Huliwa Ne Cainöje Së—Hatrene Utipin

¹ Hnei Iesu hna wanga atrehmekune la pengöne la itre atr ka ala nyim ka drenge la maca hnei nyidrëti hna tro fë, laka, “isa ije hë [angatr] tune la nöjei mamoe ka pa ate thupën.” (Mat. 9:​36) Hnei nyidrëti hna ini angatr la itre jë i Iehova cememine la ihnim me hni ka menyik; nyidrëti fe a akeukawane la itre hni angatr, me hamëne cememine la utipin la ka ijij thatraqane la mele i angatr ngöne la götrane la ua. Ame ngöne la easa thele ewekë ngöne la itre jë i nyidrë, easë a inine troa mekune me dreng e kuhu hni së tui Iesu, nge eje hi lai laka, tro ha mama ngöne la hna cainöj laka easa utipine la itre atr.

² Pane mekune ju la aqane ujë i Iesu ngöne la kola easenyi nyidrë hnene la itre atr ka pë hna mejiune kow, nge ka aja ixatua. (Luka 5:​12, 13; 8:​43-​48) Hnei nyidrëti hna wanga atrunyi nyudren ceitune me itre atr ka aja ixatua. (Mar. 7:​31-​35) Nyidrëti a hane hnehengazone fe la itre aliene hni ne la itre xan me amamane la ihnimi nyidrëti koi angatr. Thaa nyidrëti kö a goeën la ka mama koi lue meke i atr, ngo kolo pe a goeëne la hni. (Luka 7:​36-​40) Eje hi laka, pexeje la aqane amamane Iesu la thiina ka menyik me utipin ne la Akötresi së.

³ Hna “Utipi Angat”: Thaa hnei Iesu kö hna xome la huliwa ne cainöj ceitune memine la itre xaa hnëqa hna upi nyidrëti troa kuca, laka easa kuca, tre hna upi së. Ohea, kola mama hnyawa laka hnei nyidrë hna “utipine” la itre atr. (Mar. 6:​34) Ketre tune fe enehila, thaa easë kö a tro fë la maca hnene laka qa së hmekuj; ngo easë a thele troa amelene la itre atr. Thele jë troa trotrohnine la kepine matre kola xome la ketre aqane ujë hnene la itre atr. Pine nemen matre angatr a xou me hnehengazo menu pala ha? Hapeu, hna wangesixa angatr me amenune hnene la itre hene hmi ka thoi? Maine tro sa hane nyipi ewekë angatr, eje hi lai laka tro hë angatr a hane dreng la maca ka loi.​—2 Kor. 6:​4, 6.

⁴ Loi e troa ketr la itre atr hnene la utipin. Drei la ketre ceitun: Kola hace la ketre föe hnene laka meci hë la nekö i eahlo jajiny ka köni treu petre hi. Hna fenafena la qëhnelö i eahlo hnene la lue trejine föe, ene pe eahlo a alö nyidroti jë ke, kola mekune hnei eahlo troa icilekeu memine la mekune ne la lue föe, göne la kepin matre Akötresieti a nue la akötr. Ngo, hnene pë hë lai föe hna qaja e thupene ka hape: “Hnei nyidroti hna drei ni cememine la utipin atraqatr, nge ame hë la nyidroti a trotriji ni, kösë atraqatre catre pi hë la madrineng; ene pe eni a kapa ju tro hmaca nyidroti a traqa troa wai ni.” Nyipunieti kö a hane catre thele troa amamane la utipine i epuni kowe la itre atr hnei epuni hna iöhnyi memin ngöne la hna cainöje trootro?

⁵ Maine tro sa catre hane utipine la itre atr, eje hi lai laka, tro ha xatua së troa ce thawa me nyudreni la nyipi keukawa. Nge e hne së hna eëne pala hi la thiina cili, easë hi lai a atrune la “Tretretroti ka ihnim,” ene Iehova.​—2 Kor. 1⁠:⁠3.