Loi e Eje The Së La Madrine Troa Ini Ngöne La Itus Nemene La Nyipi Ini Hna Hamën Hnei Tusi Hmitrötr?
1 Ame la ketre ijine madrine së ngöne lo itre ijine Kovasio Ne Distrik “Loi e Troa Drengethenge Akötresie,” tre, ene lo kola amamane la itus Nemene La Nyipi Ini Hna Hamën Hnei Tusi Hmitrötr? Easenyi hë matre huliwane hnyawa jë së la itusi cili ngöne la hna cainöje trootro, ngöne laka kola troa xom matre troa etidi ngön. Qa ngöne lai, nyipi ewekë troa atrepengöne hnyawa la itusi ka hnyipixe cili. Ijije hi troa traqa kow, pine laka, easë a troa xome ej troa nyine Ini Tusi Ne La Ekalesia qaane e 17 Julai 2006.
2 Tro la qatre thup ka elemekene la Ini Tusi Ne La Ekalesia a pane xome la itre pane hnying ngöne la nöjei mekene la itus. Thupene lai, troa xome la itre hnying ka eje e kuhu fene la götran ne la itus. Troa e me ce ithanatane la itre xötr ka acatren la itre mekune ka tru, nge troa ce wange ngöne la pune la nöjei mekene asë, lo itre mekune hna eköhagen hna hape “Nemene La Hna Inin Hnei Tusi Hmitrötr.” Ka lolo catr troa xome la itre mekune cili, pine laka hetrenyi la itre xötr ka troa sa mekötine lo itre hnying hna cinyihan ngöne lo kola nyiqaane troa ce wang la meken ne la itus. Tro sa madrine troa hamë mekun, pine laka ame la itre mekune hna hamën hnine la itusi cili, tre, ka nualai me hmaloi troa trotrohnin, nge ka nyipi lolo itre ej.
3 Hetrenyi la götrane hna hape, itre xaa mekun ngöne la itusi celë, kola hamën la itre ithuemacanyi ngöne la nöjei topik hna troa ithanatan. Atreine hi tro sa xome la itre mekune cili, ngöne la kola aja ithuemacanyi hnene la itre hnainin ngöne la itre xaa götran. Tro fe a ce wange ngöne la itre xaa ijin kola Ini Tusi Ne La Ekalesia, la itre ithuemacanyi qa ngöne la itre xaa mekune cili. Troa xome asë hnene la trejine ka troa e la itus ngöne la ijine icasikeu, la itre xaa mekun ngöne lai topik, nge ame kowe la itre hna cinyihane ka qea, tre, troa thawa nyimutren. Pëkö hnyinge ngöne la itre ithuemacanyi cili, ene ngöne la itre xaa mekun. Ngo tro la qatre thup a hnyinge kowe la itre atren la icasikeu; itre hnying ka acatrene lai itre mekune ka tru.
4 Troa nango nyimenyime la aqane tro sa xome la itre mekune ne la itus Ini Tusi Hmitrötr, ngöne la ijine Ini Tusi Ne La Ekalesia. Thaa kolo kö a hape tro hë së a tune fe ngöne la easë a etid memine la itre atr; ame itre xan, tre, co hi maine pëkö atrehmekune i angatr ngöne la Tusi Hmitrötr. (Ite hu. 26:28, 29) Ame ngöne la easa etid memine la itre atr, nyipi ewekë tro sa ithanatane xötreithe hnyawa la itre xötr, me qejepengöne la itre iatr, me itre xaa ewekë ju kö. Haawe, epi eje the së la aja troa sine pala hi ngöne la nöjei wiik me hane qeje mekune ngöne la kola troa ini ngöne la itusi së Nemene La Nyipi Ini Hna Hamën Hnei Tusi Hmitrötr?