Aqane Tro Sa Xatuan La Itre Hna Lep Hnei Hulö

Ame enehila, kolo palahi a elë la etrun la itre  hulö. Ame la kola traqa la ketre hulö, loi e tro sa cas me ameköti huliwa hnyawa ngöne la easa hamë ixatua. Celë hi matre, hnene la Lapa Ne Xomi Meköt hna acile la ketre Biero Ne Hamë Ixatua ngöne la itre filial.

Ame la kola traqa la hulö ngöne la ketre götran, itre trejin ka huliwa ngöne la biero ne hamë ixatua a canga hëne la itre qatre thup e cili matre atrepengöne la itre trejin. Maine ngazo catre palaha la aqane lepe la nöj hnei hulö, nge co hi hnei trejin, ke tro la filial a upe la itre trejin ka ijij matre elemeken la huliwa ne ixatua e cili. Nge qanyi angatre pë hë troa wang ka hape, ijije kö troa hëne la itre ka saen troa hane ixatua, maine sipone pena troa iupi fë la itre zuti memine la itre ka nyipiewekë kowe la itre trejin hna lep hnei hulö.

Nyimu eloin e troa ameköti huliwa tune lai. Maine tro sa trongëne hnyawan la itre hna amekötin, ke tha tro kö a hetre zikoziko, nge tha tro sa aluzi mani me trengecatr menu.

Hnëqa ne la itre trejin hna upe hnene la filial troa amekötine la etrune la mani hna troa huliwan, memine la itre trejin hna troa hën troa ixatua. Hnëqa i angatre fe troa wang la itre mus matre xatua së. Celë hi matre tha tro kö epuni a sipo mani trootro, maine iupi fë xen, maine tro pena ngöne la itre götrane cili, nge tha hna hë epuni kö.

Nyipici laka, tru la aja së troa xatuane la itre trejin. (He 13:16) Nge tru la ihnimi së koi angatr! Matre nemene la nyine tro sa kuca? Ame la ka nyipiewekë, ke troa thith fë la itre trejin hna lep hnei hulö, me itre ka saen troa ixatua. Loi e tro fe sa kuië mani thatraqane la huliwa ne cainöj e cailo fen. Itre filial a kapa la itre hna amekötine qaathene la Lapa Ne Xomi Meköt, matre atre hnyawa hi angatr la aqane troa huliwane la mani. Maine epuni a pi saen troa hamë ixatua, nyialiene jë la pepa ne sipo Demande d’admission comme volontaire local de développement-construction (DC-50).

GOEËNE JË LA VIDEO HNA HAPE, KOLA ELË LA TIM E BRÉSIL, NGE SA JË CAHU HNYING:

Nemene la ka ketri epun ngöne la aqane hamë ixatua ne la itre Temoë Iehova lo kola di e Brésil lo 2020?