Xötrethenge Jë La Tulu Ne La Atre Ini Ka Sisitria Ngöne La Kola Xome La Itus Ini Tusi Hmitrötr
1. Tune kaa la aqane hamën Iesu la ini?
1 Ka hmaloi pala hi nge nualai hnyawa la aqane qeje pengöne hnene la Atre Ini Ka Sisitria la itre ewekë. Ame ngöne la itre xaa ijin, tre, hnei nyidrëti hna pane hnyingëne la mekuna i angatr, göne hi matre troa pane upi angatr troa hane thele mekun. (Mat. 17:24-27) Hnei nyidrëti hna ee angatr matre troa goeëne la Wesi Ula i Akötresie. (Mat. 26:31; Mar. 7:6) Hnei nyidrëti hna thupën matre thaa tro kö a tru menu pala ha la itre ithuemacanyi hna troa kapa hnene la itretre drei nyidrë, ke, atre hi nyidrëti laka, hetrenyi pala kö la itre ewekë nyine tro angatr a inine trongën. (Ioane 16:12) Hnei Iesu fe hna thele troa atre ka hape, lapaune kö nge trotrohnine kö hnene la itretre drei nyidrë la itre ini hnei nyidrëti hna hamë angatr. (Mat. 13:51) Hna hnëkëne la itus Ini Tusi Hmitrötr, matre troa xatua së troa hamëne tune lai la ini.
2. Nemene la itre aqane tro sa xome la itre hnyinge ngöne la qaan la nöjei meken ne la itus?
2 Itre Hnying Nyine Nyiqaane Ithanata: Ame la easa nyiqaane ini tusi memine la ketre atr ngöne la ketre meken ne la itus, ka loi e troa pane amamai angeic la itre hnying ka nyiqaane la itus fene lo taan. Hetrenyi la itre hnying thaa nyine tro kö a sa, celë hi la itre nyine tro lai a xom matre troa acian thene la atr la ajan troa ithanatane la itre mekun. Maine pena troa sipo angeic troa nango qeje mekune ngöne la itre hnying. Thaa nyipi ewekë kö troa ithanatane atrune me angeic la itre mekun hnei angeic hna troa hamën, maine troa wenë pena la itre mekune ka tria. Maine jë tro hi a olene koi angeic la itre mekune i angeic me nyiqaane goeën la topik. Tro la itre mekune i angeic ka sa lo lai itre pane hnying a xatua së troa atre maine nyipi ewekë troa pane goeëne hnyawa la ketre götrane ne la ini.
3. Nemene la nyine troa kuca matre troa hmaloi la aqane troa inine la Tusi Hmitrötr?
3 Itre Xötr: Loi e troa eköth la ini ngöne la itre xötr ne la Tusi Hmitrötr. (Heb. 4:12) Ngo thaa nyipi ewekë kö troa e la nöjei xötr hna hamën. Amamane hnyawa jë la itre xötr ka nyitrepene hnyawa la itre ini hne së hna mejiune kow. Ame la itre xötr hna hamën nyine ithuemacany, tre, thaa nyipi ewekë kö troa e itre ej. Thaa hna ajolëne kö hnene la itus Ini Tusi Hmitrötr la aqane amamane la nyipici. Loi e troa hmaloi la aqane troa inine la Tusi Hmitrötr. Amamane jë la itre mekune ka tru, nge neëne jë la aja ne troa ithanatane menune pala ha la itre hnepe mekun, maine troa ithanata pena e tröne la topik hna ce wang.
4. Nemene la ka troa amamane koi së maine tro sa xome la ketre traem ngöne la ijine etid matre troa ce wange la itre ithuemacany qa ngöne la itre xaa mekun ngöne la pune la itus?
4 Itre Xaa Mekun: Eje e hnine la itre xaa mekun ngöne la pune la itus, la 14 lao topik nyine nyi xan la itre mekun hna ce ithanatan ngöne la itre mekene la itus. Maine easa ajan, tre, ithanatane jë la itre topike cili ngöne la kola inine la Tusi Hmitrötr. Ame ngöne la itre xaa topik, tre, maine jë tro sa ithuecatre kowe la hnainin troa ketre sipu e lai itre xaa mekun, maine kola mama laka, angeic a trotrohnin me kapa la itre ini hna hamën ngöne la itre mekene la itus. Drei la ketre ceitun, maine ka lapaune hë la hnainin ka hape Iesu hi la Mesia, thaa nyipi ewekë kö troa ce ithanatane me angeic lo taan hna hape, “Iesu Keriso—Lo Mesia Hna Thingehnaean,” ngöne la kola ithanatan la mekene 4, hna hape, “Drei Lae Iesu Keriso?” Ame pena ngöne la itre xaa ijin, maine jë ka loi e troa xomi ijine ngöne la kola inine la Tusi Hmitrötr, troa ithanatane la itre xaa mekun ngöne la pune la itus, maine itre xane ju qa ngön.
5. Maine easa ajan troa xome la itre ithuemacanyi qa ngöne la itre xaa mekun ngöne la pune la itus, nemene la aqane tro sa kuca?
5 Maine easë a iëne troa ithanatane la itre xaa mekun ngöne la pune la itus, maine jë tro sa canga hnëkëne la itre hnying me ce wange la itre paragaraf tune la aqane ithanatane së la itre mekune ngöne la mekene la itus. Maine pena thenge la itre hna ajan hnene la hnainin, maine jë tro sa xome la itre hnepe menetr ngöne la ijine etid matre troa ce wange hmaca me angeic lai itre ithuemacany. Celë hi ka aijijë së lai troa xecie hnyawa koi së laka, trotrohnine hi angeic la itre mekun hnei angeic hna ketre sipu e.
6. Tune kaa la aqane troa xome la itre mekune hna eköhagen ngöne la pune la nöjei ini?
6 Itre Mekun Hna Eköhagen Nyine Ce Wang: Ame ngöne la pune la nöjei meken ne la itus, hetrenyi la itre mekun hna eköhagen ka sa lo lai itre hnying ngöne la qaane la meken ne la itus. Ijije hi tro sa xome la itre mekune cili matre wange hmaca la itre mekune ka tru ne la meken ne la itus. Ame la itre xaa trejin, tre, hnei angatr hna öhne la eloine la troa e la nöjei mekun me ce xom memine la hnainin la itre xötr ka ce tro memin. Thupene lai, angatr a sipone kowe la hnainin troa qeje pengöne la aqane anyipicine lai mekun hnene la itre xötr ne la Tusi Hmitrötr. Kola aijijëne la ka hamë ini troa atre maine trotrohnine hnyawa hi la hnainin la itre mekune ka tru ne la ini memine la aqane sajuëne itre ej hnene la Tusi Hmitrötr. Ketre troa atre mina fe maine angeic a kapa la itre mekune cili. Kola inine fe la hnainin troa xome la Tusi Hmitrötr troa qeje pengöne la nyipici kowe la itre xaa atr.
7. Nemene la aqane tro sa xome la itus Ini Tusi Hmitrötr matre troa eatrëne hnyawa la hnëqa së?
7 Ame la ketre aqane troa eatrëne hnyawa la hnëqa ne troa inine la itre atr me tro angatre a itretre drei Iesu, tre, ene la troa xötrethenge la itre aqane ini i Iesu. (Mat. 28:19, 20) Kola xatua së troa kuca tune lai hnene la itus Ini Tusi Hmitrötr. The cile kö së troa xome hnyawa la itusi cili matre troa inine la itre atr la nyipici; loi e troa hmaloi, me nualai me nyipi lolo la aqane tro sa hamëne la ini jëne la itusi cili.