Tro Fe Kö Epuni a Hane Meku Nyudren?

Hetrenyi ngöne la itre xa ekalesia la itre atr ka tha cainöje catre kö, ke hetre sine mec i nyudren, maine pena hnene laka, qatre catre hë. (2 Kor. 4:16) Hapeu, ijije kö tro epuni a hane hëne la itre ka cainöje cili, matre troa hane sine la epuni a troa ini Tusi koi ketre atr? Ngo maine thatreine kö troa lö sai angeice a tro kuhu qëhnelö, sipone jë troa kuca la ini Tusi ngöne la hnalapa i angeic. Hapeu, ijije kö tro epuni a hane mekune la itre trejine me easë ka trene mec, matre ce cainöje me angeice koi lue hnalapa, maine wange hmaca la lue atr hnei epuni hna cainöje hë kow? Ala nyimu la itre ka qatre hë, ngo ka maca ngöne la huliwa ne cainöj. Celë hi matre, ame la epuni a meku nyudren, tha nyudreni hmekuje kö la itre ka troa kepe ithuecatr, ngo epuni mina fe. (Rom. 1:12) Ketre, tha tro jë pi kö Iehova lai a thëthëhmine troa amanathithine la ihnim i epuni ka troa mama ngöne la ijine cili.—Ite edomë 19:17; 1 Ioane 3:17, 18.