Amamane Jë La Hni Ne Ole Së
1 Nyimu kepine tro së a amaman la ole së koi Iehova, ngacama easë a melëne enehila la itre “ijine ka aköte.” (2 Tim. 3:1) Ame la ketre ewekë ka sisitria hune la nöjei ewekë nyine troa olen, tre ene lo Hupuna i Nyidrë, kolo hi lo ahnahna ka tru alamekene lai hna hamëne thatraqa së. (Ioane 3:16) Ame fe la ketre kepin ke, maine ka mecijin ngöne la götrane la ua la itre atr hnine la hmi ka thoi, ngo ame easë tre, mana la xeni ngöne la götrane la ua. (Is. 65:13) Easë a ce huliwa memine la itre trejine e cailo fen, nge madrine atraqatre së troa eatrëne la ketre ewekë ka sisitria catr, ene la tro la nyipi hmi a haöthe la fene hnengödrai asë. (Is. 2:3, 4; 60:4-10, 22) Haawe, tro fe së a amamane tune kaa ka hape hetrenyi fe the së la hni ne ole koi Iehova pine la itre manathithi ka nyimutre hne së hna kapa qaathei Nyidrë?—Kol. 3:15, 17.
2 Huliwa Ka Hamë Madrin Nge Hna Kuca Hnene La Hni Ka Pexej: Ame ngöne la kola ithanatan la pengön la tro së a hame hnyawa, hnei Paulo hna cinyihane ka hape: “Aja i Akötesie la ate hamëne madin.” (2 Kor. 9:7) Troa mama fe la trepene meköti cili ngöne la easë a kuca la huliwa i Akötresie. Mama pi hi la hni ne ole së la easë a madrine kowe la nyipici, memine la easë a madrine kowe la itre icasikeu ne la itre Keresiano, me aqane catre së cainöje trootro ngöne itre hnalapa; Ka madrine pala hi së troa kuca la aja i Akötresie.—Sal. 107:21, 22; 119:14; 122:1; Rom. 12:8, 11.
3 Ame ekö e Isaraela, thaa hna athipe kö hnene la Trenge Wathebo, la etrun la itre xaa huuj nyine troa hamën. Kösë ketre tulu hi lai kowe la itre ka nyihlue i Akötresie, aqane tro fe hi angatre lai a amamane la hni ne ole i angatr isa ala caas, ene la troa hamëne “thenge la hna heteny, thenge la manathithi qa thei Iehova” hnei angatr hna isa kapa. (Deu. 16:16, 17) Ketre tune mina fe enehila, kola troa upi së hnene la aqane tro së amaman la ole së, troa kuca la hne së hna atrein ngöne la huliwa ne troa cainöjëne la Baselaia me troa inine la itre atr. Ame mina fe ngöne lo itre drai hedredrei, celë fe itre ijine tro sa hane amamane la hni ne ole së. Ame itre xan tre angatr a thele ngöne la itre ijine mano qa hna huliwa maine qa hna ini, me ngöne lo itre treu ne kola nango co la hedredrei, matre troa hane aelën la etrun la itre hawa ne troa cainöje trootro, me hane xome fe la huliwa ne pionie ka ixatua. Hapeu, ijije kö tro nyipunieti a hane atrun la huliwa ne cainöje i epuni ngöne la itre drai hedredrei celë?
4 Loi e Troa Elitrauj La Hni Ne Ole Së: Thithi la ketre jëne ka sisitria tro sa amamane la hni ne ole së koi Iehova. (1 Thes. 5:17, 18) Kola upi së hnene la Wesi Ula i Akötresie troa “nyixane la ole.” (Kol. 2:7) Ngacama troa tru catre hnei jole së maine catrehnine pena la itre itupath, ngo loi e tro pala hi së a ole ngöne la nöjei ijine easë a thith. (Fil. 4:6) Ketre, jëne la huliwa ne cainöje së, memine la itre thithi së, e pi tro pala hi së a amanane la “ole atraqatre [së] koi Akötesie.”—2 Kor. 9:12.