Xome Hnyawane Jë La Itre Götranene La Itus Ini Tusi Hmitrötr
Maine tro la hnainin a kapa la itre nyipi ini qa hnine la Tusi Hmitrötr me catre trongëne itre ej, haawe, tro hë angeice lai a kökötr me wawen ngöne la götrane la u. (Sal. 1:1-3) Ijije tro sa xatuane la hnainin troa kökötr hnene la hna huliwane hnyawa la itre xa götran ne la itus Ini Tusi Hmitrötr.
Itre Hnying Nyine Nyiqane Ithanata: Kola nyiqane la itre mekene la itus hnene la itre hnying hna troa sa ngöne la ini. Ka loi troa xome la itre hnyinge cili matre troa aciane la aja ne la hnainin troa sisedrëne la porotrik. Maine pena, troa sipone koi angeic troa pane qeje mekun ngöne la itre hnying. Maine tria la hna sa hnene la hnainin, tha nyipiewekë kö troa lepetrije la mekuna i angeic. Tro kö la itre mekune hnei angeic hna hamën a xatua epuni troa atrehmekune la itre nyine troa wangatrun.—Ite edomë. 16:23; 18:13.
Itre Xaa Mekun: Maine troa trotrohnine me kapa hnene la hnainin la itre mekun hna hamën ngöne lo lai ini, ka loi tro epuni a ithuecatre koi angeic troa pane ketre wange hmaca lo itre xaa mekun nyine ixatua ngöne la pune la itus. Ame hë la kola ini tusi hmaca me angeic, maine jë tro epuni a xome la itre hnepe menetr matre troa atre hnyawa ka hape trotrohnine hnyawa jë kö angeic la itre ini hna ce wange hë. Ngo maine ka troa hetre thangane ka loi koi angeic, loi e tro sa xomi ijine troa ce ithanatane me angeic lo itre xa mekun maine ketre hnepe götranene pena, ngöne la kola e la itre paragaraf me xome la itre hnyinge hnei epuni hna canga hnëkëne amë hë.
Itre Mekune Hna Eköhagen Nyine Ce Wang: Hetrenyi e hnine la itre mekune hna eköhagen ka eje ngöne la pune la itre meken, la itre mekune ka sa lo itre hnyinge nyine nyiqane ithanata. Loi e tro epuni a xome la götrane celë matre troa xecie hnyawa koi epuni laka, trotrohnine hnyawa hi la hnainin nge ijije hi tro angeic a qejepengöne la itre mekune ka tru. Ce e catrëne jë la itre hna cinyihan memine la itre xötr ka ce tro memin. Thupene lai sipone jë kowe la hnainin troa xome la itre xötr, matre troa qejepengöne la kepin matre nyipici la hna cinyihan.—Ite Hu. 17:2, 3.