Catre Jë Së Cainöj, Ke, Calemi Hë La Pun!
1. Nemene la ithuecatre hnei Paulo hna hamën, nge nyine tro sa nyipiine ngöne la hneijine së enehila?
1 “Cainöjëne jë la Wesi Ula; nge [“nyimenyime jë,” MN].” (2 Tim. 4:2) Pine nemene matre loi e troa nyipiine la ithuecatre hna hamëne hnei Paulo, ngöne la hneijine së? Tro la trenge ewekë cili a hetre thangane tune kaa kowe la mele së me kowe la mele ne la itre xaa atr?
2. Pine nemen matre easa catre thele la itre atr ka thaa hane kö drenge la maca ka loi?
2 Kola Të Drea La Mele Ne La Itre Atr: Itre milio pala kö lao atr e cailo fen ka thaa hane kö drenge la maca ka loi, maca ka troa eatrongë angatr kowe la mel. (Rom. 10:13-15; 1 Tim. 4:16) Ala nyimu la itre atr ka hetre hni ne ajan ngöne la itre teritoar hna huliwane lapaan. Maine tro sa saze drai me traeme troa wange la itre atr, maine jë tro hë së a öhn la itre xaa atrene la ketre hnalapa. Maine tro sa catre huliwa tune lai, haawe, tro ha lolo la mekuthethewe së, nge thaa zö së pëhë la kola meci hnene la itre atr elany.—Ite hu. 20:26.
3. Tro sa huliwane inamacanëne tune kaa la traeme së ngöne la hna cainöj?
3 Ngacama jole catre la aqane icilekeu ekö, ngo hnene lo itre pane Keresiano hna ‘atiqan e Ierusalema hnene la ini angatr.’ (Ite hu. 5:28) Tune kaa fe easë enehila, easë kö a hane “anyipicin”? (Ite hu. 10:42) Ame la easa cainöj, tre, hapeu, easë kö a huliwane inamacanëne la traeme së? Nge tune kaa fe ngöne la easa treqene la itre trejine me easë ka kuci vizit; hapeu, easë kö a thele troa ithanata memine la itre atr hne së hna iöhnyi memin ngöne la gojeny?
4. Maine tro sa catre cainöj, ke, calemi hë la pun, tro hë lai a xatua së tune kaa troa hmek?
4 Catre Jë Së Hmek: Pine laka easenyi catre hë la pune la fene celë haawe, nyipi ewekë tro sa thupën me catre hmek. (1 Thes. 5:1-6) Ame la easa catre pala hi troa qaja la mejiune së kowe la Baselaia, tre, thaa easë kö a nue kowe la itre ewekë ne fen troa nyi ehacene la mele së. (Luka 21:34-36) Easë pe a treqene me “ajan” la drai Iehova, ke, eje hi lai ka uku së troa catre xome la huliwa ne cainöj nyine iamele.—2 Pet. 3:11, 12.
5. Maine ka metrötrëne së la mel, tro lai a mama tune kaa ngöne la easa cainöj?
5 Ame la easa catre cainöj, ke, calemi hë la pun, tre, easë hi lai a xome la aqane waiewekë i Iehova göne la mel: “Tha ajane kö [Nyidrë] tro kete at a hnëjin, loi pe tro angat’ asëjëihë a ietra.” (2 Pet. 3:9; Eze. 33:11) Epi tro sa catre cainöj me thele troa ketr la ka ala nyim ngöne la itre teritoare së, thenge la hne së hna atrein, matre tro asë hi së a ce atrunyi Iehova!—Sal. 109:30.