Tro Kö Nyipunieti a Hane Ixatua?

¹ Iehova pala hi a thele la itre aqane troa xatuane la itre nyipi hlue i Nyidrë. (2 A. l. ite jo. 16⁠:9; Is. 41⁠:​10, 13) Hnei Isaia hna aceitunë Nyidrë memine la ketre atre thupë mamoe ka ihnim, matre hna cinyihane ka hape: “Tro nyidëti a hatuthe la ite nekö i mamoe i nyidë ngöne la lue ime i nyidë, me xepi nyudeni ngöne la imano i nyidë, me engëne hmidrane la itete aiji thin.” (Is. 40⁠:11) Tro sa ce wang la itre xaa aqane tro sa xötrethenge la ihnimi Iehova.

² Xatuane Jë La Itre Ka Xötrei Atre La Nyipici: Atreine hi tro sa hane xatuane la itre ka xötrei atre la nyipici, hnene la troa hë angatr troa hane ce porotrik me ce madrin me easë. (Ite edomë 13⁠:20) Kola mekune hnene la ketre trejin la aqane li ime matre troa ixatua ngöne lo angeic a xötrei hane sine la ekalesia, öni angeic ka hape: “Nyimu ijine hë ni hnene la ketre fami matre troa hane ce sin me angatr la etidi angatr. Pine laka eni a kökötr ngöne la nyipici, ene pe hna hane lapaa hë ni hnene la ketre trefën ka pionie troa hane ce cainöje me nyidro ngöne la itre drai ka pexej. Hnei eahuni pala hi hna ithanatan la itre ewekë ngöne la götrane la ua.” Hnei angeic hna qaja fe ka hape: “Qëmekene tro ni a ketre Keresiano, hnenge hna majemine troa feet e itre jidri ne drai ka tru me mecixen. Ngo kösë enehila kola nyihnane lai hna majemine cili, hnene la itre ijine eni a porotrik me ce madrin memine la itre trejin.” Hna xatuan la trejine cili hnene la ihnimi ne la ekalesia, ene pe hetre iwan nge catre hnyawa ha la lapaune i angeic, nge enehila angeic a huliwa hnine la Bethela.​—Kol. 2:​6, 7.

³ Loi e Tro Sa Iakeukawany: Ijije fe tro sa atrehmekun la ketre ijine ka ijij troa hane li ime troa ixatua, ngöne la kola traqa la itre jole kowe la itre trejine me easë. Ijije kö tro sa hane thele troa telefon matre troa ce cainöj memine la ketre trejin sinatr, maine troa hë angeic troa ce tro me easë troa etid, maine pena troa thenge la hnainin matre troa etid ngöne la hnalapa ne lai trejin sinatr? Maine jë tro la kem me thin a madrin e tro sa ixatuanekeun la itre nekö i nyidro ka co ka ce tro me angatr troa cainöj? Hetrenyi kö la itre ka nango xou troa cainöj matre kola ajan tro sa ixatua troa ce iwai hmaca maine troa ce kuca la itre xaa götrane ne la huliwa ne cainöj? Maine hetre ihnimi së kowe la itre trejine me easë, eje hi lai laka tro ha upi së troa thele la itre aqane troa akeukawan la itre hni angatr.​—Rom. 14⁠:⁠19.

⁴ Pine laka easë a xötrethenge la aqane hnime Iehova la itre hlue i Nyidrë, haawe, easë a ithuecatrekeu, me thele matre troa ihnimikeu la itre atren la ekalesia me atrune la Tretretro së e koho hnengödrai.​—Efe. 4:​16.