Xatuane Jë La Itre Xan Troa Atrunyi Iehova
1 Hna tro fë la ketre maca ne iamele kowe la itre atr ne la fen, kola hape: “Qouju e Akötesie, me hamë nyidëti la atrun, ke traqa ha la ijine hnyingëne hnei nyidë ; nge thiliju koi nyidë ate xupe la hnengödrai, me fen, me hnagejë me ite timi ka qeqe.” (Hna ama. 14:6, 7) Hnëqa së la troa iqajakeun la maca cili. Nemen la nyine troa atre hnyawa hnene la itre atr göi Iehova, matre troa hetrenyi thei angatr la xou me hane hmi koi Nyidrëti?
2 Atresiwa i Nyidrë: Nyipi ewekë troa atre hnyawa hnene la itre atr la ëje ne la nyipi Akötresie, matre tro angatr a atreine wangatrehmekunyi Nyidrë qa ngöne la itre haze ka nyimutre ka thoi, hna thili kow enehila. (Deu. 4:35; 1 Kor. 8:5, 6) Hnene la itre ka cinyihan la Tusi Hmitrötr hna sija la ëje i Iehova, kösë 7 000 la etrun nge hetre munën. Maine nyipici laka, easë a thupën la aqane tro sa qaja amaman la ëje i Iehova, ngo thaa tro pi kö së a juetrëne ej, maine troa hmahma me cile hnö troa xome ej. Ame la aja i Akötresie, tre, ene la tro la itre atr a atre la ëje i Nyidrë.—Sal. 83:18.
3 Thiina i Nyidrë: Nyipi ewekë tro la itre atr a atre la pengöi Iehova, maine angatr a ajan troa atrunyi Nyidrë. Loi e tro sa hane thuemacanyi angatr, la elolon la itre thiina ka lolo i Nyidrë, ene la ihnim, me inamacan ka thatrehmekun, me meköt ka pexej, me men ka pucatin asë, me ihnimi ipitö, nge ka tru loi, me itre xane ju kö. (Eso. 34:6, 7) Nyipi ewekë tro fe angatr a inin troa hetrenyi la xoue Akötresie, troa thili koi Nyidrë, me wangatrehmekun laka, angatre a mel hnei Akötresie.—Sal. 89:7.
4 Qale Jë Së Koi Akötresie: Maine kola ajan hnene la itre atr troa mele pe ngöne lo ijine kola troa iameköti hnei Akötresie, laka, calemi hë, loi e tro angatr a hane hën la atresiwa i Iehova cemine la lapaun. (Rom. 10:13, 14; 2 Thes. 1:8) Thaa ene hmekuje kö la troa atre la ëje i Akötresie, memine la itre thiina i Nyidrë. Loi e tro fe së a xatuan la itre atr troa acatren la aqane imelekeu i angatr me Iehova, me mejiune koi Nyidrë hnene la hni angatr ka pexej. (Ite edomë 3:5, 6) Maine tro angatr a trongën la itre hnei angatr hna inin, me xëwe koi akötresie hnene la thith, me öhne la aqane xatua angatr hnei Nyidrë, eje hi lai laka, tro ha kökötr la lapaune i angatr, nge tro hë angatr a fedre catr koi Iehova.—Sal. 34:8.
5 Loi e tro së a catre qaja la ëje i Akötresie me xatuan la itre xan, matre troa atraqatre fe la mejiune i angatr koi Nyidrë, me hane xoue Nyidrë. Ijije pala kö tro sa hane xatuan la itre atr ka nyimutre, matre tro angatr a hane atre Iehova me atrunyi Nyidrë, ke Nyidrëti la “Akötesieti ate amele [së].”—Sal. 25:5.