Porogaram Ne La Fami—Ini Tusi Ne La Fami
1 Ame la ahnahna ka sisitria nyine tro epuni a ce thawa memine la itre nekö i epun itre kem me thin Keresiano, tre, ene la troa kuca matre tro nyudren a hane hnimi Iehova tui epun. Hetrenyi la ketre porogaram ka aijijë epuni troa traqa kowe lai, ene ngöne la epuni a “lapa hnine la uma i [epun]” thatraqane la etid ne la fami ngöne la nöjei wiik. (Deu. 6:5-7) Ijije hi tro epuni a xatuan la itre nekö i epun troa easenyi epun catr me fedre koi Iehova jëne la hna inine pala hi la Tusi Hmitrötr cememine la fami, ngacama thaa ka hmi kö la föi epun, maine mele hnine la fami gaa isa hmi kö, maine epuni caasi pë hë a hiane la itre nekönatr.
2 Loi e Nyiqaane Jë La Ini Tusi Ne La Fami: Ame la nyine pane troa kuca, tre, ene la troa majemine troa inine la Tusi Hmitrötr e hnine la fami. Maine thaa xecie hnyawa kö koi epuni la ijine troa etid, tune kaa matre ce ithanatane lai memine la itre atrene la fami? (Ite edomë 15:22) Maine nekönatre ka co epun, ma loi e troa anyimua etid ngöne la wiik, ngo tro pe a axoxopatrene itre ej. Wange ju la ijine ka loi kowe la itre atrene la hnepe lapa. Amë ju la ketre traeme ka ijij ngöne la porogarame ne la fami, nge catre pi troa trongëne ej.
3 Nemene la nyine troa ini ngön? Ame itre xan, angatr a hnëkëne la ini hna troa ce wang ngöne la Ini Tusi Ne La Ekalesia maine ini ne La Tour de Garde (Ita Ne Thup) ka troa xulu. Ame itre xan, angatr a nyitrepene la etid ngöne la itre itus hna hnëkëne thatraqane la itre thöth. Hetrenyi la ketre kem ka trene kuku, caa nekönatr trahmany nge caa nekö jajiny; öni nyidrë ka hape: “Ame la ketre ewekë hna pi kuca hnene la itre nekönatr ngöne la wiik, tre ene la tro huni a elone la itre edromë hna hamën hnine la itus Trenge Edromë Qa Hnin La Tusi Hmitrötr. Nyipi ewekë catre kö la thangane memine la trotrohnin hne së hna kapa qa ngöne lai, hune la troa inine la itre paragaraf ka nyimutre.”
4 Loi e Troa Etid Ngöne La Nöjei Wiik: Loi e troa kuca lapaan la etidi ne la fami, nge loi e troa madrin me lapa treqene ej hnene la nöjei atren la fami. Ame göi drai me hawa, ijije hi e itre xaa ijin troa saze ngöne la kola traqa la itre xaa hnepe jol. Ketre tune mina fe la itre topik hna troa ithanatan, laka, atreine hi troa saze thenge la hna ajan hnene la fami. Ngo thaa tro pi kö a apën la porogaram ne etid ne la fami hna acile hë, hnene la itre ewekë cili. Ame ngöne la ketre hnalapa, kola qaja hnene la ketre nekö jajiny ka hape: “Maine kola troa saze la traem ne etidi hun, kakati pala hi a afedren la traem ka hnyipixe ngöne la ketre götrane ka mama kowe la nöjei atren la fami, ene pe tro asë hi huni a atre la ijine kola troa etid.” Drei la eloine la itre trenge catre hna kuca matre troa kuca pala hi la etid ne la fami! Ame ngöne la epuni a catre hiane la itre nekö i epuni ka co “ngöne la ini me ihaji i Iehova,” ene pe epuni hi lai a amamane la ihnimi epuni koi angatr me kowe la Tretretro së e koho hnengödrai.—Efe. 6:4.