Troa Xome Tune Kaa La Itre Aqane Nyiqaane Ithanata Hna Hnëkëne Hë
1. Tune kaa la aqane tro sa goeëne la itre aqane nyiqaane ithanata hna hnëkëne hë?
1 Kola mama pala hi ngöne la itre Huliwa Ne Baselaia la itre aqane nyiqaane ithanata hna hnëkëne hë thatraqane la itre zonal, maine itre xaa itusi pena. Ame ngöne la easa cainöje trootro, thaa nyipi ewekë kö troa e gufane la itre aqane nyiqaane ithanata hna cinyihane hë. Hna hamën itre ej matre tro sa atre la itre mekune ka tru nyine tro sa qaja. Tro ha hetre thangane ka lolo la itre aqane nyiqaane ithanata së e hne së hna ketre sipu qaja itre eje hnene la itre trenge ewekë së. Maine tro sa ithanata tune la sipu aqane ithanata së kö, haawe, thaa tro kö a xoue së hnene lai atr, nge tro fe lai a mama laka easa ithanata qa kuhu hni së, nge pëkö luelue the së.—2 Kor. 2:17; 1 Thes. 1:5.
2. Pine nemene matre nyipi ewekë tro sa waipengöne hnyawa la itre hna majemine ngöne la nöj, ngöne la easa hnëkëne la itre aqane nyiqaane ithanata së?
2 Tro La Aqane Nyiqaane Ithanata i Epun a Ihmeku Memine La Aja Ne La Itre Atr: Troa nango saze la aqane tro fë së la maca ka loi, hnene la itre hna majemin ngöne la nöj maine hnene la qene nöj. Tune kaa, epuni kö a pane ibozu me nango porotrike memine la atr qëmekene troa sisedrën hnene lo aqane nyiqaane ithanata i epun, maine pena kolo kö a ajane hnene la itre atr ne la teritoare i epuni troa qaja mekötine la tronge i epun? Isapengöne catr la itre nöj, nge ketre tune mina fe la itre atr laka thaa ceitui angatre kö. Ketre, nyipi ewekë catre fe la troa atreine waiewekë ngöne la kola xome la itre hnying. Maine jë ame la itre hnying hna majemine xom ngöne la ketre nöj, tre thatreine kö troa xome itre ej ngöne la ketre. Qa ngöne lai, nyipi ewekë tro sa inamacan, me xome la itre aqane nyiqaane ithanata së matre troa ihmeku memine la itre hna majemine ithanatan hnene la nöj.
3. Pine nemene matre troa waipengöne hnyawa la aqane mele me aqane mekunene la itre atr hne së hna ithanata memin?
3 Ketre, nyipi ewekë tro sa wangatrune la aqane mele ne la itre atr memine la aqane mekune i angatr ngöne la teritoare së, ngöne la easa hnëkë kowe la huliwa ne cainöje trootro. Hanawange la ketre ceitun, tro ha ketrepengöne la aqane tro epuni a ithanatane la Mataio 6:9, 10 memine la ketre Katolik ka hmi catr, memine la ketre atr ka thatre hnyawa kö la thith “Tetetro i Anganyihunieti.” Maine tro sa nango canga hnëkë, tre, atreine hi tro sa xome la itre aqane nyiqaane ithanata së ka ijije troa ketr la hni ne la itre atr hne së hna iöhnyi memin, ngöne la huliwa ne cainöj.—1 Kor. 9:20-23.
4. Pine nemene matre ka nyipi ewekë catre la troa hnëkë hnyawa?
4 Nge maine easa mekune troa xome la ketre aqane nyiqaane ithanata hna cinyihane hë, the tro kö a mekune ka hape trije ju pë hë troa hnëkë hnyawa. Loi e tro sa e hnyawane la hna cinyihan, maine mekene hne së hna mekune troa tro fë, me thele la itre mekune ka troa ketr la hni ne la itre atr. Thupene lai, loi e tro sa qaja itre ej ngöne la aqane nyiqaane ithanata së. Tro sa hamën madrine la itre itusi së, e hne së hna atrepengöne hnyawa la itre ithuemacanyi e hnine itre ej.
5. Pine nemene matre loi e tro sa hnëkëne la ketre aqane nyiqaane ithanata ka ketrepengön, nge tro sa kuca tune kaa lai?
5 Itre Xaa Aqane Tro Fë Ithanata: Hapeu, tro hmekuje hi sa xome la itre aqane nyiqaane ithanata hna cinyihane hë? Ohea. Xome jë la ketre aqane tro fë ithanata maine ketre xötre ka isapengön hnei epuni hna öhne laka, ka thaa jole kö koi epuni. Tune la itre zonal laka, loi e troa hmekëne la itre ijine ka ijije troa tro fë la itre xaa hna cinyihane e hnin itre ej, ka ijije troa ketr la hni ne la itre atr ngöne la teritoare i epun. Maine kola iamacanyine la itre aqane nyiqaane ithanata ngöne la Icasikeu Ne La Huliwa, tre, loi e troa kuca la itre aqane tro fë ithanata ka hetre thangane ka loi ngöne la teritoare së. Maine tro sa kuca tune lai, tro ha xatuane asë la itre trejine troa tro fë hnyawa la maca ka loi.