Nemen La Hna Eatrën Hnene La Cainöje Së
1. Tune kaa la aqane goeëne Iehova la cainöje së, nge nemene la hna aqane ujë ne la itre atr?
1 Wesi Ula i Akötresie a qaja la itre Keresiano, angatr a kuca la huliwa i Akötresie me tro atre laka troa hun. (2 Kor. 2:14-16) Ame la easë a tro fë la atrehmekune i Akötresie, kösë ceitune memine la libanu ka lolo koi Iehova, la itre hne së hna qaja trongën. Ame itre xaa atr, hnyapa koi angatr la maca ka loi; itre xan a thipetrije ej. Ngo thaa hnene kö laka thaa drei së kö hnene la itre atr ka ala nyim, ke kolo hë lai a hape ka pë eloine la huliwa së. Tro sa ce wang la hna aejën hnene la cainöje së.
2. Nemene la hna aijijë së hnene la cainöje së?
2 Atrunyi Iehova Jë Së: Satana a icilekeu me uun ka hape, hnene la itre sipu aja i angatr la itre atr a nyihlue i Iehova. (Iobu 1:9-11) Kola aijijë së hnene la huliwa ne cainöj ne la Keresiano, troa amamane la sipu ihnimi së koi Akötresie. Nyimutre la itretre cainöj ka catre drengethenge la troa cainöj me inine la itre atr, ngacama tru la itre ejolen me xele la itre atr troa drei angatr. Kola amadrinën la hni Iehova hnene la aqane xomihniahoeanyi angatr!—Ite edomë 27:11.
3. Pine nemen matre nyipi ewekë koi së troa catre qaja la ëje me aja i Akötresie?
3 Hetre enyipiewekëne fe la huliwa ne cainöj ngöne la troa aejën la aja i Akötresie. Iehova a amexeje la ka troa traqa ngöne la pune la fene i Satana laka calemi hë, me hape: “Tro ite ethen’ a ate laka ini Iehova.” (Ezek. 39:7) Nga e tro angatr a atre lai, nyipi ewekë hö tro la itre hlue i Akötresie a catre tro fë la ëje me aja i Nyidrë “koi angete lapa e celë fen, me nöjei nöj’ asëjëihë, me nöjei tribu, me ite qene hlapa, me nöjei ate.”—Hna ama. 14:6, 7.
4. Nemene la enyipiewekën la huliwa ne cainöj ngöne la iameköti Akötresie?
4 Pengöne La Iameköti Akötresie: Ketre jëne iameköti fe la kola cainöjën la maca ka loi. Öni Paulo aposetolo ka hape tro Keriso Iesu a nyithupene koi “angete tha ’te Akötesie, me koi angete tha denge thenge la maca ka loi ne la Joxu shë Iesu.” (2 Thes. 1:8, 9) Troa mama la pengöne la itre atr hnene la aqane ujë angatr kowe la maca ka loi. Drei la ketre hnëqa ka tru catr hna troa xom hnene la itre hlue i Akötresie! Maine easë a ajan matre thaa tro kö a zö së la meci ne la itre atr, nyipi ewekë tro pala hi sa tro fë koi angatr la maca ne Baselaia, ene la maca ne iamele.—Ite hu. 20:26, 27.
5. Tune kaa la aqane mama la ihnimi ipitö i Akötresie ngöne la huliwa ne cainöje së?
5 Ame la easa catre xatuane la itre atr matre troa hane kepe angatr hnei Akötresie, tre, hatrene la ihnimi ipitö i Iehova lai. (1 Tim. 2:3, 4) Pine laka kolo pala hi a saze la mele ne la itre atr, haawe, easë a tro lapaa troa wai angatr me catre xatua angatr troa thele Iehova e ijine petre kö. Maine tro sa ujë tune lai, easë hi lai a amamane la “nyipi ihnimi ka menyike i Akötesi shë,” ka “tha ajane kö tro kete ate a hnëjin, loi pe tro angat’ asëjëihë a ietra.”—Luka 1:78; 2 Pet. 3:9.
6. Tune kaa la aqane tro sa kepe thangan ka loi e hne së hna catre huliwa i Iehova?
6 Tro Sa Isa Kepe Thangane Tune Kaa: Hnapo së la huliwa i Iehova e hne së hna catre huliwa i Nyidrë. Ej a xatua së troa “ajane troa traqa la drai Iehova” me thupën wanga angazo së jë hnene la fene ka ngazo celë. (2 Pet. 3:11-14; Tito 2:11, 12) Qa ngöne lai, “cile huti ju [së], the enienije kö, nge catejë troa huliwa i Joxu pala hi, ke ate hë [së] laka tha gufa kö la huliwa [së] kowe la Joxu,” nge thaa ka gufa kö la trenge catr hne së hna kuca thatraqane la huliwa ne cainöj ne la Keresiano.—1 Kor. 15:58.