Atrunyi Iehova Jë

1. Nemene la hnene la itre atr hna thele panën enehila?

NYIMUTRE la itre atr enehila ka pi mama. Ame la itre xan, angatr a ami foto ngöne la itre réseaux sociaux, matre tro la itre atr a goeë angatr me atre la hnei angatr hna kuca. Ngo tha tru kö la itre atr ka atrunyi Iehova. Ame ngöne la tane mekune celë, tro sa ce wange ka hape, kola hapeu la troa atrunyi Iehova, memine la kepine matre nyipiewekë tro sa atrunyi Nyidrë. Tro mina fe së a ce wange la aqane tro sa atrunyi Iehova, me aqane tro Nyidrëti a atrune la ëje i Nyidrëti elany.

KOLA HAPEUE LA TROA ATRUNYI IEHOVA?

2. Tune kaa la aqane amamane Iehova la mene i Nyidrë ngöne la Wetre Sinai? (Wange ju fe la .)

² Nemene la aliene la troa iatruny? Ame ngöne la Tusi Hmitrötr, kola qaja la kepine matre haine jë la ketre atr. Ame lo Iehova a thapa la angetre Isaraela qa Aigupito, hnei Nyidrëti hna amamane la mene i Nyidrë. Mekune jë la itre ewekë ka traqa. Traqa koi itre milio lao nekö i Isaraela ka lapa fene la Wetre Sinai troa drei Akötresie. Nge hna petrëne la wetr hnene la ketre iaw ka mit. Aca enienije catre jë la wetr me so menu nge kolo fe a keciqa la hedreng, me samek, nge drenge ju hi angatre la mejene trutru ka catr. (Eso. 19:16-18; 24:17; Sal. 68:8) Drei jë kö la angetre Isaraela a pane haine la Iehova a amamane la mene i Nyidrë!

3. Kola hapeue la troa atrunyi Iehova?

³ Ngo ijiji easë kö troa hane atrunyi Iehova? Öö. Ame la ketre aqane tro sa atrunyi Nyidrë, ke ene la troa qaja koi itre xan la men me itre thiina i Nyidrë. Easë mina fe a atrunyi Nyidrë la easa qaja ka hape, qaathei Nyidrë la nöjei ewekë hne së hna kuca. (Isa. 26:12) Hnei Dravita hna amamane la aqane tro sa atrunyi Iehova. Ame la Dravita a thith qëmekene la angetre Isaraela, öni angeice koi Iehova: “Iehova fe, nyipëti la ka draië catr, nge ka men, me mingöming, me lolo, me hmitrötr; ke ame la nöjei ewekë e koho hnengödrai me e celë fen, ke itre ewekë i nyipëti asë hi.” Ame hë la angeic a ase thith, “hnene la icasikeu asë hna atrunyi Iehova.”—1 Aq. Jo. 29:11, 20.

4. Tune kaa la aqane atrunyi Iehova hnei Iesu?

⁴ Ame lo Iesu e celë fen, hnei nyidrëti hna atrunyi Iehova. Tune kaa? Hnei nyidrëti hna qaja amamane kowe la itre atr laka, Iehova la ka aijijë nyidrë troa kuca la itre iamamanyikeu. (Mar. 5:18-20) Ketre, hnei nyidrëti fe hna qeje Iehova koi itre xan, me thiina ka loi koi angatr. Ame lo ketre ijin, nyidrëti a hamë ini ngöne la sunago, nge hetrenyi e cili la ketre föe hna löthe hnei dremoni, a 18 hë lae macatre. Celë hi matre, eahlo a lapa sihnyo nge goi thatreine fe eahlo mejë. Drei jë kö la akötre i eahlo! Tru la utipine i Iesu, matre nyidrëti a easenyi eahlo ju, me hape: “Föe fe, mele hë nyipoti qa ngöne la meci nyipo.” Ame hnei nyidrëti hna ati ime hui eahlo, matre canga egöcatre ju hi eahlo. Nge e cili, eahlo “a nyiqaane atrunyi Akötresie,” ke mele hë eahlo! (Luka 13:10-13) Hetre nyipi kepine matre eahlo a atrunyi Iehova, nge tui easë fe.

NEMENE LA KA UPI SË TROA ATRUNYI IEHOVA?

5. Nemene la itre kepin matre easë a metrötrë Iehova?

⁵ Easa atrunyi Iehova, ke tru la metrötre së koi Nyidrë. Nyimu kepine matre easa metrötrë Nyidrë. Ka Tru Trenge Mene Nyidrë, nge pëkö sai Nyidrë. (Sal. 96:4-7) Nge kola mama la inamacane i Nyidrë ngöne la itre hna xup. Nyidrëti la ka hamë mele koi së, me thupë së. (Hna Am. 4:11) Ka nyipici Nyidrë. (Hna Am. 15:4) Ame asë hi la itre ewekë hnei Nyidrëti hna mekun, ke ka eatre pala hi. Nge tha ka hmaca të kö la itre hnei Nyidrëti hna thingehnaean. (Ios. 23:14) Celë hi matre, öni Ieremia perofeta koi Nyidrë ka hape: “Ame thene la itre ka inamacan ne la itre nöj me nöjei baselaia i angatr, pëkö ka tui nyipë”! (Iere. 10:6, 7) Eje hi, nyimutre la itre kepin matre loi e tro sa metrötrë Iehova. Ngo tha easë hmekuje kö a metrötrë Iehova, easë mina fe a hnimi Nyidrë.

6. Pine nemene matre easa hnimi Iehova?

⁶ Easa atrunyi Iehova, ke tru la ihnimi së koi Nyidrë. Tro sa ce wange la itre xaa thiina i Nyidrë ka uku së troa hnimi Nyidrë. Nyidrëti a nue la itre ngazo me utipi së. (Sal. 103:13; Isa. 49:15) Ame la easa akötr, Nyidrëti fe a hane akötr. (Zaka. 2:8) Nyidrëti a xatua së troa easenyi Nyidrë me nyi sinee i Nyidrë. (Sal. 25:14; It. Hu. 17:27) Pine laka, ka ipië Nyidrë, “nyidrëti a thil matre goeëne la hnengödrai memine la ihnadro, nyidrëti a amejëne la hna wangacon qa ngöne la xaxau.” (Sal. 113:6, 7) Tha kolo kö lai a uku së troa atrune la Akötresi së?—Sal. 86:12.

7. Nemene la qa i easë?

⁷ Easa atrunyi Iehova, ke aja i easë tro la itre atr a hane atre Nyidrë. Ala nyimu la itre ka thatre Nyidrë. Pine nemen? Pine laka, Satana a atimekëne la itre atr me sili trengathoi Iehova. (2 Kor. 4:4) Angeic a kuca matre tro la itre atr a mekune ka hape, Iehova la Akötresie ka iakötrë, nge ka pë ihnim, nge zö i Nyidrë la nöjei akötr ka traqa. Ngo ame easë, atre kö easë la pengö i Nyidrë! Matre qa i easë troa jelethoi Satana, me atrunyi Akötresie. (Isa. 43:10) Ame ngöne la Salamo 96, kola qaja la enyipiewekëne troa atrunyi Iehova. Ame la easa qejepengöne la itre xötre cili, lapa mekune jë la nyine tro eö a kuca matre atrunyi Iehova.

TRO SA ATRUNYI IEHOVA TUNE KAA?

8. Qaja jë la ketre aqane troa atrunyi Iehova. (Salamo 96:1-3)

⁸ E jë la Salamo 96:1-3. Easa atrunyi Iehova la easa qeje Nyidrë. Ame ngöne la itre pane xötr ne Salamo 96, kola ithuecatre kowe la itre hlue i Iehova troa “nyima koi Iehova,” me “atrune la ëje i nyidrë,” me “qaja trongëne la maca ka loi ne iamele,” me “qaja trongëne la lolo i nyidrë nyipine la itre nöj.” Celë hi aqane tro sa atrune la Keme së e hnengödrai. Tha cile kö la angetre Iudra, me itre keresiano ekö troa qaja trongëne koi itre xan la hnei Iehova hna kuca koi angatr, me isigöline la ëje i Nyidrë. (Dan. 3:16-18; It. Hu. 4:29) Tro sa nyitipu angatre tune kaa?

9-10. Nemene la ini hne së hna xome qa ngöne la hna melën hnei Angelena? (Wange ju fe la foto.)

⁹ Tro sa ce wange la hna melën hnei Angelena,a ketre trejine föe qa Etazini. Hnei angeic hna isigöline la ëje i Iehova ngöne la hnë huliwa. Angeice petre hi a nyiqaane huliwa, nge hna hëne la itre ka xötrei huliwa troa icasikeu, matre troa isa qaja la pengöi angatr. Hnei angeic hna hnëkë diaporama matre troa amamane koi itre xan la madrine i angeic troa Temoë Iehova. Ngo qëmekene tro Angelena a ithanata, ketre sinee huliwa a pane qeje xapo. Öni xapo, hnei xapo hna tru ngöne la ketre fami Temoë Iehova, nge xapo a hnyimasai easë. Öni Angelena: “Kola mano catre la wenethëhming. Ngo öninge jë hi: ‘Tro kö ni a nue xapo troa sili trengathoi Iehova? Maine tro ni a isigöli Nyidrë?’ ”

¹⁰ Ame la kola ase ithanata hnene la sinee huliwa i angeic, hnei Angelena hna thith e kuhu hni i angeic. E thupen, öni angeic koi xapo: “Ceitui nyiso hi. Hna hetru ni fe ngöne la ketre fami Temoë Iehova. Nge ka Temoë Iehova hë ni enehila.” Pëkö ca ka ithanata, nge tha xou Angelena kö. Hnei angeic hna amamane la itre foto i angeic me itre xaa trejin ka madrine troa nyihlue i Iehova. Nge hnei angeice fe hna qejepengöne la hmi i angeic koi angatr. (1 Pet. 3:15) Nemene la thangan? Ame la kola ase ithanata hnei Angelena, tha wesitre ju hi lo sinee huliwa i angeic. Goi qaja fe xapo la madrine i xapo ekö troa ce lapa me itre xaa trejin. Öni Angelena: “Nyipiewekë tro sa isigöli Iehova. Ketre madrine ka tru la troa qaja la nyipici göi Nyidrë.” Easë fe a madrine troa atrunyi Iehova, ngacama itre xan a qajangazo Nyidrë.

11. Tune kaa la aqane trongëne la Salamo 96:8 hnene la itre hlue i Iehova?

¹¹ E jë la Salamo 96:8. Easa atrunyi Iehova jëne la itre mo së. Qaane ekö, itre hlue i Iehova a atrunyi Nyidrë tune lai. (It. Ed. 3:9) Hnene lo angetre Isaraela hna hamë mani matre xup, me nyihnyawane la uma ne hmi. (2 It. Jo. 12:4, 5; 1 Aq. Jo. 29:3-9) Hnene la itretre drei Keriso hna hamëne “la itre ewekë i angatr,” matre troa xatua nyidrë, me itre aposetolo. (Luka 8:1-3) Nge hnene la itre keresiano ekö hna iupi fë mani kowe la itre xaa trejine hna lepe hnei jiin. (It. Hu. 11:27-29) Ame enehila, easë mina fe a atrunyi Iehova la easa kuië ahnahna.

12. Tune kaa la aqane atrunyi Iehova hnene la itre ahnahna së? (Wange ju fe la foto.)

¹² Tro sa ce wange la ketre hna melën ka amamane la aqane atrunyi Iehova hnene la itre ahnahna së. Hnene la ketre rapor ne 2020 hna qaja la aqane lepe la nöj e Zimbabwe hnene la ketre qaqacil ka tru. Traqa koi itre milio lao atr ka troa mecijiin, tui Prisca ketre trejine me easë. Ngacama kolo ha qaqacil, ngo Prisca pala hi a cainöj e nöjei Merkredi me Vadredi, nge kolo pe lo ijine thitha. Kola hnyimasai angeic hnene la itre ka lapa ezi angeic, ke angeic a tro troa cainöj nge tha tro pe troa hane eëny. Öni angatre koi angeic, “Tro eö lai a mec hnei pi xen.” Ngo sa jë hi angeic, “Tha ase pi kö Iehova nuetrij la itre hlue i Nyidrë.” Tha qea ju kö, nge angeic a kapa la itre xen, me itre xaa ewekë ka nyipiewekë qaathene la organizasio së. Itre ahnahna së la ka aijijëne la organizasio troa iupi fë xen koi angeic. Kola hain hnene la itre ka lapa ezi angeic. Öni angatr, “Tha hna nuetriji eö kö hnei Akötresie, matre eahuni a hane pi atrepengöi Nyidrë.” Ala 7 la ka nyiqaane sine la itre icasikeu ne la ekalesia.

13. Tro la aqane ujë së a atrunyi Iehova tune kaa? (Salamo 96:9)

¹³ E jë la Salamo 96:9. Easa atrunyi Iehova hnene la aqane ujë së. Nyipiewekë tro la itretre huuj ka huliwa ngöne la uma ne hmi i Iehova a porop. (Eso. 40:30-32) Ngo ame kö la ka nyipiewekë, ke ene la troa wië la itre thiina. (Sal. 24:3, 4; 1 Pet. 1:15, 16) Nyipiewekë tro sa nue trengecatre matre troa nuetrije “la thiina hnapan” me heetrëne “la thiina ka hnyipixe.” Kolo hi lai a hape, troa nuetrije la itre aqane mekun me ujë ka akötrë Iehova. Nge easa isine troa mekun me ujë tui Iehova. (Kol. 3:9, 10) Jëne la ixatua i Iehova, tro la itre atr ka isi me ka kuci ngazo a saze me heetrëne la thiina ka hnyipixe.

14. Nemene la ini hnei eö hna xome qaathei Jack? (Wange ju fe la foto.)

¹⁴ Jack la ketre trahmany ka isi nge ka ihumuth, matre hna ati ëje i angeic ka hape, Dremoni. Pine laka, tru la itre atr hnei angeic hna humuth, hna amekötin hnene la hnakootr ka hape, tro angeic a mec. Ngo hnei angeic hna nyiqaane ini Tus memine la ketre trejine ka vizitëne la kalabus. Ngacama ketre atr ka ihumuth ekö, ngo hnei angeic hna nuetrije la thiina hnapan. Matre ijiji angeice hë troa hane xomi bapataiso. Ame hë la ijine kola humuthi angeic, kola treije hnene la itre ka thup, ke saze hnyawa ha Jack. Önine la ketre atr ka trene hnëqa ngöne la kalabus ka hape: “Ame ekö, pëkö ka ngazo thiina tui Jack. Ngo ame enehila, saze hnyawa ha angeic.” Ca wiik thupen, ame la kola traqa hnene la itre trejine ka vizitëne la kalabus, hnei angatr hna iöhnyi memine la ketre hna akalabusin ka xötrei traqa. Nemene la ka upi angeice troa traqa? Hna ketri angeic hnene la aqane saze i Jack, matre angeic a pi atre la aqane troa nyihlue i Iehova. Eje hi, tro la aqane ujë së a atrune la Keme së e hnengödrai!—1 Pet. 2:12.

TUNE KAA LA AQANE TRO IEHOVA A ATRUNE LA ËJE I NYIDRËTI ELANY?

15. Tune kaa la aqane tro Iehova a atrune la ëje i Nyidrëti elany? (Salamo 96:10-13)

¹⁵ E jë la Salamo 96:10-13. Ame ngöne la itre xötr tixenuë ne la Salamo 96, kola qeje Iehova ka hape, ketre Atre Amekötine ka meköt me Joxu. Tune kaa la aqane tro Iehova a atrune la ëje i Nyidrëti elany? Easenyi hë tro Nyidrëti a amekötine me apatrenyi Babulona Atraqatr, ke hnene ej hna adrone la ëj ka hmitrötre i Nyidrë. (Hna Am. 17:5, 16; 19:1, 2) Tro la itre xan a nyiqaane ce nyihlue i Iehova me easë, la angatr a öhne la kola apatrenyi Babulona Atraqatr. Nge ame e Amagedro, tro Iehova a apatrene la fene i Satana. Tro Nyidrëti e cili a apatrene la itre ka icilekeu me Nyidrë, me ka qajangazone la ëje i Nyidrë. Ngo tro pe Nyidrëti a amelene la itre ka hnimi Nyidrë, me idrengethenge me atrunyi Nyidrë. (Mar. 8:38; 2 Thes. 1:6-10) Ame ngöne la pune la 1000 lao macatre, tro Iehova a ahmitrötrëne hnyawa la ëje i Nyidrë. (Hna Am. 20:7-10) Ame la drai cili, “tro ha haöthe la ihnadro hnei atr ka atrehmekune la lolo i Iehova tune la itre tim a hakuthe la trepene hnagejë.”—Habak. 2:14.

16. Nemene hë la nyine tro eö a kuca? (Wange ju fe la foto.)

¹⁶ Tha aqane lolo kö elany, la kola atrunyi Iehova me ëje i Nyidrë hnene la nöjei atr! Ngo ame enehila, isine jë së troa qeje Iehova koi itre xan, me atrunyi Nyidrë hnene la aqane ujë së. Hnene la Lapa Ne Xomi Meköt hna iëne la Salamo 96:8 matre xötr ka troa nyi tane la macatre 2025, kola hape: “Atrunyi Iehova jë, ke nyine atrune la ëje i nyidrë.” Tro la xötre celë a xatua së, matre tha tro kö sa thëthëhmine la hnëqa së.