Aliene Hni Ka Madrin!
1 Atraqatre la itre hnepe lapa ne la nöjei götran ne la fen, ka madrine atraqatr thupene la hnei angatr hna hane goeën lo video hna hape, Les jeunes s’interrogent... Comment se faire de vrais amis ? Hna qaja hnene la ketre keme e Etazini ka hape, ame la kola ase goeëne lai video hnene la itre nekö i nyidrë trahmany, pëkö caasi e angatr ka ithanata—angatr a trotrohnin me kapa asë la itre ewekë hnine lai video! Kola qaja hnene la ketre rapor ka traqa qaa Malawi ka hape, atreine hi troa trotrohnine hnyawa hnene la itre trejin trahmanyi me jajiny ne la nöj, pine laka, angatr a hane melëne fe la itre itupathi ka tune lai, ngöne la hnei angatr hna ini. Hna hane qaja fe la video hnene la ketre kem ne Alema, öni nyidrë ka hape: “Eni a öhne hnyawa laka, kola sa lo itre thithing.” Hna qaja hnene la ketre trejin jajiny, ka hape: “Oleti la hna amekunë ni laka, Iehova a kukehni me hnimi ni.” Hna qaja fe hnene la ketre qatre thup ne Nouvelle-Zélande, ka hape: “Hna xatuane la ketre trejin jajiny troa bëeke hmaca kowe la gojenyi ne tro kowe la mel.” Hna goeën mina fe lai video hnene la ketre föe ka faipoipo, hnei eahlo hna qaja ka hape: “Epi tro asë hi la itre thöth e hnine la nyipici a goeën lai video cili, me thele troa melën la nyipici!” Itre hnepe lapa, tune kaa matre goeëne hmaca hnei nyipunie la video? Thupene lai, ce ithanatane jë cahu itre hnying.
2 Pane Mekun: Nemen la nyipi enehmu?—Ite edomë 18:24.
3 Itre Ejolen La Troa Thele Enehmu: Tune kaa la aqane tro epuni a cile kowe la ketre jol, ene laka, thaa hane kö semesine nyipunie hnene la itre xan? (Fil. 2:4) Pine nemen matre nyipi ewekë tro epuni a aloin la thiina i epun, nge drei la ka ijij troa xatua epun? Nemen la itre ka troa aijijë angatr troa öhnyi sine ce elo, nge tro angatr a öhne itre ej ekaa?—2 Kor. 6:13.
4 Troa Enehmu i Akötresie: Tune kaa la aqane tro epuni a hane acatren la aqane imelekeu i epun me Iehova, nge pine nemen matre nyipi ewekë catr troa ujë tune lai? (Sal. 34:8) Drei la ka troa acatrene hnyawa, la aqane tro nyipunie a thel troa ce sinee me Akötresie?
5 Itre Enehmu Ka Ngazo: Drei la itre enehmu, thaa nyine tro kö së a ce mele me ce elo memin? (1 Kor. 15:33) Tune kaa la aqane tro la itre enehmu ka ngazo, a akeinyi së ngöne la götrane la ua? Nemen la hnei Tusi Hmitrötr hna ini epuni göne la pengö i Dina?—Gen. 34:1, 2, 7, 19.
6 Daram Hmekune La Hnedrai Së: Tune kaa la aqane akötre Tara, hnene la lapa caas? Nemen la aqane thele kepin angeic, la ce elo i angeic memine la itre thöthi ne fen? Matre nemen la itre ethan hna qëmeke kow hnei angeic, qa ngöne la hna ce elo me angatr? Pine nemen matre thaa hna öhne kö hnene la keme me thine i angeic, la ngazo hna qëmeke kow hnei Tara, ngo nemen la aqane ujë i nyidroti matre troa xatua angeic, troa egöcatre hmaca ngöne la götrane la ua? Tune kaa la aqane amaman hnene la ketre trejine jajiny ka pionie, laka, nyipi enehmu nyidroti koi Tara? Pine nemen matre nyipi ewekë tro la itre Keresiano, a wangatrune hnyawa la Ite Edomë 13:20 me Ieremia 17:9? Nemen la ini ka sisitria hna kapa hnei Tara?
7 Itre Mekun Nyine Nyipun: Nemen la itre ini hnei epuni hna kapa jën la video celë? Tune kaa la aqane tro epuni a hane xome ej, matre troa hane xatuan la itre xan?—Sal. 71:17.