Nyipi Ewekë Tro Sa Utipine Me Thiina Ka Menyik
1. Ame enehila, nemene la hna ajan hnene la itre atr ka cile kowe la itre jol?
1 Qane la mele ne la atr, pë ju hë ketre atr ka tha aja ixatua ngöne la kola cile kowe la itre jol. Hnene laka kola ngazo catre la aqane mele e celë fen, ene pe canga saqe hi pë madrine la itre atr, me lapa fë meci e kuhu hni, nge pë hnyawa ha mejiune i angatr. Traqa koi itre milio la itre atr ka aja ixatua, celë hi matre hnëqa së itre Keresiano troa amaman, laka, easa hnehengazone la itre aja ka eje thene la itre atr ka lapa ezi së. (Mat. 22:39; Gal. 6:10) Tro sa amamane tune kaa lai?
2. Nemene la ketre aqane ka loi tro sa amamane la hni ne utipin?
2 Ketre Huliwa Ka Amamane La Hni Ne Utipin: Iehova hmekuje hi la qane la nyipi keukawa ka epine palua. (2 Kor. 1:3, 4) Nyidrëti a upi së troa xome la tulu i Nyidrë, ene la troa “feje hnin” me hane tro fë la maca ka loi ne la Baselaia kowe la itre atr ka lapa ezi së. (1 Pet. 3:8) Ame la troa catre xome la huliwa cili, tre, celë hi ketre aqane troa akeukawane hnyawa la “itete thë fë hni,” ke Baselaia i Akötresie hmekuje hi la nyin la itre akötr hna melëne hnene la nöjei atr asë. (Is. 61:1) Pine laka atraqatre la hni ne utipine i Iehova kowe la itre hlue i Nyidrë, ene pe calemi hë tro Nyidrëti a apatrene la itre atr ka ngazo, me acile la ketre fene ka hnyipixe me ka meköt.—2 Pet. 3:13.
3. Tro sa goeëne tune kaa la itre atr tui Iesu?
3 Loi e Tro Sa Goeëne La Itre Atr Tui Iesu: Tha Iesu hmekuje kö a goeëne la itre atr hna cainöje kow ceitu me ketre gurup. Ngo nyidrëti pe a goeë angatr ceitu me itre atr ka hetre aja ngöne la götrane la ua. Kola aceitunë angatr memine la itre mamoe ka pëkö atre thupë angatr me atre eatrongë angatr. Hna ketr la hni Iesu hnene la itre ewekë hnei angeic hna öhn, ene pe nyidrëti jë a ini angatr cememine la xomihni ahoean. (Mar. 6:34) Maine tro sa goeëne la itre atr tune la aqane waiewekë i Iesu, tro hë lai a ithuecatre koi së troa utipine la itre atr, angatr isa ala cas. Tro ha mama la utipine cili ngöne la aqane ithanata së me aqane goeë angatr hne së. Loi e tro sa amë panëne la huliwa ne cainöj ngöne la mele së, me thele troa ihmeku la itre trenge ewekë së memine la itre aja ka eje thene la atr.—1 Kor. 9:19-23.
4. Pine nemene matre nyipi ewekë tro sa xetrëne la hni ne utipin?
4 Kola kapa hnyawa la maca ne la Baselaia hnene la itre atr ka ala nyim ka xulu qa ngöne la nöjei ethen, nge angatre fe a madrine la kola akeukawane la itre hni angatr. Hawe, maine tro pala hi sa xetrëne la hni ne utipin, tro hë sa atrune me amadrinëne la Akötresie ka utipin, ene Iehova.—Kol. 3:12.