Loi e Troa Wanga Atrune La Itre Xaa Atr—Hnene La Hna Hnëkë Hnyawa
1 Troa hetrenyi the së la nyipi ajane troa cainöj kowe la itre xan, e hne së hna hnëkë hnyawa. Troa tune kaa? Maine tro së a hnëkë hnyawa, haawe, thaa tro jë kö sa hnehengazone menune la itre pane trenge ewekë nyine tro sa qaja; ngo easë pe a wanga atrune hnyawa lai atr hne së hna cainöje kow. Ketre, tro lai a xatua së troa trije la xou, me aijijë së troa ithanata qa kuhu hni së. Ngo, nemene la aqane tro sa hnëkëne la ketre aqane nyiqaane ithanata ka lolo?
2 Xome Jë La Ketre Aqane Nyiqaane Ithanata Ka Ihmeku: Iëne jë qa hnine lo Huliwa Ne Baselaia ne Januare 2006, la ketre aqane tro fë la maca ka loi, nge ka ihmeku hnyawa memine la götrane hna troa cainöje ngön; wange jë la aqane tro epuni a ketre sipu qaja itre ej. Maine jë tro epuni a iöhnyi memine la itre xaa atr ka sin la ketre hmi maine ketre lapa pena. Mekune ju la aqane troa ketri angatr hnene la aqane nyiqaane ithanata i epun. Maine hne së hna thele troa ihmeku hnyawa la aqane nyiqaane ithanata së memine la pengöne la itre atr hne së hna troa cainöje kow, easë hi lai a amamane ka hape, easë a hane hnehengazo angatre hnyawa.—1 Kor. 9:22.
3 Catre pi troa amacane hnyawa la aqane nyiqaane ithanata hnei epuni hna lapaa xom. Pine laka nyipi ewekë catr la itre pane trenge ewekë hne së hna qaja, haawe, goeëne hnyawa ju la aqane ujë ne la itre atr. Pi tro kö angatr a hane drenge la tane ithanata i nyipunie? Kolo kö a hane sa hnene la itre atr la itre hnyinge i nyipunie? Maine thaa eje kö, tre, nango saze pi la itre aqane eköthe nyipunie lai aqane nyiqaane ithanata, nge thele jë troa amekötine ej uti hë la öhne nyipunieti laka, hetre thangane hë troa huliwan.
4 Ixatua e Traqa Ju Thëthëhmi: Nyimutre la itre trejine ka öhne laka, jol e troa mekune hmaca la ketre aqane nyiqaane ithanata ngöne la angatr e qëmekene la ketre atr. Maine ka tune fe epuni lai, tre, tune kaa matre pane tupathe hnei epuni la aqane nyiqaane ithanata i epun kowe la ketre atr ngöne la epuni a anyimua amacane lai? Aqane tro hi a xatua nyipunie matre nualai la itre mekun nge thaa jole troa qaja wengëne itre ej. Celë hi ketre aqane xatua epuni troa atreine sa kowe la nöjei mekun hna amejën.
5 Ame la ketre aqane troa kuca matre thaa tro kö a thëthëhmi, tre, ene la troa sija la itre mekune ka tru ngöne la ketre pepa ka co; nge troa acaa goeëne ej qëmekene troa fenafena la qëhnelö. Hna öhne hnei tre xan laka, ame lai nyine amekunëne cili, tre, kola xatua angatr matre thaa tro kö a ngönengön, ngo tro pe a maca troa ithanata memine la itre atr. Haawe, maine tro sa hnëkë hnyawa, tro hë së a wanga atrune hnyawa la itre atr, me amacane hnyawa la aqane tro sa cainöjëne la maca ka loi.