewekë Enehila: Maine easa acatrene la itre imelekeu së me Iehova, haawe, easë hi lai a hnëkë troa ‘cile matre tro sa öhne la iamele qa thei Iehova.’ (Eso. 14:13) Nyipi ewekë catre tro la itre keme me thine a nue Iehova troa eatrongë angatr, matre troa hiane la itre nekö i angatr “qëmeke ne la xöte ka qaliqali me ka ena.” (Fil. 2:15) Nyipi ewekë fe enehila troa xatuane la itre nekönatr, troa cile kowe la itre aqane mele ka ngazo ngöne la itre uma ne ini. (Ite edomë 22:3, 6) Ketre, tro mina fe la itre trefëne a acatrene hnyawa la “eno ka köni wana eamo” i angatr me Iehova. (Ate cai. 4:12) Epi tro sa huliwane cememine la inamacan, la itre hnepe ijine celë matre troa ithuecatrekeu “ngöne la lapaune . . . ka nyipi hmitöt”!—Iuda 20.