Ketre Video Nyine Tro Sa Mekune Hnyawa
“Kola upe la atr hnene la video celë troa mekun!”
“Canga ketre hi la hning hnene ej!”
“Atraqatr la aqane ketri ni hnene ej!”
1 Hapeu, celë fe mekuna i epuni lai thupene la hnei epuni hna goeëne la video Les jeunes s’interrogent . . . Comment se faire de vrais amis ? Hetrenyi la itre xaa macatre ne pane traqa la ketre jol kowe la ketre thöthi trahmany, hnene la aqane ië sine ce elo i angeic. Hnene la itre sine ce elo cili hna ananazijëne la aja i angeic kowe la nyipici, ene pe luuzi hë la aqane imelekeu i angeic me Iehova. Thupene lai kola traqa lo lai video, Les jeunes s’interrogent . . . Comment se faire de vrais amis ? Hnei angeic hna cinyihane ka hape: “Kola xöla la trenge timidrange la eni a anyimua goeëne la video. Eni a olene koi Iehova la ixatua i Nyidrë ngöne la ijine ka ijij.” Hetre thangane catr la video, pine laka, hnei angeic hna saze la aqane mele i angeic, me atreine iëne hnyawa la itre thöth nyine troa ce elo memin. Öni angeice fe: “Eje hi lai laka atre hnyawa hi epuni la itre jol hna cile kow hnene la itre thöth.” Itre keme me thin me itre nekönatr, tune kaa matre goeëne hmaca hnei nyipunie la video ngöne la ijine epuni a etid ne la fami? Pane cile ju ngöne la nöjei götran ne la video, me ce ithanatane itre ej, memine la itre hnying ngöne cahu itre paragaraf.
2 Pane Mekun: Nemene la nyipi enehmu?—Ite edomë 18:24.
3 Itre Ejolen La Troa Thele Enehmu: Tune kaa la aqane tro epuni a cile kowe la ketre jol, ene laka, thaa hane kö semesine nyipunie hnene la itre xan? (Fil. 2:4) Pine nemen matre nyipi ewekë tro epuni a aloin la thiina i epun, nge drei la ka ijij troa xatua epun? Nemen la itre ka troa aijijë epuni troa öhnyi sine ce elo, nge tro epuni a öhne itre ej ekaa?—2 Kor. 6:13.
4 Troa Enehmu i Akötresie: Tune kaa la aqane tro epuni a hane acatren la aqane imelekeu i epun me Iehova, nge pine nemen matre nyipi ewekë catr troa ujë tune lai? (Sal. 34:8) Drei la ka troa acatrene hnyawa, la aqane tro nyipunie a thel troa ce sinee me Akötresie?
5 Itre Enehmu Ka Ngazo: Drei la itre enehmu, thaa nyine tro kö së a ce mele me ce elo memin? (1 Kor. 15:33) Tune kaa la aqane tro la itre enehmu ka ngazo, a akeinyi së ngöne la götrane la ua? Nemen la hnei Tusi Hmitrötr hna ini epuni göne la pengö i Dina?—Gen. 34:1, 2, 7, 19.
6 Daram Hmekune La Hnedrai Së: Tune kaa la aqane akötre Tara, hnene la lapa caas? Nemen la aqane thele kepin angeic, la ce elo i angeic memine la itre thöthi ne fen? Matre nemen la itre ethan hna qëmeke kow hnei angeic, qa ngöne la hna ce elo me angatr? Pine nemen matre thaa hna öhne kö hnene la keme me thine i angeic, la ngazo hna qëmeke kow hnei Tara, ngo nemen la aqane ujë i nyidroti matre troa xatua angeic, troa egöcatre hmaca ngöne la götrane la ua? Tune kaa la aqane amaman hnene la ketre trejine jajiny ka pionie, laka, nyipi enehmu nyidroti koi Tara? Pine nemen matre nyipi ewekë tro la itre Keresiano, a wangatrune hnyawa la Ite Edomë 13:20 me Ieremia 17:9? Nemen la ini ka sisitria hna kapa hnei Tara?
7 Itre Mekun Nyine Nyipun: Nemen la itre ini hnei epuni hna kapa jën la video celë? Tune kaa la aqane tro epuni a hane xome ej, matre troa hane xatuan la itre xan?—Sal. 71:17.