Inine Jë La Itre Xan La Qene Hlapa Ka Wië
1 Ngacama ka xulu la Itretre Anyipici Iehova qa ngöne la itre ‘nöje ka tru, me itre tribu, me itre atr me itre sepeneqë,’ ngo ka caasi angatr, nge itre trejine ka ihnimi angatr e cailo fen. (Hna ama. 7:9) Ketre ewekë lai nyine hain ngöne la fene celë ka gomegom. Nemen la ka aijijë angatr troa caasi tune lai? Hnene hi laka, hna ‘ujëne la qene hlapa së kowe la aqane ewekë ka wië.’—Zef. 3:9.
2 Itre Thangan Ka Lolo Catr: Nemen la pengön la qene hlapa ka wië? Celë hi nyipi trotrohnin ngöne la nyipici ka eje hnine la Wesi Ula i Akötresie göi Iehova me itre mekuana i Nyidrë, nge kola amamane hnyawa la nyipici göne la Baselaia i Akötresie. Tune lo hna ahnithe hë hnei Iesu, hna thawa la nyipici celë hnene la ketre jën ka mamacil koi së e celë fen, ene la “hlue ka nyipici me ka inamacan;” celë hi matre kola lö kowe la nyipi hmi hnene la itre atr “qa ngöne la ite qene hlapa asë.”—Mat. 24:45; Zaka. 8:23.
3 Pine laka, kola inin hnene la itre atr la qene hlapa ka wië, haawe, hetre ajan mina fe thei angatr troa melën la itre hnei Iehova hna amekötin. Angatr a inin troa “ce hni ngöne la mekune ka cas.” (1 Kor. 1:10) Hetre thangane mina fe koi angatr la ini qaathei Akötresie, ngöne laka, meköt nge lolo la itre thiina i angatr, pëkö trenga thoi ngöne la itre qe i angatr ngöne lo angatr a tro fë kowe la itre xan la maca ka loi. (Tito 2:7, 8; Heb. 13:15) Kola atrunyi Iehova hnene laka kola saze la aqane mele i angatr.
4 Hanawang la ketre ceitun, nyimutre la itre hnying ne la ketre atr ka dreng la maca ka loi, hna sa asë hi itre ej qa hnin la Tusi Hmitrötr. Hna ketri nyidrë hnene la itre ewekë hnei nyidrë hna dreng, ene pe hnei nyidrë hna nyiqaan troa etid, alue ngöne la wiik nge hna hane fe sin la itre icasikeu. Lolo la aqane kepe nyidrëti hnine la Uma Ne Baselaia, matre nyidrëti a hai pine laka, ame lai itre atr ka ibozu me nyidrë, ke isapengöne hane kupeine ngönetrei. Thaa qea ju kö nge nyidrëti fe hë memine la föi nyidrë, a saze la aqane mele i nyidro me hane xome la bapataiso. Thupene lai, hnei nyidrëti fe hna hane xatuan la itre xaa atr ka ala 40 troa hane nyihlue i Iehova, laka, ame itre xan, tre itre atren la hnepe lapa i nyidrë. Ngacama hna tithi nyidrë hnene la ketre mec, ngo hnei nyidrëti hna hane xome la huliwa ne pionie.
5 Inine Jë La Itre Xan: Nyimutre la itre atr ka hni ka menyik ka pane waipengöne hmaca la itre mekun memine la itre aqane mele i angatr, ngöne la angatr a goeën la itre ewekë ka traqa ngöne la fen. Loi e tro sa tui Iesu, ene la troa hetre ajan troa hane xatuan la itre atr cili. Ame la aqane tro sa xatuane hnyawa la itre atr ka hetre hni ne ajan troa inin la qene hlapa ka wië, tre, ene la troa wai angatre hnyawa hmaca me etidi me angatr.
6 Hetrenyi la ketre aqane troa ithanata ka hetre thangane ka loi, ngöne la kola cainöj kowe la itre atr ka pëkö traem troa drei së ke tru la itre nyine troa kuca; ene la troa etid me angatr ngöne la qene qëhnelö, thaa tro kö a aqean. (km 5/02 g. 1) Hane kö epuni tupathe lai aqane cainöje cili? Ame ngöne la epuni a hnëkë troa iwai hmaca, iëne jë la ketre aqane nyiqaane ithanata ka troa ketr lai atr. Nyimutre la itre aqane nyiqaane ithanata hnine lai sinecetrone cili, a ka troa nyi jë së meköti kowe la boroshür Thele maine itus Atrehmekune. Xome jë lai aqane nyiqaane ithanata me kuca matre thaa tro ju kö a jole troa ijelekeun ej memine la itre mekun ne la ketre paragaraf ne lai boroshür. Iëne jë la caas maine lue xötr ne la Tusi Hmitrötr qa hnine lai paragaraf, nge e jë me ce ithanatan, me hnëkën la ketre hnying nyine troa nyipun. Ketre hnyinge lai ka troa eatrongë së kowe la ketre paragaraf hne së hna mekun troa ce ithanatan ngöne la kola troa iwai hmaca.
7 Nyimutre la itre manathithi hna kapa hnene la nöje i Iehova, qa ngöne laka angatr a inin la qene hlapa ka wië. Epi tro sa xatuane hnyawa la itre xaa atr troa hane ce tro me easë troa ‘hëne la atesiwa i Iehova’ me ‘nyi hlue i Nyidrë hnene la hni ka caas.’—Zef. 3:9.