Kola Sa La Itre Hnyinge i Nyipunie
◼ Nemene la ketre jëne ka sisitria troa hamë ahnahna thatraqane la itre trejine me easë ka aja ixatua ngöne la itre xaa nöj?
Ame itre xaa ijin, easa drenge laka kola aja ixatua hnene la itre trejine me easë ngöne la itre xaa nöj, pine laka tru la icilekeu, maine itre hulö pena ka traqa koi angatr, maine itre xaa jole ju kö. Hna iupi fë mekötine la manie hnene la itre xaa trejin kowe la filial ne la itre nöje cili, nge hna sipon troa xome lai manie cili matre troa xatuane la ketre atr, maine ketre ekalesia, maine thatraqane la ketre xupi uma pena.—2 Kor. 8:1-4.
Maine nyipici laka, ketre ewekë ka lolo catre troa ihnim, me hnehengazone la aja ka eje thene la itre trejine me easë, ngo hetrenyi kö la itre ewekë nyine canga kuca hune la itre hna mekune hnene la ka ham. Ame itre xaa ijin, tre, traqa pë hë lai manie nge ase hë kuca lo lai ewekë hna ajane troa xatuan hnene la ka ham. Nyipici laka, ijije tro sa mejiune ka hape, ame la itre ahnahna hne së hna iupi fë kowe la filiale ne la nöje thatraqane la huliwa ne cainöj e cailo fen, thatraqane la Keesi Göi Xupi Uma Ne Baselaia, maine thatraqane la itre trejin hna ketr hnene la itre hulö, haawe, troa xome la itre ahnahna cili thatraqane mekötine kö la hna mekune kow hnene la ka ham.
Hna hnëkëne hë hnene la itre trejine ngöne la itre filial asë, troa canga hamëne la hna ajan e traqa ju la ketre jol. Eje hi laka, tro la filial a ithuemacanyi pala hi koi Collège central göne la pengöne la jol. Maine kola ajan la itre xaa ixatua, tro Collège central a könëne la itre filial ka easenyi troa ixatua maine troa iupi fë mekötine la itre ahnahna kowe la iwahutine la sasaiatri.—2 Kor. 8:14, 15.
Qa ngöne lai, ame asë hi la itre ahnahna hna hnëkëne thatraqane la huliwa ne cainöje e cailo fen, maine thatraqane la itre xupi uma ngöne la itre xaa nöj, maine thatraqane la itre hulö ka traqa kowe la itre trejin, tre, loi e troa iupi fë itre ej kowe la filial ne la nöje hnei epuni hna mele ngön, maine jëne la ekalesia maine troa iupi fë mekötin itre ej koi sasaiatri. Jëne la aqane kuca cili, kola thupëne hnyawane la itre aja ka eje thene la itre trejine e cailo fen hnene la “hlue ka nyipici me ka inamacan,” hna jëne la itre ewekë hna acile hnei Collège central.—Mat. 24:45-47; 1 Kor. 14:33, 40.