Lapa Mekune Ju La Enyimenyimene La Itre Drai!
1 Atre hi Iesu ekö laka hna sa tulune hi la ijine tro nyidrëti a kuca la huliwa ne la Tretretro i nyidrë e celë fen. (Ioane 9:4) Celë hi matre hnei nyidrë hna kuca la huliwa ne cainöj, cememine la mekun, ene laka kola paatre nyimenyime la itre drai, nge hnei nyidrëti hna inin la itretre drei nyidrë troa hane tune mina fe. (Luka 4:42-44; 8:1; 10:2-4) Ame la itre ewekë ne ngönetrei, tre hnei nyidrëti hna amë pinëne pë hë. (Mat. 8:20) Qa ngöne lai, nyidrëti a atreine troa afenesin la huliwa hna upi nyidrë troa kuca hnei Iehova.—Ioane 17:4.
2 Hna Sa Tulun La Ijin: Hna sa tulune fe la ijine tro sa cainöjën la maca ka loi ngöne la “nöjei nöj.” (Mat. 24:14) Kola amaman hnene la itre hna perofetan hnine la Tusi Hmitrötr laka easë hnyawa ha ngöne la hneijine ne la pun. Easenyi hë tro “angete tha ‘te Akötesie, me koi angete tha denge thenge la maca ka loi ne la Joxu shë Iesu . . . a nyi thupene kow, ene la hnëjine ka tha ase palua kö.” (2 Thes. 1:6-9) Kola troa asesëkötrë së hnene la hnëjine cili. (Luka 21:34, 35; 1 Thes. 5:2, 3) Nyipi ewekë troa hmekëne hnene la itre atr la ewekë ka ngazo cili. Hnëqa së troa xatua angatr troa thele troa amadrinë Iehova e ijine petre kö.—Zef. 2:2, 3.
3 Troa Kuca Asë La Hne Së Hna Atrein: Kola atrehmekun hnene la itre hlue i Akötresie, ka hape, “xoxopate pe hi la ijin,” ene pe angatr amë panëne la huliwa ne cainöj. (1 Kor. 7:29-31; Mat. 6:33) Ame itre xan, tre hnei angatr hna thipën la itre xaa jëne manie ka tru, maine hnöthe la itre supu aja i angatr matre troa akökötren la huliwa ne cainöje i angatr. (Mar. 10:29, 30) Ame itre xan, angatr a catr “troa huliwa i Joxu pala hi” ngacama angatr a xomihnine ahoean la itre xaa itupath. (1 Kor. 15:58) Nyimutre la itre trejin ka cainöjëne la maca ka loi itre macatre hë enehila, thaa kötrekötre pi kö la lapaune i angatr. (Heb. 10:23) Atraqatre la aqane wangatrun Iehova lai aqane hujëne angatr la mele i angatr troa sajuën la itre aja ne la Baselaia.—Heb. 6:10.
4 Maine tro sa nue la mele së kowe la hmi i Iehova, tune la troa cainöjën la maca ka loi, haawe, tro ha xatua së troa lapa mekune pala hi la drai Nyidrë laka easenyi hë. Kolo fe lai a thupë së wanga thepe së pi hnei Satana, nge kola acatren la aja ka eje the së troa hetrenyi pala hi la thiina ka loi. (2 Pet. 3:11-14) Nyipici, maine tro sa kuca la huliwa ne cainöj cememine la mekun, ene laka kola paatre nyimenyime la itre drai, haawe, tro ha sipu amele së kö memine fe la itre ka drei së.—1 Tim. 4:16.