Aqane Troa Maca Ngöne La Hna Cainöj—Ini Angatre Jë Troa Cainöj

Enyipiewekën: Loi e tro la itre hna nyipi bapataison a thele troa trongëne la “nöjei ewekë asëjëihë” hnei Iesu hna amekötin, ene mina fe la troa inine la nyipici kowe la itre atr. (Mat. 28:19, 20) Nyimutre la itre atr ka hnyipi traqa ngöne la ekalesia, nge hna aijijëne hë troa hane kuca la itre xötreqa ngöne la Ini Ne Cainöj Qaathei Akötresie. Ketre, angatr a hane qaja la nyipici kowe la itre sinee i angatr me itre atrene la lapa i angatr. Nge, ame hë la kola kökötre la hni ne ole i angatr kowe la itre ini hnei angatre hna kapa, me trotrohnine laka aja i Iehova tro la nöjei atr a drenge la maca ka loi, haawe, angatre fe hë a hane qaja amamane la aja i angatr troa hane cainöje trootro. (Rom. 10:13, 14) Ame hë e cili, angatre fe hë la itretre cainöje tha hna bapataisone petre kö. Nge tro hë angatre lai a maca trootro ngöne la hna cainöj e hna ini angatre hnyawa.—Luka 6:40.

Aqane Troa Kuca:

Loi e troa hetrenyi thene la ka xötrei cainöj la itre itus nyine tro angeic a tro fë me hamë ini. Amamane jë koi angeic la aqane hnëkëne epuni la watrenge i epun, me qaja la kepine matre epuni a hamëne la itre itus.
Ce iëne jë me amacane me angeic la ketre aqane nyiqane ithanata qa hnine la Huliwa Ne Baselaia. Xatua angeice jë troa qaja thenge la aqane ewekë i angeic. Iëne jë la itre cadre ne la itus École du ministère, götrane 82, nge ka ihmeku memine la hna melën ngöne la teritoare së, nge amacane jë. Amamane jë fe la enyipiewekëne la troa heetr me isej hnyawa.—2 Kor. 6:3, 4.
Tha tro kö a canga sesë ngöne la aqane troa hamë ixatua. Amamane jë koi angeic la ketre territoire, me ini angeic la aqane troa nyialiene la sine pepa hna hnëkën kow. Amamane jë la aqane troa fejan la itre ithuemacany göne la itre atr ka hetre hni ne aja. Ini angeice jë fe la aqane troa huliwane la sine itus, Une bonne nouvelle pour des gens de toutes nations, memine fe la site së jw.org ngöne la hna cainöje trootro. Nge xatua angeice jë troa wange hmaca la atr ka drei angeic.—1 Kor. 3:6.
Loi e tro epuni a atreine itreqe, me qaja aloinyi angeic. (Ite edomë. 25:11) Amamai tulu jë. E tro epuni a catre cainöj me amamane la ihnimi epuni koi angeic, tro lai a hetre thangane ngöne la mele i angeic.

Tupathe Ju Ngöne La Hna Cainöj:

Ce cainöje jë memine la ka ini Tus me epun ngöne la itre hnalapa trootro. Ce tro jë me angeic troa wange hmaca la itre atr memine lo itre hnei epuni hna ini tusi kow. Ngo, e maine pëkö atr hnei epuni hna ini Tus memin, ce tro jë memine la ka cainöj ka tha maca pala kö.