Loi e Tro Së a Olen’ Atraqatre La Ewekë Hne Së Hna Kapa

¹ “Ngo Akötesieti a amamane koi shë la ihnimi Nyidrëti, ngöne laka hna elelengë Keriso nyine hna i eëshë, nge ite ka ngazo pete kö shë.” (Rom. 5:⁠8) Drei la ole së asë kowe la huje ka sisitria hna kuca thatraqa së hnei Iehova memine la hupuna Nyidrë! Jëne la hna neni la madra i Iesu, ijiji së fe hë troa hetrenyi la mele ka tha ase palua kö, ketre ewekë hnei atr hna thatreine troa hamën.

² Tro së a amamane tuneka la etrune la ewekë celë? Alanyimu la itre atr ka meci hnei pi ij, ene la kola ajane troa atre la nyipi atrehmekun, celë hi nyipici ka eje hmekuje hnine la wesiula i Akötresie ka hmitrötr. Ejehi laka aja i Iehova tro fe angatr’a hane kapa la atrehmekune ne la nyipici. (1 Tim. 2:⁠4) Loi e tro së a amamane laka easë a wangatrune la nyipici hnene la troa ‘cainöjëne la maca ka loi ne la Baselaia i Akötesie.’ (Luka 4:43) Nge, tro la aqane catre së huliwa ngöne la hni ka pexej, a amamane laka, easë a madrine laka hna meci thatraqa së hnei keriso, nge ketre easë fe a ajane troa xötrethenge la tulu i nyidrë hnene la troa lapaune me drenge thenge la hna amekötine koi së hnei Nyidrë, ene la troa inine la itre xaa atr matre itretre drei Nyidrë.​—⁠Mata. 28:​19, 20.

³ Nemene la itre gojenyine cainöje hna fe koi së? Ma ijije kö koi së troa hane xome lapaane la huliwa ne pionie ka ixatua? E ase hë itre xane mekune hnyawaan, angatr’a xome ju la huliwa ne pionie lapa. Maine hne së hna canga kapa la itre hna amekötine celë, ejehi laka, tro ha tru la traeme hne së hna huliwane troa cainöjëne la maca ka loi ne la Baselaia. Ngöne la itre drai ka ase hë, ma hnei epuni jë hna mekune kowe la huliwa cili, ngo nyimu ewekë ka ajolën. Maine jë loi hë la aqane mele i epun. Hapeu, ase kö epuni mekune hnyawaane troa sisedrëne la huliwa ne pionie maine troa pionie ka ixatua?

⁴ Troa atraqatre la ole së, ngöne la easë a goeëne la itre ewekë hna kuca ezi së. Kola elë la iangazo, imethinë, me iwesitrë ngöne la fene hnengödrai. Hnei Paulo hna qaja atrune la hnedrai hne së hna melën, itre ijine ka “ngazo” me ka “akötr.” (2 Tim. 3:⁠1) Nge nyipine la itre ehace ne la aqane mel, ke, hetrenyi the së la maca ka loi nyine troa hane qaja kowe la itre xan. Hetrenyi the së la lue zonale ka sisitria, ene La Tour de Gar­de me Réveillez-vous! Ngöne la treu celë, easë a troa abone la itre atr. Hetrenyi fe the së la itre boroshür ka qejepengöne la itre taa­ne ne mekune ka kösau. Itre itusi lai ka ijije troa hamëne la nyipi ixatua kowe la itre ka e itr’ej. Ketre, tro la aqane olene së kowe la hne së hna kapa, a upi së troa hane catre qaja trongëne koi itre xan.​—⁠Heb. 13:⁠16.

⁵ Ejehi laka, ma ngöne la götrane hnei epuni hna mele ngön, ke, itre atr a amamane laka, co hi la aja i angatre kowe la itre ewekë ne la ua. Ame pena ha ngöne la itre xaa götran, ke, tru hmaca pena la itre ka trene aja. Hna öhne lai thene la itre atr trenyiwa, nge ka tha ithahnataane pena la qene hlapa ne la nöj. E maine atreine epuni a ithahnataane la qene hlapa i angatr, hapeu, ijiji epuni kö troa xatua angatr? Ijije tro la atre thupëne la sirkoskripsio a hamëne la itre xaa ixatua ngöne la götrane celë.

⁶ Nyimutre la itre kepine nyine olene la ewekë hne së hna kapa, ene laka nyimu ewekë ka loi. Celëhi matre, ame la aqane tro së a olene atraqatre koi Iehova, ke, ene la troa ithuemacanyi kowe la itre xaa atr la atresiwa i Nyidrë memine la trepene mekuana i Nyidrë.​—⁠Isa. 12:​4, 5.