Epuni Kö a Hane Cilëgöline La Wesi Ula i Akötresie?
1 Kola catre cilëgöline la Wesi Ula i Akötresie hnene la itre nyipi Keresiano, ngöne la ketre fene ka thaa jelenyipicine kö la Tusi Hmitrötr. Ka xecie hnyawa koi së laka “qa thene la Ua i Akötesie la hna cinyihan’ asë,” matre caasi hi la mekuna së me Iesu Keriso, nyidrë lo ka anyipicine me thithi koi Iehova ka hape: “Wesi Ula i cilie la nyipici.” (2 Tim. 3:16; Ioane 17:17) Tune kaa la aqane tro sa cilëgöline hnyawa la Wesi Ula i Akötresie?
2 Troa Inine La Tusi Hmitrötr: Ame Iesu, hnei nyidrëti hna thele troa catre inine la Wesi Ula i Akötresie. Celë hi ka aijijë nyidrëti lai troa xome pala hi la Tusi Hmitrötr ngöne la nyidrëti a cainöje trootro. (Luka 4:16-21; 24:44-46) Nemene la aqane tro sa hnehene hnyawa la itre xötr ne la Tusi Hmitrötr matre thaa tro kö a jole elanyi tro sa xome itre ej? Nyipi ewekë tro sa e la Tusi Hmitrötr ngöne la nöjei drai me thele ewekë ngöne la ketre xötre ka troa hamë ithuecatre koi së maine xatua së pena ngöne la hne së hna cainöje trootro. Maine easë a hnëkë kowe la itre icasikeu, loi e tro sa goeën me e mekötine la itre xötr qa hnine la Tusi Hmitrötr, nge maine jë troa hnëkëne la ketre mekune nyine troa qeje pengöne itre ej. Ame ngöne la easë a sine la itre icasikeu, loi e tro sa xome hnine la Tusi Hmitrötre së la itre xötr hna e hnene la atre cile fë la ketre cainöj. Maine tro sa atrepengöne la itre xötr ne la Tusi Hmitrötr, kolo hi lai a hnëkë së troa ‘thawa hnyawa la wesi ula ka nyipici.’—2 Tim. 2:15.
3 Nue Pi La Tusi Hmitrötr Troa Ithanata: Ame ngöne la easa xome la huliwa ne cainöj, loi e tro sa nue troa ithanata hnene la Tusi Hmitrötr. Hanawang la ketre ceitun, maine ijije hi koi së, loi e tro sa e me ce ithanatane memine la ketre atr la ketre xötr ne la Tusi hmitrötr. Maine tro angeic a hnying maine qaja la ketre mekune ka ajolë së, nyipi ewekë catr troa xome la Tusi Hmitrötr matre troa sa lai hnying. Maine hetre jolene lai atr, maine jë ijije hi tro sa pane amamane hnyawa la ketre mekune qa hnine la Tusi Hmitrötr, me qaja ka hape, “Qëmekene tro ni a tro triji epun, eni a sipone troa pane qaja nyimenyimëne la ketre xötr ne la Tusi Hmitrötr.” Maine ijij, e mekötine jë qa hnine la Tusi Hmitrötr, me nue la atr ka drei së troa goeën la xötr hne së hna e.
4 Ame ngöne la kola amamane kowe la ketre atr hnene la ketre trejine la itre xötr ne la Tusi Hmitrötr göi troa lepe trije la ini ene la Trinite, önine jë hi lai atr ka hape, “Ngöne la melenge ka pexej, eni hi a hmi ngo thatre pi kö ni la hna qaja hnei Tusi Hmitrötr ngöne la ewekë cili!” Hnei angeic hna hane mekune troa inine la Tusi Hmitrötr. Hnei Iesu hna qaja ka hape, troa drenge la nine ula i nyidrë hnene la mamoe i nyidrë. (Ioane 10:16, 27) Ame la jëne ka sisitria matre troa atrehmekune hnene la itre atr ka hni ka menyik la nyipici, tre, ene la troa goeëne mekötine la itre xötr qa hnine la Tusi Hmitrötr. Qa ngöne lai, epi tro asë hi së a itre ka cilëgöline la Wesi Ula i Akötresie ka nyipici!