Eloin La Troa Xen Ngöne La Ua
1 Hna majemin troa qaja ka hape, ‘qaja jë koi ni la hnei eö hna xen, nge tro ni a qaja koi eö la pengöi eö.’ Eje hi laka, troa hetre thangan la xen hne së hna majemine xom, kowe la ngönetrei së me kowe la mele së. Pine laka hnei Iesu hna qaja ka hape: “Tha tro kö a mele la ate hnei areto hmekuje hi, ngo hnene la nöjei tenge ewekë asë ka xulu qa ngöne la ine ula i Akötesie,” haawe, ketre tro mina fe a hetre thangan ka ngazo maine ka loi qa ngön la aqane xeni së ngöne la götrane la ua. (Mat. 4:4) Qa ngöne lai, nemen la aqane tro sa thupën la aqane tro sa xen ngöne la götrane la ua? Hapeu, ka nyinyithina epun troa xen? Ka xeni nyimenyim epun? Maine epuni a madrin troa xomi traeme ne troa xeni pala hi la itre göxen ngöne la götran la ua, ka nyipi lolo thatraqane la mele i epun?
2 Wai Pengöne Ju La Aqane Xeni Epun: Iehova a thewe “xen ngöne la nyipi ijin” me “nyikeinë ite ewekë ka pipixenyë,” jëne “la hlue ka nyipici me ka inamacan.” (Mat. 24:45; Is. 25:6) Maine easë a ajan troa kepe thangan hnyawa la itre hna hnëkën cememin la ihnim, loi e tro së a catre thel troa xeni hnyawa ngöne la götrane la ua.
3 Maine jë tro epuni a thel ka hape: ‘Hapeu, eni kö a lapaa hane e ngöne la nöjei drai la topik ne la drai, memin la itre mekun ka qejepengöne ej? Eni kö a lapaa hane e la Tusi Hmitrötr, me thele mekun ngön? Eni kö a hane hnëkën la itre icasikeu ne la ekalesia, me canga wang la itre ini hna troa ce ithanatan hnin la itre icasikeu cili? Hane kö ni e lo itre itus hna xötrei kapa, tune lo lue itus, La prophétie d’Isaïe, lumière pour tous les humains ?’
4 Hnei Iesu hna thingehnaean ka hape: “Manathithi la ite ka pë ewekë ngöne la [“ua,” MN ] . . . Manathithi la itete pi xeni me pi iji la thina ka meköt, ke tro ha ameji angat.” (Mat. 5: 3, 6) Haawe, loi e troa lolo pala hi la aqane xeni së ngöne la götrane la ua, ene la troa nyialien la he së memin la hni së hnene la atrehmekun qaathei Akötresie.