MEKENE 8
Itretre Cainöjëne La Maca Ka Loi
HNEI Iehova hna hamën la ketre tulu ka pexej nyine tro sa xötrethenge, ene la Hupuna i Nyidrëti, Iesu Keriso. (1 Pet. 2:21) E tro la atre a xötrethenge Iesu, tro angeice lai a cainöjëne la maca ka loi, nge ketre hlue i Akötresieti fe hë angeic. Nge, kola aegöcatrenyi angeic e troa xötrethenge Iesu. Öni nyidrë: “Trohemi koi ni, nyipunieti asë ange ka huliwa me hace, nge tro ni a amanonyi nyipunie. Xomejë la nyine isilikeunge hui nyipunie me inine theng ke menyike ni, nge ipië la hning; nge tro nyipunieti a öhne la hna mano thatraqane la ite u i nyipunie.” (Mat. 11:28, 29) Ame asë hi la itre ka kapa la ihë celë, tre, öhne asë hë angatr laka, tha tria kö lo hnei Iesu hna qaja!
2 Pine laka, Iesu la Hlue Ka Tru i Akötresie, hnei nyidrë hna könën la itre atr troa xötrethenge nyidrë. (Mat. 9:9; Ioane 1:43) Hnei nyidrëti hna ini angatr troa cainöj me upi angatr troa xome la huliwa hnei nyidrëti hna kuca. (Mat. 10:1–11:1; 20:28; Luka 4:43) Ame hë thupen, hnei nyidrëti hna upe la itre xan, ala 70 la etrun, troa cainöjën la maca ka loi ne la Baselaia i Akötresie. (Luka 10:1, 8-11) Hnei nyidrëti hna qaja ngöne lo ijine cili, ka hape: “Ame la ate dei nyipunie, te, kola dei ni ; nge ame la ate methinë nyipunie, te, kola methinë ni ; nge ame la ate methinë ni, te, kola methinëne la ate upi ni.” (Luka 10:16) Iesu hi la a amamane hnyawa la etrune la hnëqa hna troa xome hnene la itretre drei nyidrë. Tro angatr a nyitrengewekë i Iesu, memine la Akötresie Ka Draië Catr! Celë mina fe hnëqa lai hna xome enehila hnene la itre atr ka kapa la ihë i Iesu, lo nyidrëti a hape, “Trojë fe, ma xöte thenge ni.” (Luka 18:22; 2 Kor. 2:17) Haawe, Akötresieti a nue kowe la itre ka kapa la ihë celë la huliwa ne troa cainöjëne la maca ka loi ne la Baselaia me troa inine la itre atr.—Mat. 24:14; 28:19, 20.
3 Pine laka hne së hna kapa la ihë i Iesu göi troa xötrethenge nyidrë, haawe, hna aijijë së troa atre Iehova Akötresie me Iesu Keriso. (Ioane 17:3) Matre atre hë së la itre jë i Iehova. Ketre, hnene la ixatua i Nyidrë hna aijijë së troa ahnyipixene la itre mekuna së memine la itre thiina së, me trongëne ngöne la nöjei drai la itre trepene meköti Nyidrë. (Rom. 12:1, 2; Efe. 4:22-24; Kol. 3:9, 10) Hnene la hni ne ole së koi Nyidrë hna upi së troa sa xepu koi Nyidrë me nyihatrene lai hnene la hna xome la bapataiso hnine la tim. Kola mama jëne la bapataiso ka hape, hna kepe së ceitu me ketre hlue i Akötresie.
4 Tha tro pi kö sa thëthëhmine laka, loi e tro palahi sa nyihlue i Akötresie memine la mele ka pë ethan me hni ka wië. (Sal. 24:3, 4; Is. 52:11; 2 Kor. 6:14–7:1) Jëne la hna lapaune koi Iesu Keriso, hetrenyi hë së la mekuthethewe ka lolo. (Heb. 10:19-23, 35, 36; Hna ama. 7:9, 10,14) Hnei Paulo aposetolo hna ithuecatre kowe la itre keresiano troa kuca asë la hnei angatr hna atrein troa atrunyi Akötresie. Kola ithuecatre tune lai koi angatr matre tha tro kö a athixötrëne la itre xan. Hnei Peteru aposetolo fe hna amamane la enyipiewekëne troa hetrenyi la aqane ujë ka loi matre troa ea la itre atr ka tha hmi kö kowe la nyipici. (1 Kor. 10:31, 33; 1 Pet. 3:1) Nemene la aqane tro epuni a xatuane la ketre atr matre tro fe angeic a eatrëne la itre hna amekötin göi troa hane ketre hlue ne la maca ka loi?
ITRETRE CAINÖJ KA HNYIPIXE
5 Ame la epuni a nyiqaane inine la Tusi Hmitrötr memine la ketre atr, xatua angeice jë troa hane qaja la hnei angeic hna inin kowe la itre xan. Tro lai a upi angeic troa ithanatane lai ngöne la nöjei ijin kowe la itre sinee i angeic, me itre sine ce elo, me itre sine huliwa me itre xane ju kö. Ka nyipiewekë catre lai ngöne la kola ini angatr troa xötrethenge Iesu, ene la troa ketre hlue ne la maca ka loi. (Mat. 9:9; Luka 6:40) Ame hë la kola kökötre la lapaune i angeic, nge maca hnyawa ha troa cainöj ngöne la nöjei ijin, haawe, tro hë angeice lai a qaja amamane la aja i angeic troa hane cainöje trootro.
HNA THELE THENE LA KA AJAN TROA CAINÖJ
6 Qëmekene tro nyipunie a hëne la ketre atr troa ce tro me nyipunie troa xötrei hane cainöj, nyipiewekë tro angeic a pane eatrën la itre hna amekötin thatraqai angeic. Ame la atr ka ce cainöj me easë, tre, ame koi nöjei atr, ketre Atre Anyipici Iehova fe angeic. Kolo hi lai a amamane ka hape, ase hë angeic nyiqaane trongëne ngöne la mele i angeic la itre trepene meköti Iehova, nge ijiji angeice hë troa ketre atre cainöje hna tha bapataisone petre kö.
7 Hnene laka epuni palahi a inine la Tusi Hmitrötr memine la ketre atr me ce ithanatane me angeic la itre trepene meköt, haawe, atre fe hë epuni la aqane mele i angeic. Tro fe lai a mama koi epun laka, angeic a trongën la itre hnei angeic hna inin. Ngo eje hi lai laka, tro la itre qatre thup a ce tro me epuni matre troa ce ithanatane me angeic la itre xa götrane ne la mele i angeic.
8 Tro la kordinatör ne la lapa ne la itre qatre thup a ce wang me lue qatre thup (ketre atrene la Komite Göi Huliwa la ketre e nyidro) matre troa ce ithanatane la götrane cili me epun memine la hnainin. Ame ngöne la itre ekalesia laka, ala xalaithe hi hnei qatre thup, troa kuca lai hnene la ketre qatre thup memine la ketre drikona ka maca. Tro la lue trejine cili a thele matre troa canga isa pui thatraqane lai, tha tro kö a hmitr. Maine kola thuemacanyi angatr hnene la hnainin la aja i angeic ngöne la ijine icasikeu, loi e tro nyidroti a ce ithanata me epuni memine la hnainin thupene la icasikeu. Loi e troa lolo la ijine cili. Qëmekene troa kepe angeic matre ketre atre cainöje hna tha bapataisone petre kö, loi e troa pane ce wang ka hape, angeice hi a kapa la itre ini celë:
Angeic a jele nyipicine ka hape, Trengewekë i Akötresieti la Tusi Hmitrötr, nge qaathene la uati hmitrötr?—2 Tim. 3:16.
Trotrohnine hi angeic la itre ini ne la Tusi Hmitrötr, nge ka lapaune angeice kow. Matre ame la kola hnyinge koi angeic, tre, tro angeice lai a sa hmekune la itre hna qaja hnei Tusi Hmitrötr, ngo tha thenge kö la itre sipu mekuna i angeic maine itre ini ne la itre hmi ka thoi.—Mat. 7:21-23; 2 Tim. 2:15.
Angeic a nyipiewekëne la hna amekötine hnei Tusi Hmitrötr, ene la troa icasikeu memine la itre hlue i Iehova e ijij.—Sal. 122:1; Heb. 10:24, 25.
Atre hnyawa hi angeic la hna qaja hnei Tusi Hmitrötr göi kuci ngazo, kola qaja la nyi xetë, me nyimu föe, me trahmanyi ka ce meköl me trahmany, maine lue föe pena. Nge angeic a mele thenge la hnei angeic hna inin. Maine föe angeic, nge kola ce lapa trefën memine la ketre trahmanyi, loi e tro nyidroti a faipoipo ngöne la mus.—Mat. 19:9; 1 Kor. 6:9,10; 1 Tim. 3:2, 12; Heb. 13:4.
Angeic a nyipiewekëne la hna wathebone hnei Tusi Hmitrötr göi troa iji menu la kahaitr. Nge, tha angeice kö a xome la itre xa ewekë ka troa adrone me angazone la ngönetrei me mekune i angeic, tune la itre dorog. Tro hi a xom e hna amekötine hnei droketre.—2 Kor. 7:1; Efe. 5:18; 1 Pet. 4:3, 4.
Trotrohnine hi angeic la enyipiewekëne la troa kötrene la itre sine elo ka ngazo.—Ite edomë 13:20.
Ase hë angeice trije paluane la hmi i angeic ekö. Tha hmi hë angeic me angatr, me sine la itre huliwa i angatr, maine sajuëne pena.—2 Kor. 6:14-18; Hna ama. 18:4.
Tha lö hnine kö angeic la kuci politik.—Ioane 6:15; 15:19; Iako. 1:27.
Angeice a kapa la hna qaja ngöne Isaia 2:4 göne la itre icilekeu ne la fen, me trongëne la hna qaja e cili.
Aja i angeice hi troa hane ketre Atre Anyipici Iehova.—Sal. 110:3.
9 Maine tha nyipi mama kö kowe la lue qatre thup ka hape, tha nyipi trotrohnine kö la atr la itre xa ini, tro nyidroti a sipo angeic troa xom, me ce ithanatane me angeic la itre xa xötr ne la Tusi Hmitrötr ka mama. Loi e tro angeic a trotrohnine laka, maine angeic a ajan troa hane ce cainöj memine la Itretre Anyipici Iehova, nyipiewekë tro angeic a mele thenge la itre hna amekötine hnine la Tusi Hmitrötr. Tro la itre mekune hnei angeic hna hamën a xatuane la itre qatre thup troa atrehmekune ka hape: Trotrohnine kö angeic la itre ewekë hna thel thei angeic? Nge, ijij angeice kö troa xom la huliwa ne cainöj?
10 Maine ka eatrëne fe hë angeice la itre hna amekötin, loi e tro la itre qatre thup a canga ithuemacanyi angeic ka hape, kola kepe angeic troa hane cainöje trootro. Nge, loi e troa ithuemacanyine lai ngöne la kola nyipune la kola ce ithanata. (Rom. 15:7) Troa ithuecatre koi angeic troa nyiqaane cainöj me hane hamëne la rapor ne hna cainöje i angeic ngöne la pune treu. Tro la itre qatre thup a qaja koi angeic ka hape, ame ngöne la kola kapa la ketre hnainin matre troa ketre atre cainöj hna tha bapataisone petre kö, nge kola hane xötrei hamën la rapor ne hna cainöj, haawe, e cili kola kuca la ketre pepa ngöne la ëje i angeic hna hape, Activité du proclamateur (Fichier de la congrégation) me amë hnine la dosie ne la ekalesia. Loi e troa thuemacanyi angeice hnyawa laka, itre qatre thup asë a wangatrune la huliwa ne la itretre cainöj ngöne la nöjei treu.
11 Ame la easë a thele troa atre angeic, nge easë a nyipiewekëne la hnei angeic hna kuca, tro ha hetre thangane ka loi koi angeic. Tro lai a upi angeic troa catre nyihlue i Iehova me hamëne palahi ngöne la nöjei treu la rapor ne hna cainöj.—Fil. 2:4; Heb. 13:2.
12 E öhne hnyawa ha hnene la itre qatre thup laka, kola eatrëne hnene la hnainin la itre hna amekötin göi troa hane cainöje trootro, haawe, tro hë angeic a kapa la itus hna hape, Organizasio Ka Kuca La Aja i Iehova. Thupene la hnei angeic hna hamën la pane rapor ne cainöje i angeic, tro ha hane thuemacane la ekalesia, ka hape, ketre atre cainöje fe hë angeic hna tha bapataisone petre kö.
IXATUA KOWE LA ITRE THÖTH
13 Ijije fe kowe la itre nekönatre troa hane trongëne la itre hna amekötin göi troa cainöjëne la maca ka loi. Hnei Iesu hna hane kapa la itre nekönatr ka tro koi nyidrë, nge hnei nyidrë hna amanathithi angatr. (Mat. 19:13-15; 21:15,16) Ngacama itre keme me thine la atrekë hnëqan la itre nekö i angatr, ngo troa ajane fe hnene la itre xa atrene la ekalesia troa xatuane la itre thöth ka ajane troa hane cainöjëne la maca ka loi. Maine hetre nekö i nyipunie, tro la tulu ka loi hnei epuni hna hamën ngöne la hna cainöje trootro, a xatua angatr troa catre ngöne la huliwa ne cainöj. Maine ka lolo la aqane ujë ne la ketre nekönatr, nge eje e kuhu hni angeic la ajan troa amamane la lapaune i angeic, ene la troa qaja la maca ka loi kowe la itre xa atr, nemene la itre xa nyine tro sa kuca matre troa xatua angeic?
14 Loi e tro la keme maine thin a easenyine la ketre qatre thup, ketre atrene la Komite Göi Huliwa, matre troa ce ithanatane ka hape: Ijije kö kowe la nekö i nyidro ka co troa hane cainöje trootro? Tro la kordinatör ne la lapa ne la itre qatre thup a wange matre tro la lue qatre thup (ame la ketre e nyidro, tre, ketre atren la Komite Göi Huliwa) a ce icasikeu memine la nekönatr me lue keme me thine i angeic, maine ka thupë angeice pena. Maine trotrohnine hnyawa ha hnene la nekönatr la itre ini ka tru ne la Tusi Hmitrötr me amamane ka hape, hetre aja i angeic troa hane cainöjëne la maca ka loi, kolo hi lai a amamane ka hape, nyën a kökötre hnyawa ngöne la nyipici. Thupene la hna wange hnene la lue qatre thup la itre ewekë celë, me itre xa ewekë ju kö thatraqane la itre ka tru, tro nyidro a axeciën ka hape, troa kapa maine tha tro kö a kapa la nekönatr ceitu me ketre atre cainöj hna tha bapataisone petre kö. (Luka 6:45; Rom. 10:10) Ame la kola ce ithanata memine la nekönatr, tha nyipiewekë kö troa ce ithanatan me angeic la itre mekun hna majemine ce wang memine la itre ka tru ke, tha itre hna melëne kö lai hnei angeic.
15 Ame ngöne la ijine ithanata hnene la lue qatre thup memine la nekönatr, loi e tro nyidroti a qaja la madrine i nyidro koi angeic, pine la itre trengecatr hnei angeic hna kuca. Nge, thuecatre jë koi angeic troa hnëkëne amë la mekuna i angeic troa xomi bapataiso. Pine laka, keme me thin la ka huliwa catr troa hamëne palahi la itre ini ne la Tusi Hmitrötr kowe la nekö i nyidro, meköti fe tro hane qaja aloinyi nyidro. Loi e tro la lue qatr thup a upi nyidro troa e la itre mekun hna hape, “Ithuemacanyi Kowe La Keme Me Thin Ka Nyihlue i Iehova,” ka mama ngöne la götrane 165-166, matre aijiji nyidro troa xatuane la nekö i nyidro.
SA XEPU ME BAPATAISO
16 Atre hë epuni la pengöi Akötresie, nge hetre ihnimi epuni hë koi Nyidrë. Ketre, epuni a trongëne la itre hna amekötin hnei Akötresie, me cainöje trootro. Haawe, ame hë enehila, nyipiewekë tro hë epuni a acatrene la aqane imelekeu i epun me Iehova. Maine aja i epun troa eatrëne lai, loi e tro epuni a sa xepu koi Nyidrë, me nyihatrene lai hnene la hna bapataiso hnine la tim.—Mat. 28:19, 20.
17 Ame la troa sa xepu, tre, mel hna ketre amë kö thatraqane la huliwa i Akötresie. Ame la troa sa xepu koi Akötresie, tre, ene la troa qaja me sisinyi koi Nyidrë jëne la thith laka, epuni ha nue la mele i epun troa nyihlue i Nyidrë me xötrëne hnyawa la itre jë i Nyidrë. Kolo lai a hape, troa thili koi Nyidrëti hmekuj epine palua. (Deu. 5:9) Celë hi aqane tro lai a sa xepu koi Akötresie. Matre isa qanyi epuni kö isa axecië mekun. Tha qanyi ketre kö troa axeciën thatraqai epun.
18 Nyipici laka, tro epuni lai a qaja koi Iehova ngöne la gaa sihngödre laka, epuni a ajan troa nyihlue i Nyidrë. Ngo, nyipiewekë fe tro nyipunie a amamane kowe la itre atr ka hape, ka sa xepu fe hë epuni koi Akötresie. Matre loi troa bapataiso epuni hnine la tim matre mama koi nöjei atr tui Iesu. (1 Pet. 2:21; 3:21) Maine ase hë epuni mekune troa nyihlue i Iehova, me hane xomi bapataiso, nemene la nyine tro epuni a kuca? Loi e tro epuni a thuemacane la kordinatör ne la lapa ne la itre qatre thup. Tro hë nyidrëti a wange matre tro la itre qatre thup a ithanata me epun matre troa xecie hnyawa koi angatr ka hape, epuni a trongëne la itre hna amekötin hnei Akötresie göi troa xome la Bapataiso. Maine epuni a aja itre xa ithuemacany, wange hmaca ju la götran hna hape, “Ithuemacanyi Kowe La Atre Cainöje Tha Hna Bapataisone Petre Kö” götrane 167-169 ne la itusi celë, me “Itre Hnyinge Thatraqai Itre Ka Ajane Troa Xome La Bapataiso,” götrane 170-208.
RAPOR GÖI AQANE KÖKÖTRE LA HULIWA NE CAINÖJ
19 Ketre ithuecatre ka tru palahi kowe la itre hlue i Iehova, la kola traqa la itre rapor göne la hmi ka wië e cailo fene hnengödrai ngöne la itre macatre ka ase hë. Qaane lo Iesu a qaja amamane kowe la itretre drei nyidrë laka, tro ha cainöjëne la maca ka loi e cailo fen, kola wanga atrune hnyawa hnene la itre nyipi keresiano la aqane trongene la huliwa cili.—Mat. 28:19, 20; Mar. 13:10; Ite hu. 1:8.
20 Hna nyipiewekën ekö hnene la itre pane keresiano la itre rapor göne la aqane kökötre la huliwa ne cainöj. (Mar. 6:30) Haawe, kola thuemacanyi së hnene la tusi Ite Huliwa laka, ame lo kola nenge la uati hmitrötr hune la itretre dreng ngöne lo Penetekos macatre 33 M.K., hetrenyi la 120 lao atr. Canga elë hi la etrun, 3 000, nge thupene lai 5 000. Öni Tusi Hmitrötr, hnei “Iehova hna nyi xane koi angat’ o drai la ite ka troa mel,” nge “kösau la nöjei ate huj’ a hane kapa la lapaun.” (Ite hu. 1:15; 2:5-11, 41, 47; 4:4; 6:7) Eje hi laka, ixatua ka tru kowe la itretre dreng la angatr a kapa la itre rapore ka tune lai. Eje hi laka, hna upi angatr hnene lai itre rapore cili troa catre eatrëne palahi la huliwa hna ahnith koi angatr hnei Akötresie, ngacama kola icilekeu me angatr hnene la itre hene hmi ne Iudra.
21 Ame ngöne lo macatre 60 koi 61 M.K., hnei Paulo hna qaja ngöne la tusi angeic koi angetre Kolose, ka hape, ame la maca ka loi, tre, kola traqa kowe “la fene hnengödrai asëjëihë; me kola wa nyimute.” Nge hna “cainöjëne [la maca ka loi] kowe la nöjei ate asëjëihë e celë fen.” (Kol. 1:5, 6, 23) Hnene la itre pane keresiano hna drengethenge la Wesi Ula, matre hnene la uati hmitrötr hna aijiji angatr troa eatrëne hnyawa la huliwa ne cainöj, ketre huliwa ka tru catr, qëmekene troa lep apatrene e Ierusalema lo macatre 70 M.K. Ketre ithuecatre ka tru kowe la itretre catre cainöj troa drei mejene la itre huliwa hna kuca!
Epuni kö a isine matre troa eatr la huliwa ne cainöj qëmekene troa traqa la pun?
22 Ketre tune mina fe enehila, kola thele hnene la organizasio i Iehova troa hamëne la itre rapor ngöne la hna cainöj e cailo fen, nge kola eatrëne la hna qaja ngöne Mataio 24:14, kola hape: “Tro ha cainöjëne la maca ka loi celë ne la baselaia e cailo fene nyine anyipicine kowe la nöjei nöj ; ame hna traqapi la pun.” Matre, celë hi huliwa ka tru nyine tro sa canga kuca. Nyipiewekë tro sa isa canga thele troa eatrëne lai qëmekene troa traqa la pun. Tro Iehova a thupëne matre troa eatrëne hnyawa la huliwa cili. Ketre, e tro sa hane eatrëne la huliwa cili, tro ha kepe së hnei Nyidrë.—Ezek. 3:18-21.
RAPOR NE HNA CAINÖJ
23 Nemene la itre ithuemacany nyine tro sa hamëne hnyawa ngöne la rapore së? Eje e hnine la rapor ne hna cainöje trootro (hna hape, Activité de prédication) hna hamëne hnei organizasio, la itre nyine tro sa nyialien, göne la hne së hna kuca ngöne la huliwa ne cainöj. Ngo, tro fe a xatua së hnene la itre ithuemacanyi hna hamën e cahu fen.
24 Fene la hna cinyihan hna hape, “Publications (imprimées ou électroniques),” amë ju la etrune la itre itus hnei epuni hna hamëne kowe la itre atr ka tha xome petre kö la bapataiso. Fene la hna hape “Vidéos montrées,” amë ju la etrune amamane epun la ketre video së.
25 Ame fene la hna cinyihan ka hape, “Nouvelles visites” (Iwaihmaca), cinyihane jë la etrune la itre iwaihmaca hnei epuni hna kuca göi tro palahi a hetre aja ne lo itre atr ka tha anyipici Iehova kö. Troa nyiqaane e lai ketre iwaihmaca, e hna wange hmaca lo lai atr ka hetre hni ne ajan lo hna öhne hë ngöne lo xötrei iöhny. Tro la kem maine thin a e la ca iwaihmaca e nöjei wiik ngöne la angeic a iujine la hmi hnepe lapa, nge kola sin hnene la nekönatr hna tha bapataisone petre kö. Tha easë hmekuje kö a e la ketre iwaihmaca ngöne la easa wange la ketre atr ngöne la hnalapa i angeic, ngo ngöne mina fe la easa cinyanyi koi angeic, me hë angeic ngöne telefon, maine kola iupifë maca ngöne telefon, maine ngöne ëternet, maine ngöne la kola tro fë itus koi angeic, maine jë kolo ketre zonal hna hnyipi kapa. Ame ngöne la nöjei ijin epuni a ini Tus memine la ketre atr, loi e tro epuni a e lai ceitune me ketre iwaihmaca.
26 Ngacama hna majemine aca kuca la ini Tus ngöne la nöjei wiik, ame ngöne la rapor hna hamën e nöjei treu, tro hi a hamën la ca ini Tus. Tro la itretre cainöj a cinyihan la isa etrun la itre ini Tusi angatr hna kuca ngöne la treu. Kola e la ca ini Tus ngöne la kola inine la Tusi Hmitrötr memine la itre atr ka tha xome kö la bapataiso. Maine kola sipo epuni hnene la Komite Göi Huliwa troa inine la Tusi Hmitrötr memine la ketre trejine trahmanyi maine föe ka nango nanazije hë, haawe, ijije hi tro epuni a e lai ceitune me ketre ini Tus. Ketre, nyipiewekë troa e fe la ketre ini Tus hna kuca kowe la hna hnyipi bapataison, ke tha fenesi pala kö angeic la itus Ini Tusi Hmitrötr me “Ihnimi Akötresie.”
27 Nyipiewekë troa hamëne hnyawa la itre “Heures de prédication” (Hawa ne hna cainöj). Eje hi lai laka, ame la xötre hnëewekë celë, tre, kola qaja la etrune la traeme hnei epuni hna xom troa cainöje ngöne itre hnalapa trootro, me troa iwai hmaca, me troa kuca la itre ini Tus, maine troa cainöj kowe la itre atr ka tha nyihlue i Iehova kö ngöne la nöjei ijin, maine ngöne la gaa tru atr. E kola ce cainöj hnene la ala lue, tro nyidroti a ce e la itre hawa ne cainöje nyidro, ngo ala casi hi la ka troa e la itre visit maine itre ini Tusi hna kuca. Ame la keme me thin ka ce hamën la itre ini kowe la itre nekönatr ngöne la ijine hmi hnepe lapa, tro fe nyidroti a ce e la ca hawa e nöjei wiik. Tro la itre trejin trahmany ka cile fë la cainöj koi nöjei atr, a hane e la traeme i angatr. Tro fe la ka ujën la cainöj (trejine trahmany maine föe) a hane e la traeme i angeic. Tha hna e kö la traeme hna xome kowe la itre xa huliwa ka nyipiewekë. Kola qaja troa hnëkë troa cainöj, me troa sin la ketre icasikeu göi cainöj, me komisio.
28 Nyipiewekë tro la ka cainöj a drengethenge la mekuthetheu i angeic hna inin hnei Tusi Hmitrötr matre troa atrehmekune la aqane troa e la traem hna kuca ngöne la hna cainöje trootro. Kola cainöj hnei itre xan ngöne la itre götran gaa tru atr, nge ame pena itre xan, troa pane trongën la itre gojeny ka nany matre troa cainöj ngöne la itre götran laka, tha tru kö hnei atr ka lapan. Ka isapengöne catre la itre teritoare; nge isapengöne kö la aqane goeëne la itre ka cainöj la huliwa ne cainöje i angatr. Tha Lapa Ne Xomi Meköt kö a musinën la mekuthetheu ne la itretre cainöj göne la aqane troa e la traem hna xom ngöne la huliwa ne cainöj, nge pëkö ketre hna acile troa musinëne lai.—Mat. 6:1; 7:1; 1 Tim. 1:5.
29 Ame göi traeme ne hna cainöj nyine amë ngöne la rapor, loi e troa pexeje la itre hawa (maine 10 h 40 mn, amë ju hi la 10h, nge xome jë pë hë la 40 menetre thatraqai rapore ne treu hnapin). Ngo, ame göi itretre cainöj ka qatre catre hë, nge ka lapa hnalapa pë hë, maine ka lapa ngöne ketre uma ne ithupë maine inyië pena, maine hetre xa kepine kö matre kola umë tre, hetre ewekë hna hnëkëne thatraqai angatr. Ijije hi tro angatr a amë la 15 lao menetr ngöne la rapore i angatr. Maine 15 hi lao menetre ne cainöj ngöne la treu, haawe, nyipiewekë tro angatr a hamën la traeme cili matre troa e angatr ceitune me ketre atre cainöjëne la Baselaia. Hna amekötine mina fe lai kowe la ketre trejine ka thatreine tro, pine laka ka wezipo maine ka eatre pena. Ngo eje hi lai laka, ame la hna amekötine cili, thatraqane hi la itre trejine laka thatreine palaha angatr troa hane xome la huliwa ne cainöj. Qanyine la Komite Göi Huliwa troa amekötine ka hape, drei la trejin ka ijij kowe la hna hnëkëne celë.
PEPA ACTIVITÉ DU PROCLAMATEUR (FICHIER DE LA CONGRÉGATION)
30 Ame ngöne la nöjei treu, epuni a hamën la itre hawa me itre huliwa hnei epuni hna kuca; nge hna fejane lai hnine la pepa, Activité du proclamateur (Fichier de la congrégation). Ame la itre pepa cili, tha kowe kö la itretre cainöj. Maine epuni a troa saze ekalesia, thuemacane jë la itre qatre thup ne la ekalesia i epun. Tro la seketere ne la ekalesia hnei epuni hna tro kow a sipone la dosie i epun, Activité du proclamateur (Fichier de la congrégation) thene la ekalesia i epuni hnapan. Maine atre hi hnene la seketere ne la ekalesia i epun la ëjen la ekalesia hnei epuni hna troa tro kow, haawe, tro angeic a iupi fë mekötine la dosie i epun cememine la ketre tusi göi epun. Kolo hi lai a aijijën la itre qatre thup ne la ekalesia i epun ka hnyipixe, troa kepe epun me hamëne la ixatua ka ijij matre acatrene la lapaune i epun. Nge, maine tro epuni a pane patr koi köni treu qa ngöne la ekalesia, loi e tro epuni a hamëne palahi la rapor ne hna cainöje i epuni kowe lo ekalesia i epun.
KEPINE MATRE EASA HAMËN LA RAPOR NE HNA CAINÖJ
31 Hnei epuni kö hna lapa thëthëhmine troa hamën la rapor ne hna cainöje i epun? Nyipici laka, loi e troa amekunë së e itre xa ijin. Ngo, maine ka meköti la aqane waiewekë së göi troa hamën la rapor ne hna cainöje së, nge easa trotrohnine hnyawa fe la kepine matre nyipiewekë troa eatrëne lai, haawe, tha tro kö a jole koi së troa mekune me hamëne la rapore së.
32 Itre xan a isa hnyingëne thele me hape: “Pine laka, atre hnyawa hi Iehova la hnenge hna kuca ngöne la huliwa i Nyidrë, hnauëne kö la tro ni a hamën la rapore i eni kowe la ekalesia?” Nyipici, atre hnyawa hi Iehova la hne së hna kuca, nge atre hnyawa fe Nyidrë ka hape, easë a kuca la huliwa së cememine la hni së ka pexej. Nge, atre fe hi Nyidrë ka hape, easë hi a hamëne la hnepe ka co hi koi Nyidrë. Ngo, mekune hnyawa kö laka, hnei Iehova lo hna kuca matre troa cinyihane la etrune la itre drai ne Noa e hnine lo aka, memine la itre macatre ne pane tro angetre Isaraela ngöne la hnapapa. Hnei Nyidrëti mina fe hna kuca matre troa cinyihane hnine la itre itus, la etrune la itre ka mele nyipici koi Nyidrë, memine la itre ka icilekeu me Nyidrë. Hnei Nyidrëti mina fe hna kuca matre troa cinyihane la aqane trongene la kola thapa la nöje Kanana hnei angetre Isaraela, memine la itre huliwa hna kuca hnene la itretre amekötin ka mele nyipici. Nyipici, hnei Nyidrëti hna hamën la itre ithuemacanyi ka nyimutre göne la itre huliwa hna kuca hnene la itre hlue i Nyidrë. Hnei Nyidrëti hna kuca matre troa cinyihane la itre ewekë celë, jëne la uati hmitrötre i Nyidrë. Kolo hi lai a amamane hnyawa koi së la mekuna i Nyidrë göi troa hamëne la itre rapore ka meköt.
33 Kola amamane hnyawa hnene la itre ewekë hna cinyihan hnine la Tusi Hmitrötr, la emekötin me enyipicine la itre rapor hna lapa fë hnyawa hnene la nöje i Iehova. Maine tha hnei Tusi Hmitrötre ju hna hamëne hnyawa la etrune la itre atr, me itre ewekë, tha tro kö lai a ketri së hnene la itre hna melën hna qaja e hnine la Tusi Hmitrötr. Drei cahu itre ceitun: Genese 46:27 me Esodo 12:37; Angete Amekötin 7:7; 2 Ite Joxu 19:35; 2 Aqane lapa ite Joxu 14:9-13; Ioane 6:10; 21:11; Ite Huliwa 2:41; 19:19.
34 Ngacama tha hnene kö la rapore së hna qaja asë la itre hne së hna kuca thatraqane la hmi së, ngo ka nyipiewekë catr itre ej. Ame lo hneijine i Iesu, hnene la ange aposetolo hna hamëne la rapore i angatr koi Iesu ngöne la angatre a bëek qa hna cainöj, kola “amaman’ asë koi nyidëti la hnei angate hna kuca me ini.” (Mar. 6:30) Ame e itre xa ijin, kola amamane hnene la itre rapor laka, loi e tro sa wanga atrune la ketre götrane ne la huliwa ne cainöje së. Maine nyipici laka, kola mama ngöne la itre rapore la aqane kökötre së ngöne la itre xa götrane la huliwa, ngo ame pë hë ngöne la itre xa götrane kola mama laka, tha elë hë la etrune la itretre cainöj. Maine jë, nyipiewekë troa hamë ithuecatr, maine hetre ketre jole pena nyine troa seng. Loi e tro la itretre thupëne la ekalesia a wange hnyawa la itre rapore hna hamën, me thele troa nyinyine la itre jol matre tha tro kö a sawa la itre xa ka cainöj maine ekalesia asë troa catre huliwa i Akötresie.
35 Ka nyipiewekë fe la itre rapore kowe la organizasio matre troa atre la itre götrane gaa aja ka cainöj. Ekaa la itre götrane laka, kola elë la etrune la itre atr ka kapa la nyipici? Ekaa la itre götrane laka, tha kökötre nyimenyime kö la itre atr ngöne la nyipici? Nemene la itre itusi hna ajane matre tro la itre atr a atre la nyipici? Tro la itre rapore hna hamëne a aijijëne la organizasio troa hnëkëne amë la itre itus hna ajane göi troa tro fë ngöne la itre xa götrane la fen, me thel troa eatrëne lai.
36 Nyine ithuecatre koi së la itre rapor. Easa haine la easa drenge la huliwa hna kuca hnene la itre trejin ngöne la fen asë. Ame la itre rapor ka qaja la aqane elë la etrune la itretre cainöj, tre, itre ej a xatua së troa trotrohnine hnyawa la aqane haöthe la fen hnene la huliwa hna kuca hnene la organizasio i Iehova. Ame göi itre ewekë hna melën hnene la itre trejin, tre, kola akeukawane la itre hni së, me xatua së troa cile catr; itre ej a upi së troa nue la trengecatre së troa cainöj. (Ite hu. 15:3) Haawe, nyipiewekë tro sa hamëne palahi la rapor hne së hna cainöj. Celë hi hatrene la ihnimi së kowe la itre trejine me easë e cailo fen. Ketre, celë hi aqane tro së lai a amamane ka hape, easë a lapa fene la organizasio hna acile hnei Iehova. —Luka 16:10; Heb. 13:17.
ISA HNËKËN AMË JË LA ITRE MEKUN NYINE EATRËN
37 Tha loi kö e tro sa aceitunëne la huliwa së ngöne la hna cainöj me ketre. (Gal. 5:26; 6:4) Isa pengöne kö la itre aqane mele së, matre tha ceitune kö la itre hne së hna isa atreine kuca. Ngo, loi e tro pe sa isa hnëkën amë la itre mekune ka ijij nyine tro sa eatrën. Nge, tro ha mama e cili ka hape, easa maca trootro ngöne la hna cainöj. E tro sa eatrëne la itre aja së ngöne la hna cainöj, tro hë së lai hetrenyi la madrin.
38 Eje hi laka, Iehova hë a icasikeune nyimenyimën la itre atr hnei Nyidrëti hna troa amelene pe ngöne lo “akötr atraqatr.” Easë a mele ngöne la ijine kola eatr la hna perofetane hnei Isaia, hna hape: “Tro ha ala thausane la ala xalaith, nge tro ha nöje ka cate la ka co ; tro ni Iehova a asaqen’ eje ngöne la ijin’ ej.” (Hna ama. 7: 9, 14; Is. 60:22) Ketre manathithi ka tru troa ketre hlue ne la maca ka loi ngöne la itre drai tixenuë celë!—Mat. 24:14.