Akökötrene Jë La Aqane Tro Së a Waiewekë
1 Kola kökötr pala hi enehila ngöne la itre drai tixenuë hne së hna melën, la itre akötre ka tru, me itre itupath ka traqa kowe la nöjei atren la nöje i Iehova e cailo fen. (2 Tim. 3:1-5) Easë asë hi a aja ixatua troa cile catr ngöne la lapaun. (1 Kor. 16:13) Jëne la ixatua qaathei Iehova, atreine hi tro sa cile hut e hne së hna xeni pala hi la Wesi Ula i Nyidrë, me mejiune kowe la uati hmitrötr, me catre fedr kowe la organizasio i Nyidrë.—Sal. 37:28; Rom. 8:38, 39; Hna ama. 2:10.
2 Hetre nyipi kepin matre kola cile fë la taan hna hape, “Hni Ne Nyipi Atr Pi Ngöne La Mekun,” hna qejepengön ej ngöne lo porogaram ne asabele ka ketre pengön lo macatre hnapan. Hna nyitrepene ngöne la 1 Korinito 14:20, itre trenge ewekë i Paulo, kola hape: “Ange tejine fe, the hni ne nekönate kö ngöne la mekun; loi pe hni ne medenge ngöne la iangazo, ngo hni ne nyipi ate pi ngöne la mekun.” Nemen la hnei epuni hna mekun kowe la porogaram?
3 “Drei la ketre ithuecatr!” “Celë hi ka nyipi ewekë catr koi së enehila!” Hna xome hi la itre trenge ewekë hna qaja hnene lue atr. Hna qaja mina fe hnene la ketre atr ka thaa hmi kö, nge ka traqa troa hane sin la kola bapataison la nekö i angeic jajiny ka 12 lao macatren, ka hape, angeic a hain la porogaram, nge angeice fe a öhn la eloin ej kowe la hnepe lapa i angeic. Hapeu, thaa celë fe kö la mekune i epuni lai? Thaa tro pi kö së a thëthëhmin lo itre mekun ka tru hna cile fë ngöne lo lai ijine asabele.
4 Nyipi Ewekë La Nyipi Atrehmekun Matre Troa Atreine Waiewekë: Ngöne la cainöj nyine nyitrepen hna hape, “Akökötrene Jë Thei Nyipunieti La Nyipi Atr Ngöne La Mekun,” nemen la hna qaja atrun hnene la atre cile fë la cainöj, ewekë ka nyipi ewekë catr koi së matre troa atreine cil kowe la itre itupath enehila? Thaa tro hmekuje kö a hetrenyi la atrein, maine inamacan qaathei atr. Loi e tro mina fe së a akökötren me ajuin la itre aqane tro sa trotrohnin la Tusi Hmitrötr, wanga troa nga së hnene la nöjei ewekë ka ngazo ka lapa xötreithi së enehila. Nyipi ewekë troa kapa qaathei Akötresie la trotrohnine cili. Loi e tro sa tun la atre cinyihan la itre salamo, ene la troa sipo Iehova jën la thith, troa xatua së troa trotrohnin la itre trenge wathebo me itre hnei Nyidrëti hna amekötin, matre atrein tro së a nyihlue i Nyidrë hnene la hni ka pexej.—Sal. 119:1, 2, 34.
5 Ame ngöne la ketre cainöj, hna amaman hnene la atre thupëne la sirkoskripsio, laka, jën la Wesi Ula i Iehova memin la organizasio, Nyidrëti a hamën koi së la “Itre Ixatua Matre Troa Nyipi Atr Ngöne La Aqan Troa Trotrohnin La Tusi Hmitrötr.” Ame la trotrohnin, tre, ene la “troa atreine goeën e hnin la ketre mekun me atrehmekun la itre aliene ej qa ngöne laka kola trotrohnin la aqane iothekeune ej me itre wapicine ne ej, ene pe thaa sihngödri hë la mekune cili koi së.” Drei la ka troa xatua së troa hetreny la atreine cili? Hnei Iehova hna hamën la itre ahnahna, itre atr matre troa xatua së troa kökötr ngöne la götrane la ua. (Efe. 4:11, 12) Kola upi së hnene la organizasio i Nyidrë e celë fen, troa e pala hi ngöne la nöjei drai la Wesi Ula i Nyidrë, me sin pala hi la itre icasikeu asë ne la ekalesia. (Sal. 1:2) Hna ini së mina fe la aqane tro sa huliwane la Tusi Hmitrötr memine la itre itusi së, ngöne la easë a isa ini maine ce ini memin pena la hnepe lapa së, nge ngöne mina fe la kola hnëkë troa cainöje trootro, me sin la itre icasikeu. Hapeu, epuni kö a hane thel troa kepe thangan ka loi qa ngön la itre hna amekötine celë? Epuni kö a thel troa kuca lapaane la porogarame i epun, ene la troa isa ini Tusi Hmitrötr? Nyipi ewekë catre la ewekë celë, matre thaa tro kö a löthi së hnene la itre iajojezine la fen, me itre aja, me itre mekune i atr, me itre aqane ujë ne la itre atr ne fen ka atreine iaö.—Kol. 2:6-8.
6 Troa Amacan Pala Hi La Aqane Tro Sa Atreine Waiewekë: Ngöne la pane cainöj ne la trejin ka iwai, hna nyi taan ka hape “Inine Jë Troa Atreine Waiewekë Matre Troa Thupëne La Mele Së Ngöne la Götrane La Ua,” kola qejepengön laka thatreine kö troa atrehmekun hnene la itre atr ne fen la loi qa ngöne la ngazo. (Is. 5:20, 21) Ewekë kö lai ka troa traqa koi angatr, qa ngöne la hnei angatr hna xel troa kapa me trongën la itre hna amekötin hnei Akötresie. Ame pena ha së, hne së hna kapa la ini ngöne la götran la ua qaathene la organizasio i Iehova, nge easa wangatrune la itre trepene meköti Nyidrë, laka itre ej a eatrongë së ngöne la itre huliwa së, memine la aqane ujë së. Haawe, atreine hi së tro sa isa amaman la ewekë ka loi lo hna kapa hnei Iehova, nge ka ihmeku memin la aja i Nyidrë ka meköt.—Rom. 12:2.
7 Maine easë a ajan troa neën la itre mekun ka iamenu ne la fen memin la itre ethan itre ej, loi e tro pala hi së a catr troa amacan la aqane atreine waiewekë së. Nemen la nyine tro sa kuca? Tun la hna cinyihan ngöne Heberu 5:12-14, hna qaja catrën hnei Paulo la enyipiewekën la troa xen, ngo thaa tro kö a lapa pala hi ngöne la “iji melek” ngön la wesi ula. Nyipi ewekë tro sa xom la xen ne la ua thatraqan la itre ka tru, tune la ini hne së hna kapa hnin la itre Ini Tus Ne La Ekalesia, ngön lo itre hna perofetan hnei Isaia. Nge loi e tro mina fe së a canga trongën la itre hne së hna ini ngöne la mele së. Maine tro së a kuca tune lai, tro ha xecie hnyawa koi së laka, ka meköti catr la itre trepene meköt me itre hna amekötin hnei Iehova. Tro fe hë a amekötin hnyawa pala hi la aqane atreine waiewekë së, matre troa atrehmekune hnyawa la loi qa ngöne la ngazo.
8 Nango jol e tro sa mekun, ngo hetreny la itre ka nanazij ngöne la götran la ua. Pine nemen? Thaa hnei angatre kö hna ahmacan la itre mekune i angatr ngön la ewekë ka loi me ka meköt xajawa i Iehova. Ame hë la pun, tru la ka kei hna dreng la itre ka qeje hmi jëne televizio me radio, me itre miuzik ka iahmo, maine hna porotrik pena jëne internet. Maine tro pala hi a inamacan la aqane ujë së, tro hë së a neën la itre thiina ka sis, me aqane ujë ka hmo ne la itre atr ka ngazo.—Ite edomë 13:20; Gal. 5:7; 1 Tim. 6:20, 21.
9 Nyipi Ewekë Tro La Itre Thöth a “Hni Ne Medreng Ngöne La Iangazo”: Lue götran la porogaram hna hnëkën hnyawa thatraqan la itre thöth, matre troa xatua angatr troa akökötren la aqane atreine waiewekë i angatr. Hna amaman hnene la itre ka cile fë la cainöj laka, ame la troa “medreng ngöne la iangazo,” tre kola hape, troa tun la medreng laka thatre pengön hnyawa petre kö la mel, ene la itre ewekë ka pui ngazo xajawa i Iehova. (1 Kor. 14:20) Hna ithuecatr koi së asë troa thupën la aqan tro sa xome la traeme së, matre tro së a atrein cile kowe la nöjei pengön ewekë ka ngazo, me neën wanga troa hetre ethan itre ej kowe la mele së. (Efe. 5:15-17) Hna xatua së mina fe troa e hnyawa la etrun la traem hne së hna xom troa e la itre xaa itus ka pëkö eloin ngön la troa akökötren la aqan tro sa trotrohnin la itre ewekë ngön la götrane la ua. Hapeu, epuni kö a hane kuca tune lai? Nemen la itre thangane lai koi epun? Nyipi ewekë troa e pala hi la Tusi Hmitrötr, nge tro mina fe a catr troa e la itre itus hna hamën hnene la organizasio. Maine tro së a kuca tune lai, itre thöth mina fe, haawe tro hë së asë a kapa la ixatua matre troa hetreny la “trotrohnin.”—Ite edomë 4:7-9.
10 “Manathith Hna Kapa Qa Ngön La Hna Melën La Itre Trepene Meköt Ne La Tusi Hmitrötr Cememin La Trotrohnin”: Celë hi taan la cainöj ka nyipun la asabele ka ketre pengön ka caa drain. Hna qejepengön hnene la qatre thup hna könën kowe la asabele, laka Iehova la Qeqene la trotrohnin ka hamë mel, ka draië catre kö hune la trotrohnine la atr. Pane mekune ju së la aqane aijijë së hnei Iehova, troa thel me kapa madrin pala hi la trotrohnine i Nyidrë! Nyidrëti a hamëne gufan ej kowe la itre atr ka thele Nyidrë cememin la hni ka menyik, me sipo Nyidrë cememin la lapaun. (Ite edomë 2:3-5, 9; 28:5) Hapeu, epuni kö a hane kepe thangan hnyawa la aqane hame i Iehova?
11 Hna ithuecatr mina fe koi së troa inin troa atrehmekun la itre trepene meköt ngöne la easë a e la Tusi Hmitrötr. (2 Tim. 3:16, 17) Inin hnyawa jë itre ej, matre troa hetreny la nyipi trotrohnin ngöne la itre trenge ewekë i Iehova. Thele ijine jë troa sine thel la itre trepene meköti cili, nge amë hutine ju itre ej ngöne la itre mekun me itre hni së. Tro hë së a atreine waiewekë, nge ketre troa hetre thangan ka loi la itre mekun hne së hna troa axeciën ngöne la mele së. (Ios. 1:8) Loi e tro së a mekun la itre aqane mel ne la itre atr ka nyimutre, me wang la aqane troa xatua së e hne së hna trongën la itre trepene meköti ne la Tusi Hmitrötr.
12 ‘Tro Kö Ni a Hane Heetr Me Isej Tune La Itre Xan?’ Kola amaman la hni ne icilekeu ne la itre atr, hnene la aqane heetr me isej i angatr. Celë hi hni ne icilekeu lai ka upe la itre atr troa heetr angazony, maine troa amamai ngönetrei. Nemen la itre trepene meköti ne la Tusi Hmitrötr ka troa xatua së troa lepe trij la itre aqane ujë cili? Maine hna ahmacan hnyawa la aqane atreine waiewekë së, tro hë së a wangatrune hnyawa la trepene meköti ka eje ngöne 1 Timoteo 2:9, 10, ene la troa heetr “qahmihmi me metöt . . . , kowe la [itre atr] hna hape, (celë hi ijiji angete thina ka ijiji Akötesie).” Ame la itre xaa trepene meköt nyine troa trongën, tre, itre ej ngöne la 2 Korinito 6:3 me Kolose 3:18, 20.
13 ‘Nemen La Nyine Tro Ni a Kuca Matre Troa Catre Caas Pala Hi La Fami i Eni?’ Nyipi ewekë tro pala hi a ithanata me atreine dreng la itre atren la hnepe lapa. Kola qaja koi së ngöne Iakobo 1:19 ka hape: “Loi e tro nöjei ate asëjëihë a canga deng, me hnöthe troa ewekë, me hmite troa elëhni.” Nyipi ewekë tro la itre atren la fami a ithanatakeu, ngo tro mina fe a atreine hane dreng la itre xan, pine laka, ame la porotrik e hnin la fami, tre, kösë kola itroitria la lue gojeny. Nge maine ame la hne së hna qaja, tre trenge nyipici, e hna qaja cememin la hni ka pi tru me pi draië, nge pëkö emenyiken la itre trenge ithanata, haawe, thaa ixatua kö la hna troa hamën ngo kolo pe a troa iakötrë. Qa ngöne lai maine trahmanyi së maine föe, maine ketre kem me thin, maine nekönatr pena, loi e tro së a ewekë “pala hi memine la ihnimi, hna aloine hnei alase.”—Kol. 4:6.
14 ‘Hna Tupathi Ni Fe Hnene La Pi Aja Mo?’ Ame la pi aja mo, tre, celë hi ketre itupathi ka tru ka ajolën la mele ne la atr. Thatreine kö tro la pi aja mo a fe gojenyi ne la itre atr kowe la nyipi manathith. (Ate cai. 5:10; Luka 12:15; 1 Tim. 6:9, 10) Hna xatua së matre thaa tro kö së a kei kowe la hnö ne la pi aja mo, matre hnei Iesu hna hamën la ketre trepene meköti ka nyipi ewekë kola hape: Ea caa hna goeëne ju hi. Tro sa atreine tuluthe hnyawa la aqane tro sa mel, e hne së hna hnöth troa nyi ejolen menune pala ha la mele së, ngo easë pe a wangatrune hnyawa la itre huliwa ne la Baselaia, nge ame pë hë koi itre xaa aja së, easë a amë itre ej e thupen.—Mat. 6:22, 23, 33.
15 Nemene Hë La Hne Së Hna Troa Eatrën: Hetre mejiune së kowe la Wesi Ula i Akötresie, ene la Qeqene la itre trepene meköt ka lolo, ka troa eatrongë së ngöne la easë a troa axeciën la itre mekun. Nyipi ewekë tro së a xom la itre trepene meköti cili, matre tro së a thele ini ngöne itre ej, me trotrohnin la aqane troa trongën itre ej ngöne la mele së. Qa ngöne lai, maine tro sa majemin troa ‘huliwane la hni troa wangate hmekune la loi me ngazo,’ haawe, tro hë së a isa kepe thangan ka loi thatraqan la mele së, me atrunyi Iehova pala hi, Tretretro së.—Heb. 5:14.