“Aja” i Epuni Kö Troa Xatuan La Itre Xan?
1 Hnei Iesu hna thupëne hnyawa la itre atr. Ame ngöne la kola sipone iele nyidrë troa ixatua hnene la ketre lepera, hnei nyidrëti hna liine la ime i nyidrë me ketr lai trahmany, me qaja ka hape: “Ini a ajan, loi hë eö.” (Mareko 1:40-42) Nemen la itre aqan tro sa xötrethenge la aqane ujë i Iesu, ene la troa hane xatuan la itre xaa atr?
2 Itre Atr Ka Hetre Hni Ne Ajan: Kola thele hne së isa ala caas, itre atren la ekalesia, troa xatuan la itre atr ka hetre hni ne ajan troa hmi koi Iehova. Ame ngöne la kola xötrei traqa troa hane icasikeu hnene la itre xan, loi e tro sa hane kepe angatr me hane ibozu me angatr, me thel troa atre angatre hnyawa. Thele jë la itre aqane troa hane ithuecatr koi angatr. Qaja aloine jë la itre mekun hnei angatr hna hamën. Amamane jë fe la madrine së kowe la aqane catre angatr, troa trongën la itre trepene meköti ne la Tusi Hmitrötr ngöne la mele i angatr. Xatua angatre jë, matre troa hane wang la aqane tro angatr a thele la itre nyipi sinee hnine la ekalesia.
3 Itre Sine Hmi Së: Loi e tro kö a sisitria, la nöjei aqane tro së a xatuan la “lapa i angetre lapaun.” (Gal. 6:10) Nyimutre la itre ka akötr, hnene la itre sine mec. Maine tro së a pane hane wai angatr, troa madrin hnei angatr laka, kola sikusiku angatr hnene la itre ka ce hmi me angatr, nge ketre, maine jë tro fe së a hane hamën la ixatua së ngöne la itre xaa götran. Maine jë hetrenyi la itre ka qëmek kowe la itre xaa jol, ngöne la mele i angatr. Amamane jë së la ihnimi së, ene la troa nue angatr troa pane ithanata, nge thupene lai, easë a hane ithuecatr koi angatr. (1 Thes. 5:14) Nyipi ewekë mina fe tro sa ce huliwa memin la itre qatre thup, ngöne la angatr a xom la itre hnëqa i angatr. (Heb. 13:17) Maine tro së a hetrenyi la ajan troa ixatua, atreine hi tro sa “amadrinën” la itre sine hmi së.—Kol. 4:11.
4 Itre Atrene La Fami: Loi e tro fe së a thel troa xötrethenge la aqane ihnimi Iesu, me aqane thel hnei nyidrë troa xatuan la itre atr, memin la itre atren la hnepe lapa së. Tro la ihnimi ka ej e kuhu hni ne la itre kem me thin, a upi angatr troa ‘hian hnyawa la itre nekö i angatr, thenge la aqane ini me ihaji Iehova.’ (Efe. 6:4) Ka loi e tro mina fe la itre nekönatr a amaman laka, hetre aja thei angatr troa ixatua, maine troa canga hane hnëkë ngöne la ijine kola troa etid hnene la fami, maine ngöne la itre ijine icasikeu, maine ngöne la kola troa cainöje trootro. Ijije mina fe troa utipin tui Iesu hnene la itre nekönatr ka nango tru hë, maine ngöne la kola troa xatuan la itre kem me thin troa cile kowe la itre jol ka eje thei angatr, qa ngöne laka, angatr a qatre trootro. Ngöne la itre götrane cili, ijiji së asë hi troa “inine troa thina ka loi ngöne la isa hnalapa [së] kö.”—1 Tim. 5:4.
5 Ame ngöne la easë a xötrethenge la tulu i Iesu, ene la troa xatuan la itre xan, maine jë ijiji së hi troa hane ahmaloeën la itre jol ka eje thei angatr, me aiasenyi së catr pala hi e hnine la fami së, me hnine fe la ekalesia. Nge ame la ka nyipi ewekë catr, tre, ene la tro së a atrunyi Iehova, ene la “Tretretroti ka ihnim.”—2 Kor. 1:3.