Paatr 9: Aqane Eatrongëne La Itre Etid Ka Kökötr
Hnëkëne Jë Së La Itre Hnainin Troa Cainöj Ngöne La Nöjei Ijin
1 Ame ngöne la kola öhne hnei Anederea me Filipo laka, Iesu hi la Mesia hna thingehnaean, thatreine kö nyidroti troa lapa fë lai itre ithuemacanyi nyine haine cili. (Ioane 1:40-45) Tune mina fe enehila, pine laka, kolo ha nyiqaane troa lapaun hnene la itre hnainin kowe la itre hnei angatr hna inin, ene pe kola upi angatr troa hane qaja kowe la itre xan. (2 Kor. 4:13) Tune kaa la aqane tro sa xatua angatr troa cainöj ngöne la nöjei ijin, me hnëkë angatr troa kuca hnyawa la huliwa cili?
2 Tro epuni a hnyingëne kowe la hnainin maine ase jë fe hë angeic ithanatan memine la itre xaa atr, la itre hnei angeic hna inin hnine la Tusi Hmitrötr. Maine jë hetrenyi la itre enehmu me itre atren la fami hnei angeic hna troa hën matre troa hane sin lai etid. Hnyingë angeice jë maine hetre hni ne ajane fe la itre sine ce huliwa i angeic, maine itre sine ini, maine itre atr pena hnei angeic hna atre, troa hane dreng la maca ka loi. Aqane tro hi lai a aijijë angeic troa hane nyiqaane cainöj. Xatua angeice jë troa trotrohnine la enyipiewekëne la troa atreine atrehmekun me metrötr me hni ka menyik ngöne la angeic a ithanata memine la itre xaa atr ngöne la pengö i Iehova Akötresie memine la itre aja i Nyidrë.—Kol. 4:6; 2 Tim. 2:24, 25.
3 Troa Ce Thawa La Itre Ini i Angatr: Ka nyipi ewekë catr troa inine la itre hnainin troa xome la Wesi Ula i Akötresie, ngöne la angatr a ce thawa la itre ini i angatr memine la itre atr. Ame ngöne la ijine etid, iëne jë la itre mekun me hnyinge kowe la hnainin ka hape: “Tune kaa la aqane tro epuni a xome la Tusi Hmitrötr matre troa qejepengöne la nyipici celë kowe la fami i epun?” maine “Nemene la xötr ne la Tusi Hmitrötr hnei epuni hna troa xom matre troa anyipicine lai kowe la ketre sine ce elo i epun?” Drenge ju la aqane sa i angeic, me amamane koi angeic la aqane troa nyitrepene la itre ini hnei angeic hna hamën hnene la Tusi Hmitrötr. (2 Tim. 2:15) Maine tro sa kuca tune lai, tro hë së a hnëkëne la hnainin troa hane cainöj ngöne la nöjei ijin, me ngöne fe elanyi la angeic a troa hane ce cainöj memine la ekalesia.
4 Ame la troa hnëkën la itre hnainin troa cile kowe la icilekeu, tre ketre mekune lai ka inamacan. (Mat. 10:36; Luka 8:13; 2 Tim. 3:12) Ame ngöne la kola hnying hnene la itre xan maine hamë mekune pena ngöne la Itretre Anyipici Iehova, kolo hi lai a fe gojenyi ne la itre hnainin troa cainöje koi angatr. Atreine hi troa xatua angatr troa “hnëkëne pala hi troa sa” kowe la itre ka hnying, jëne la boroshür Les Témoins de Jéhovah : Qui sont-ils ? Quelles sont leurs croyances ? (1 Pet. 3:15) Kola hamën hnene la boroshüre celë la nyipi ithuemacanyi nyine troa xome hnene la itre ka xötrei atre la nyipici, matre troa xatuan la itre enehmu ka pi hane drei angatr me itre atren la fami troa trotrohnine la itre ini qa hnine la Tusi Hmitrötr me itre huliwa ne ej.