Kola Sa La Itre Hnyinge i Nyipunie

◼ Troa aije a tro koi itre icasikeu me cainöje hnei ketre, qëmekene troa aijijë angeice troa bapataiso?

Ame la troa xome la bapataiso, tre, celë hi ketre mekune ka tru catr hna troa axeciëne hnene la atr. Celë hi matre, qëmekene troa kapa la ketre atr troa bapataiso, nyipi ewekë tro angeic a atre hnyawa la hnei Akötresie hna thele thei angeic. Ketre, loi e troa mama ka hape, ka catre melëne hë angeice la itre hna amekötine hnei Akötresie.

Hna amekötine kowe la itre Keresiano troa ce sine pala hi la itre icasikeu, haawe, loi e tro fe a mama thene lai atr ka ajane troa xome la bapataiso, ka hape, ka hane sine pala hi angeice la itre icasikeu. (He. 10:24, 25) Nge ka hane fe hë angeice lapa hamë mekun. Ketre, ka hane fe hë angeice sine la Ini Ne Cainöje Qaathei Akötresie, ngacama tha hna thele kö lai thene la atr ka ajane troa xome la bapataiso.

Ketre, pine laka hna upe la itre Keresiano troa cainöjëne la maca ka loi me inine la itre atr, haawe, loi fe troa hane mama thene lai atr ka ajane troa bapataiso, ka hape ka hane xome pala hi angeic la huliwa ne cainöj. (Mat. 24:14; 28:19, 20) Ije treu ne hane hë angeic xome la huliwa ne cainöj qëmekene troa bapataiso? Eje hi lai laka, loi e mama jëne la aqane xome angeic la huliwa ne cainöj, laka, eje hnyawa ekuhu hni angeic la ajane troa hane catre cainöjëne lapane la maca ka loi, ketre treu me ketre treu. (Sal. 78:37) Ngo thaa nyipi ewekë kö troa treqene troa tru menu pala ha la itre treu ne cainöje angeic, matre hane jë kepe angeic troa bapataiso. Tune kaa la itre hawa ne cainöje i angeic ngöne la treu? Pëkö hna amekötin. Loi e tro la itre qatre thup a mekune la isa pengöne la itre atr ka ajane troa bapataiso, me atreine tulu ewekë.—Luka 21:1-4.

Tro la itre qatre thup (maine itre drikona e tha tru kö hnei qatre thup hnine la ekalesia) ka ce ithanata memine lai ka mekune troa bapataiso, a mekune hnyawa laka, ka isapengöne la itre atr, nge loi e tro fe angatr a atreine waiewekë ngöne la angatr a troa axecië mekun. Ka loi fe troa eje ekuhu hni ne la atr ka pi bapataiso, la ajane troa hane ketre Atre Anyipici Iehova, nge loi e tro fe angeic a amamane la aqane wangatrune angeice la manathith, ene la troa hane ce memine la organizasio i Iehova me cainöjëne la maca ka loi. Troa mama fe kowe la itre qatre thup ka hape, ka maca ha angeic troa tro fë la huliwa ne cainöj maine tro pala kö a treqen matre macaje jë angeic ngöne la götrane la ua. Maine kola mekune hnene la itre qatre thup ka hape, tha ijije petre kö koi angeic troa xome la bapataiso, loi e tro angatr a pane qaja hnyawa koi angeic jëne Tusi Hmitrötr la itre kepin matre angatr a axeciëne lai mekune cili, me thele troa hane xatua angeic.