Ini Qaathene La Itretre Cainöj Ka Maca

Ka tru koi së la itretre cainöj ka maca ngöne la ekalesia. Ame itre xan, nyimu macatre ne huliwa nyipici hë angatr koi Iehova. Nge ame pena itre xan, ngacama itre ka xötrei cainöj angatr, ngo ame pe canga maca hi angatr troa cainöj. Öhne hnyawa ha hnene la itretre cainöj cili la aqane eatrongëne Iesu la ekalesia i Keresiano ngöne la itre drai hnapin. Kola mama ngöne la aqane kökötre la huliwa ne cainöj memine la huliwa ne ini Tusi Hmitrötr. (Mat. 28:19, 20) Hnei angatr hna kapa “la etrune la men” ngöne la angatr a tro fë la maca, me ngöne la angatr a cile kowe la itre itupath me itre jol ka eje thei angatr. (2 Kor. 4:7) Hetre ini nyine tro sa kapa qaathene la itre ka maca hnyawa troa cainöj. Madrine catre angatr troa hane ce thawa memine la itre xan la itre hnei angatr hna inin. (Sal. 71:18) Celë hi matre, loi e tro sa thele troa hane kapa la itre ini qaathei angatr. Troa tune kaa?

Ngöne La Hna Cainöj. Nyipi ewekë troa kapa la ixatua hnene la itre ka xötrei cainöj me itre ka tha maca hnyawa petre kö, matre troa hetre thangan la huliwa i angatr. Tro angatr a maca troa cainöj, e hnei angatr hna goeëne la aqane huliwa ne la itretre cainöj ka maca. (Wange ju la Ita Ne Thup ne 15 Febuare 2015 hna hape “Acatrëne Jë La Aja i Epuni Troa Cainöj” ngöne la hnaakönine paragaraf hna nyi tan mekune ka co ka hape “Xatuane Jë La Ka Xötrei Bapataiso.”) Hnei epuni kö hna hane kepe thangane ka loi qa ngöne la hna ce cainöj me angatr?

Ijije fe kö tro epuni a ce cainöj me angatr? Maine sinatr lai treijn ka maca, ce traqa pi e itre xa ijin memine la atr hnei epuni hna ini Tusi memin, kowe la hnalapa i angeic. Thupene la hna ini Tus, sipone jë kowe lai trejin ka maca troa hamë ixatua me eamo.

Isa Xomi Ijine Jë Troa Ce Me Angatr: Thele jë troa atre la itretre cainöj ka maca, hnene la hna xomi ijine troa ce me angatr. Sipone jë kowe la ketre e angatr troa hane sine la hmi ne la hnepe lapa i epun, nge hnyinge jë koi angeic. Maine sinatr lai trejin, maine jë troa ce wang matre troa kuca la hmi ne la hnepe lapa ngöne la hnalapa i angeic. Hnyingë angeice jë la aqane atre angeic la nyipici. Nemene la itre manathith hnei angeic hna kapa? Nemene la hnei angeic hna öhn, ka amamane la aqane kökötre la huliwa ngöne la nöje i angeic? Nemene la madrine hnei angeic hna kapa qa ngöne la hna nyihlue i Iehova?

Loi e tro sa itrotrohni me atreine waiewekë ngöne la easa thele ixatua thene la trejin ka sinatr. Ame asë hi la itre trejin ka maca, tre, isa hetre hnei angatr hna atreine kuca ngöne la huliwa ne cainöj. (Ro. 12:6-8) Ame itre xan, tre kola uti ipië trootro, nge hna nyi ifegone hë la hnei angatr hna atreine troa kuca ngöne la hna cainöj trootro, maine tro pena a hane ce me easë. Ngo ame pe, tru catr la itre ini hne së hna troa xome qa ngöne la tulu i angatr, ke hnei angatr hna catre cainöj me mele nyipici koi Iehova.