Nemene La Aqane Troa Ce Huliwa Hnene La Itre Atrene La Hnepe Lapa—Göi Ini Tusi Hmitrötr
1 Jëne la nyipici, troa hetre enyipiewekëne la mele ne la hnepe lapa, ngo thaa hnene kö laka, ka nyihluei Iehova së, ke hetre thangane fe hë la mele ne la hnepe lapa së. Ohe, loi e troa hetre traeme hna xome me trenge catre hna kuca, matre troa eköthe la mele ne la hnepe lapa, ngöne la götrane la ua, ene pe cile catre ju ngöne la lapaun. Nyipi ewekë catre kowe la itre atrene la hnepe lapa, troa ce huliwa hnyawa ngöne la götrane cili. Pane hna cinyihane la ka köni götran; kola troa amamane la aqane tro la itre atrene la itre hnepe lapa, a ce huliwa matre troa majemine inine hnyawa la Tusi Hmitrötr.
2 Troa e Pala Hi La Tusi Hmitrötre Ngöne La Nöjei Drai: Kola qaja ngöne Ite Edomë 24:5 ka hape “ame la ate ate hmekun, te, kola thupëne la egöcate i angeic.” Hetre thangane ka loi la atrehmekune hne së hna kapa qa ngöne la hna e lapaane la Wesi Ula i Akötresie, pine laka, kola hamëne koi së la trenge catre ka aijijë së troa cile kowe la itre itupath i Satana kowe la mele së ngöne la götrane la ua. (Sal. 1:1, 2) Hapeu, easë kö a ce e pala hi la Tusi Hmitrötre memine la itre atrene la hnepe lapa së? Hna hnëkëne ngöne la Porogarame Ne Ini Ne Cainöje Trootro Qa Thei Akötresie, la ketre “Porogarame Ne e Tusi Hmitrötr” thatraqane la nöjei wiik. Atreine hi tro sa xötre thenge la porogarame cili, e hne së hna xome la treene lao menetre ngöne la nöjei drai. Iëne jë la ketre hawa ka ijije troa e la Tusi Hmitrötr, me troa wange la topike ne la drai hnine la sine itus, hna hape, Examinons les Écritures chaque jour; troa kuca lai ngöne la ijine kola iji tri hmakany, maine ngöne la kola ce xeni hej, maine pena qëmekene troa meköl. Loi e troa ketre aqane mele ne la hnepe lapa së lai, ngöne la nöjei drai.
3 Troa Ce Inine La Tusi Hmitrötre Ngöne La Nöjei Wiik: Ame la etid ne la hnepe lapa, ke celë hi ewekë lai ka sisitria hna troa kuca ngöne la wiik. Loi e tro la itre atrene la hnepe lapa, a wangatrune ej, me lapa madrine la ijine troa etid. Troa wangatrune hnene la hene la hnepe lapa, la ka nyipi ewekë kowe la lapa i angeic, maine ngöne la angeice a iëne la itus nyine troa ce inine memine la drai, me traem, me eqeane la etid. Loi e troa amë panëne la etid ne la hnepe lapa, ngöne la porogarame ne la wiik. The tro kö a nue la itre huliwa ka thaa nyipi ewekë catre kö, troa ajolëne la etid cili.—Fil. 1:10, 11.
4 Ame la ketre trahmany, hnei nyidrëti hna pane hule la telefone i nyidrë ngöne la ijine etid, ke hetrenyi la itre atr ka lapa telefone koi nyidrë göi huliwa. Nge maine angatre a traqa pena kowe la hnalapa troa wai nyidrë, haawe, nyidrëti a hë angatre troa hane sine la etid, maine pena troa pane treqene matre fenesi pi la etid. Thaa hnei nyidrëti kö hna nue la ketre ewekë matre troa ajolëne la etid ne la hnepe lapa i nyidrë. Hetre thangane catre la aqane ujë i nyidrë thene la itre nekö i nyidrë, nge ketre pë pena kö engazone lai kowe la huliwa i nyidrë.
5 Drei la eloine la kola ce huliwa hnene la itre atrene la hnepe lapa, ngöne la götrane la ua! Tro angatre a kapa la itre manathithi qa thei Iehova, e hna catre pala hi troa inine la Tusi Hmitrötr, e hnine la hnepe lapa.—Sal. 1:3.