Tro Sa Ixatua Tune Kaa?
1 “Tro sa ixatua tune kaa?” Drei la aqane hnyingene la Itretre Anyipici Iehova ngöne la angatr a drenge la ketre hulö ka traqa ngöne la itre xaa götrane ne la fen. Kola amamane ngöne Ite Huliwa 11:27-30, laka hnene la itre keresiano ne lo hneijine i Iesu hna upe la nyine ixomexatua koi ange trejine e Iuda, pine laka, kola jiinë xeni e cili.
2 Ame ngöne la hnedrai së, hna xome la mani hnene la organizasio së thatraqane la itre trejine ka aja ixatua maine nyine ixatua kowe la itre atr ka akötr hnene la itre ewekë ka ngazo ka traqa xan maine thangane la huliwa i atr, maine ngöne la itre xaa ijine aja ixatua pena.
3 Ame lo macatre hnapan, nyimutre la itre trejine ka hamë manie matre troa xatuan la itre hna akötrën hnene lo gejë madra e Azia. Kola madrine atraqatr la aqane ixatua la itre trejin, jëne la manie hnei angatr hna hamën nyine ahnahna kowe la itre kees ne ixatua ne la organizasio. Ngo maine hna iupi fë la itre ahnahna matre thatraqane la ketre akötr, nyipi ewekë ngöne la itre xaa nöj troa xome la itre ahnahna cili thatraqane kö la hna hamëne kow hnene lai ka ham, nge ngöne hi la ketre hnepe ijin, ngacama hna xatuane hnyawa ha la itre trejin, nge ijije hë la hna ithingë.
4 Haawe, hna amekötine hë laka, ame la itre ahnahna nyine thatraqane la itre ka aja ixatua, tre, troa thawa kowe la huliwa e cailo fen. Ame la keesi cili, tre, troa xome nyine thatraqane fe la itre aja ne la ua ne la itre trejine Keresiano e cailo fen. Maine hetre itre xaa kepine kö matre kola ajan hnene la ketre atr troa hamë ahnahna e tröne lo itre ahnahna thatraqane la huliwa e cailo fen, ka loi hi nge troa xome la ahnahna cili matre thatraqane la itre ka aja ixatua. Ngo, ka lolo catr e troa nue koi sasaiatri troa wang la aqane troa huliwane itre ej.
5 Ame la kepin matre kola pane xome mekötine la itre ahnahna thatraqane la huliwa e cailo fen, tre, göi troa nyimu kees hna troa kuca, a thaa koi itre ka aja ixatua hmekuje kö elany, ngo kowe mine fe la itre ejolene la huliwa ne cainöjën la Baselaia. Ka ihmeku la mekune celë memine la hna qaja ngöne Efeso 4:16, laka, easë a ce huliwa matre troa hamën la ka ijij “nge kola trujë la ngönetrei matre adraiëne ngöne la ihnim.”