Qaja Amamane Jë La Elolo i Iehova
1 Önine la atre cinyihane la Salamo ka hape: “Fene hnengödrai asëjëihë fe, nyimajë koi Iehova. . . . E xötëne jë la lolo i nyidë nyipi angete ethen, me ite nyine hai nyidë nyipine la nöjei nöj’ asë.” Ame ngöne la easë a mekune la hna kuca ha hnei Iehova, memine la itre ewekë hnei Nyidrëti hna kuca enehila, memine la itre hnei Nyidrëti hna troa kuca elanyi koi së, ene pe kola upi së troa qaja la lolo i Nyidrë!—Sal. 96:1, 3.
2 Ngöne La Huliwa Ne Cainöje Së: Lolo catr la hnëqa ne la Itretre Anyipici Iehova, la troa tro fë la ëje i Akötresie me atrune ej e nyipine la itre atr e cailo fen. (Mal. 1:11) Drei la eisapengönene lai memine la itre taan la hmi ka thoi, laka, angatr a sipu musi me köletrije la ëje i Akötresie qa hnine la itre Tusi Hmitrötre i angatr! Nyipi ewekë catr troa ahlemune la ëje i Akötresie, matre tro la itre atr a hane lapaune kowe la ëje cili me hëne ej; ketre, matre mele fe angatr ngöne lo ijine akötr atraqatr. (Rom. 10:13-15) Ketre, troa tingetinge la hnengödrai me fene hnengödrai, ene la tingetinge thene la itre atr ka lapaan ej, e hna pane ahmitrötrën la ëje i Akötresie. Eje hi laka, ame asë hi la itre huliwa i Akötresie, tre, hetre itretrengekeune itre ej memine la ëje i Nyidrë.
3 “Atraqate Iehova, nge troa nyipi atrun.” Ngo e tro la itre atr a “[hamëne] koi Iehova la lolo ne la atesiwa i nyidrë,” ke, nyipi ewekë tro angatr a pane atre la nyipici göi Nyidrë. (Sal. 96:4, 8) Ame pe itre xan, angatr a qaja ka hape pëkö Akötresie. (Sal. 14:1) Ame itre xan, angatr a jelengazo Nyidrë ka hape, ka pë mene Nyidrë, maine pena, öni angatr, thaa Nyidrëti kö a hane hnehengazon la mele ne la itre atr. Ame la easa xatuan la itre ka hetre hni ka ajan troa kapa la atrehmekune ne la Atre Xupi së, me itre aja i Nyidrë me thiina ka lolo i Nyidrë, haawe, easë hi lai a atrunyi Iehova.
4 Hnene La Aqane Ujë Së: Easë a atrunyi Iehova, e hne së hna mele thenge la itre trenge wathebo i Nyidrë ka meköt. Thatreine kö troa thaa öhne la thiina së ka lolo. (1 Pet. 2:12) Maine jë tro la elolone la aqane heetre së me isej, a upe la itre xan troa qaja aloinyi së, me aijijë së troa ithanatan la itre manathith hna kapa qa ngöne la hna trongën la itre trepene meköt e hnine la Wesi Ula i Akötresie. (1 Tim. 2:9, 10) Drei la madrine së ngöne la itre xan a ‘goeën la itre huliwa ka loi së me hane atrune la Tretretro së e koho hnengödrai’!—Mat. 5:16.
5 Jëne la trenge ewekë së memine la itre huliwa së, easë a atrune la Akötresi së ka shewengönie ngöne la nöjei drai, ene pe kola sa la ihë: “Nyimajë koi Iehova, atrunejë la atesiwa i nyidë ; amamanejë qan’ e kete drai uti hë la kete drai la iamele i nyidë.”—Sal. 96:2.