Mekune Kö Lo Lapaune Ne La Itre Qatr Föe Me Trahmany
1 Ngacama sine föe Ana, nge 84 hë lao macatre i eahlo, ngo “thaa qa kö hna pate ngöne la ēnē.” Hnene la aqane mele nyipici i eahlo, matre ketre pengöne kö la aqane pane amanathithi eahlo hnei Iehova. (Luka 2:36-38) Ame enehila hetrenyi fe thene la itre trejine trahmanyi me föe, la aqane mekun ka eje thei Ana, ngacama angatre fe a hane cile kowe la itre itupathi ka tru. Maine jë ame ngöne la itre xaa ijin, tro la itre qatr a nango kucakuca qa ngöne laka, hna tithi angatr hnene la itre sine mec, maine hnene laka, kola uti ipië trootro. Tro sa ce wang la itre xaa aqane tro sa ithuecatr koi angatr, me xatua angatr troa cile huti pala hi ngöne la götrane la ua.
2 Itre Icasikeu Me Huliwa Ne Cainöj: Kola hane sine pala hi hnene la itre trejin qatr la itre icasikeu i Keresiano, hnene laka, hetrenyi la itre xaa trejin ka hnimi angatr me tro thei angatr kowe lai itre icasikeu. Kolo lai a acatren la lapaune ne la itre trejin trahmany me föe ka qatre hë, nge ka qea ha hna nyihlue i Akötresie, nge ketre, nyine manathithi fe lai kowe la ekalesia. Hapeu, hane kö epuni xome la huliwa ka loi cili?—Heb. 13:16.
3 Hetre madrine ka tru thene la itre nyipi Keresiano, hnene laka, angatr a catre cainöjën pala hi la maca ka loi. Ngo troa ketre itupathi ka tru lai kowe la itre qatr, memine la itre ka wezipo. Hapeu, ijije kö troa hane ce tro me easë hnene lai itre trejin me easë cili, tune la ketre “ate ce huliwa” me easë, ngöne la ketre götrane ne la huliwa ne cainöj? (Rom. 16:3, 9, 21) Maine jë atreine hi tro së a hane hë angeic maine eahlo troa cainöj me easë jëne telefon, maine ce tro me easë pena troa iwai hmaca, maine ini tus memine la itre atr. Maine ka lapa hnuma pë hë la ketre trejine qatr, hapeu, ijije kö tro sa kuca la etid ngöne la hnalapa i nyidrë, matre ijij tro nyidrëti a hane sin?
4 Ini Me Caas: Ame ngöne la itre xaa ijin, itre xan a hën la ketre qatr maine ketre ka wezipo troa hane sin la etid ne la hnepe lapa i angatr, maine tro pena a hane kuca lai ngöne la hnalapa ne la qatr ka kucakuca. Hnene la ketre föe hna inin la Tusi Hmitrötr memine la lue nekö i nyidro ka co, ngöne la hnalapa ne la ketre trejine föe ka qatre hë, hna eköth la etid ngöne la itus, Recueil d’histoires bibliques; hetre thangane ka loi, pine laka, atraqatr la madrine hna kapa hnei angatr asë. Angatre mina fe a madrin troa könë angatr troa xen, maine troa ce kuca la itre xaa ewekë. Maine ka kucakuca pala ha la ketre trejin ka wezipo, maine tro hi së a hane iwai, maine pane cile troa hane e la itre hnepe mekun, me thithi me nyudren, maine troa pane porotrikën la ketre ewekë hna melën ka ithuecatr, hnene la ketre trejin.—Rom. 1:11, 12.
5 Ka sisitria catr koi Iehova la itre qatre trahmanyi me föe ka mele nyipici. (Heb. 6:10, 11) Loi e tro së a xötrethenge la tulu i Nyidrë, me hane amaman la ihnimi së koi angatr, me hane xatua angatr troa cile huti ngöne la götrane la ua.